1 Kɔrint 2:4 - Kaa n Kəzə̀ n fəghə mə

⁴ Tûm zən mə â naʼlənə, â maŋ way dzə ighɔɔmə i nuu bənə n wɔ wù sɔŋtsuʼ ni nəəbə ghaa tii, â fəd loʼ Zay kə Zow kə, kə â fuunə mə n daʼa kə, ni naʼa ghəə tii ghə adzəm tə̀ ghaa.

1 Kɔrint 2:4 Mawu Ofanana

Kəfwaʼ 20:27

N təŋkey mə â ka səm koʼ tsə ni dza tə ghaa ghəə ghən adzəm Zə̀ kə ləghə nə̀ ghaa keeli.

Kəfwaʼ 26:28

Fɔɔ Agripa n daŋŋə bəb ndow tə Pɔl nə̀, “Wə moʼlə nə̀ n kəmə fə inəŋə fən, wə loʼnu ni ghəŋə mə nə̀ n doʼo dzûmə Klisto ə?”

Roma 15:13

N gɔŋŋə nə̀ Zə̀ kən kə ghəŋŋənə nə̀ ghaa i ləmmə fə key tə â təb naŋanə tə ghaa, kə fuu ghaa n duʼlə zə nsə buulə zə nghee ghaa gaʼnə fə̀ŋ n kow wi, sey nə̀, n daʼa kə Zay kə Zow kə, ghaa i laalə kɔʼɔ ndow tə wi n fə̀ŋ tə ghaa tə tədzəm.

Roma 15:19

Tə â ghəŋə ghəə ghən n daʼa kə tsəə tən nsə faalə mən mə â diinə n fəŋŋə kə ghə nsə n daʼa kə Zay kə Zow kə. Sey, mə n naʼa ngəə tsəghə bə tûm i dzuŋu zə bòʼ Klisto ni ney nuu bə n Yerosalem bə taa bə nə Ilirikum.

Roma 16:18

N dza sey n təŋkey ghə̂ ghey ghə ghəŋŋənə ndzoʼo ghəə a tii ghə, ghə fwaʼa way tə Mûkəbii saa Klisto, ghə fədlə fwaʼa tə̀ nəghə u ghə wə. Nyim kə ghə kə tsəghə dzɔbə nə idzuu, ghə a khə ghɔɔmə i tsìi zə ni nəb ghə̂ ghən ghə tɔʼ khə way ghəə ghə.

1 Kɔrint 1:17

Klisto â ka tûm bə dzə mə nə̀ n bə, mə i fuu mmuu n Kəzə̀ mə. Tə â tûm bə mə nə̀ n bə naʼa tûm i dzuŋu zə. Tə â tûm bə mə nə̀ n bə naʼa tûm i dzuŋu zə nə̀ a way dzə n tɔb u wù sɔŋtsuʼ nsə n dzə̀ ə wù sɔŋtsuʼ, sey nə̀ kə̂ və zən Klisto â kpuunə n zat kə fəkaʼ nə doʼlənə kənunu.

1 Kɔrint 2:1

Waazə ghə, nghee tə̀ mə â bənə n səə ghaa ni bə naʼa ghəə a səŋi ghən a nyi doʼonə bòʼ Kəzə̀, mə â ka nəəbə dzə ghaa nə kənyim nkee n tɔb u nii wə.

1 Kɔrint 2:13

Ghəə ghən ghey ghɔɔmə bənə tə̀ ghaa, ghey ghɔɔmə bə dzə way n tɔb u wù sɔŋtsuʼ, à fəd loʼ n tɔb wən Zay kə Zow kə fuunə tə̀ ghey. À loʼ Zay kə Zow kə, kə ghəŋŋənə nə̀ ghey i tiilə dza bə isəŋə zey i loʼnə bòʼ Kəzə̀ tə̀ ghə̂ ghey ghə khənə Zay kə Zow kə.

1 Kɔrint 4:20

N dza sey n təŋkey, ni muu n jìi zey wù khə ni muu tii n fɔɔ u Kəzə̀, loʼ n daʼa key wə khənə ni ghəŋŋə ghəə ghey Zə̀ kə ləghənə, à way dzə n ghəə ghey tə ghɔɔmənə.

2 Kɔrint 6:6

Ghey n dii nə̀ ghey loʼ ghə̂ a kəfwaʼ a Kəzə̀ n muu i ghey i zow zə, n tɔb u ghey, n jìi zey ghey kownə fə̀ŋ tii, n mwam u ghey u dzuŋu wə. Zay kə Zow kə a loʼ n kow ghey, ghey u ləghənə ghə̂ ghə n fə̀ŋ tə ghey tə tədzəm.

Galeshia 1:10

Ghaa moʼlə nə̀ n kəŋə kɔʼlə n wù sɔŋtsuʼ mɔ kɔʼlə n Kəzə̀ ə? Nkee ghaa moʼlə nə̀ n fwaʼa nə ghə̂ ghə i kali bə mə ə? Abə à mə loʼ nə n nam fwaʼa nə ghə̂ ghə i kali bə mə, i sey dii nə̀ n way dzə wù Kəfwaʼ a Klisto.

Kolose 2:4

N ghəə ghən dza bə nə ghaa tɔʼ təmi tsu, nə̀ kə wù loʼ nə nəbə fuunə ghaa n ghəə a badla ghən a fiilənə isəŋə.

1 Tesalonika 1:5

N ghəə ghən dza n tənkey, ghey ka maŋ naʼa dzə tûm i dzuŋu zən tə̀ ghaa nə idzuu. Ghey naʼa n daʼa K-a-zə̀, daʼa kə Zay kə Zow kə, nsə fə̀ŋ tə ghey tə tədzəm. Ghaa khənu jìi zey ghey â muunə tii n nəŋə zey ghey â loʼnə ghi ghaa. Ghey â muu sey n ndzuŋ ə ghaa.

1 Pita 1:12

Zə̀ kə mâ dii naŋa zey bə tə̀ tûm tə wi tə nə̀ fwaʼ kə ghə kə â way dzə ni gaamə wû i ghə, â fəd loʼ ni gaamə ghaa. I loʼ soʼo tə̀ nghee tûm tə Kəzə̀ tən â dza naŋa zey bənə ghəə ghey ghaa zownə nya n wɔ ghə̂ ghey ghə naʼlə bə tûm i dzuŋu zən tə̀ ghaa n daʼa kə Zay kə Zow key Zə̀ kə tûm tsu bənə tə̀ ghaa idəŋ. À wən loʼ aghəə nə̀ tsətəndəghə tə Kəzə̀ tə buʼu dəmə soʼo ni zowkeeli.

2 Pita 1:16

Nghee ghey â dza bənə tə̀ ghaa ndzoʼo daʼa kə səŋi key Mûkəbii saa Yeso Klisto i bəghənə n ghii kə, â maŋ way dzə nzəzəə ghə̂ ghə â bəghə kɔʼnə, â ndzəm loʼ ghəə a səŋi ghey wû i ghey â koʼ ndownə n sə̂ a ghey ghə.

2 Pita 2:18

Ghə kɔʼlə kaabə tsə iwû, ghɔɔmə ilaʼlə, ney kɔʼɔ ghəə a laŋŋə ghey ghə ghəŋŋənə ni nəəbə ghə̂ ghey ghə kuʼlə tyi nuu shi bənə n fəŋŋə kə ghə̂ ghey ghə muunə n ghəə a bəbə ghə nə̀ ghə i ghəŋŋə dzəə dzəə tə aghəə tey gow uwû ghə ləghənə nə̀ ghə i ghəŋŋə.