Byala a mbewu ya wena na ga hi mixo, ni laha gambyeni u nga humuti a woko ga wena; hakuva a ku zi tivi lezaku ku ta mila yihi, leyi kutani leyiya, hambu loku ti mila hi wumbiri ga tona.
Nza zi tiva lezaku ni xihi lexi Nungungulu a xi mahako, xi ta simamisa kala ku pinzuka; ku hava nchumu wu nga engetelwako ka xona, hambu ku hungulwa. Nungungulu i zi mahile kasi vanhu vave ni xichawo mahlweni kakwe. Tis. 33:11; Isa. 46:10
Loku muonhi a maha kubiha zana ga makhati, hambu loku masiku yakwe ma hlaya laha misaveni, nza zi tiva lezaku lava va chavako Nungungulu va ta humelela, hakuva va mu chava mahlweni kakwe. Deut. 6:24; Tis. 33:18
Nzi ta maha navo a xivumelwano xi nga gumelwiko, lezaku nzi nga ta va fularela, nzi nga tsiki ku va katekisa; nzi veka xichawo xa mina timbilwini tabye, lezaku va nga ha nzi fulareli.
Kanilezi nwina lava mu chavako vito ga mina mu ta tsuwukelwa hi gambo ga kululama, na gi hi ni kuhanyisa tipapeni ta gona. Mu ta huma mu khana ku fanana ni marole ma tlhatlhekileko rangeni.
Kanilezi khombo a give ka nwina vaFarisi; hakuva mu nyikela a za wukhume ka minte ni rue ni khubyanyi wontihe, kasi mu tsika nongameto ni kuranza ka Nungungulu; kanilezi mu wa fanele ku maha lezi, na mu nga tsikangi ku humesa leʼzo ranga. Mat. 23:23