Levi 26:30 - Tshwa Bible

³⁰ Nzi ta hahlula matshamu ya nwina ma tlakukileko, nzi wisa a timhinga ta nwina ta gambo, nzi hoxa zirumbi za nwina hehla ka zirumbi za zifananiso za vanungungulu va nwina; ni muhefemulo wa mina wu ta swireka ha nwina.

Levi 26:30 Mawu Ofanana

Genesisi 19:13

Hakuva hi ta lovisa legi wutshamu, hi kota ya huwa ya hombe yi mahiwako hi kota ya vona mahlweni ka Jehova; Jehova i hi rumile akuva hi lovisa legi wutshamu.

1 Tihosi 13:2

Yena i loba huwa mahlweni ka alati hi gezu ga Jehova, aku: Alati, alati! Jehova i ngalo: Languta, ku ta belekiwa a nisanyana lomu ndlwini ka Davida, a vito gakwe hi Josia. Yena i ta phahlela hehla ka wena hi vapristi va legi wutshamu gi tlakukileko, lava va hisako libani hehla ka wena, ku ta hiswa ni marambu ya vanhu hehla ka wena!

1 Tihosi 13:32

Hakuva ku ta tatisiseka a gezu legi a ngaba huwa hi kuleletela ka Jehova mahlweni ka alati ga le Beteli, ni mahlweni ka tontlhe tiyindlu leti ti nga laha wutshanwini gi tlakukileko leti ti nga lomu mitini ya Samaria.

2 Tihosi 23:16

Josia i lo hunzuluka a cuwuka a zilahla lezi zi nga wa hi laho xitsungeni, a humesa a marambu minkeleni leyo, a ma hisa alatini, a gi nyenyezisa khwatsi hi lezi Jehova a wulileko hi nomu wa munhu wa Nungungulu loyi a wulileko timhaka leti. 1 Tih. 13:2

2 Tihosi 23:20

I lo daya vontlhe vapristi lomu maalatini, lava va nga wa hi kona, a hisa marambu yabye hehla ka maalati; zonake i lo tlhelela Jerusalema.

2 Tihosi 23:8

I lo vitana vontlhe vapristi lava va tshamileko lomu mitini ya ka Juda, a nyenyezisa a matshamu ma tlakukileko, laha a vapristi va nga wa hisela kona tibani, kusukela le Geba kala le Berexeba; i lo khungumula a matshamu ma tlakukileko ya tinyangwa lawa ma nga ndleleni ya nyangwa ya Joxua a nduna ya muti, hi tlhelo ga xibhabha xa nyangwa ya muti. Jer. 11:13

2 Kronekele 23:17

Zonake vontlhe vanhu va lo enghena lomu ndlwini ya Baali va yi khungumula, va fayetela ni maalati yakwe, ni zifananiso zakwe, va daya na Mattani a mupristi wa Baali mahlweni ka maalati yakwe.

2 Kronekele 31:1

Makunu laha zontlhe lezi zi nga wa mbhetekile, vontlhe va ka Israeli lava va nga wa hi kona va lo suka vaya mitini ya va ka Juda va ya fayetela zifananiso, va tsema matshamu ya zifananiso za Axtarte, va khungumula matshamu ma tlakukileko ni maalati tikweni gontlhe ga va ka Juda ni ga ka Benjamini, ni ga ka Efraime, ni ga va ka Manasa kambe, va kala va mbheta zontlhe. Zonake vontlhe va ka Israeli va lo tlhelela mitini yabye.

Tisimu 106:40

A zanga ya Jehova yi lo vukela tiko gakwe, Laha kaku a swireka hi tshomba yakwe.

Tisimu 89:38

Kanilezi makunu u hoxile a totilweko wa wena, U mu tsikile, u mu zangarela.

Isaya 27:9

Hikwalaho a kugoha ka Jakobe ku ta basiswa; Lowu hi wona mbhanzu wa kutsetselelwa ka xionho xakwe; Laha maribye wontihe ya maganzelo ma panzekile kota maribye ya mhemba, A maAxera ni zifananiso za gambo zi nga ha ta yima. Levi 26:30; Isa. 2:20

Jeremia 14:19

Xana Juda u mu tsikele magumo ke? Kutani u ngava u swirekile mbilu hi Zioni ke? Hikuyini u hi bileko lezaku hi nga zi koti ku chumiwa ke? Hi wa lavelele kurula, kanilezi a ku tangi kusasa; Hi lavelele xikhati xo chumiwa, kasi kuchava ku kona!

Jeremia 16:18

Hi kuranga nzi ta va tlhelisela kambiri a kugoha kabye ni zionho zabye; hakuva va nyenyezisile a tiko ga mina hi zirumbi za manyala yabye, na va tatisile a tshomba ya mina hi manyalataniso yabye.

Ezekieli 16:39

Nzi ta ku nyikela mandleni yabye, va ta khungumula a ziyindlwana za wena ni matshamu ya wena ma tlakukileko; va ku runzuwulela a tinguwo ta wena, va ku tekela a wubombi ga wena, va ku siya u hi ximbyiri.

Ezekieli 43:7

I te ngalo ka mina: Nʼwana wa munhu, hi laha ku nga ni xitshamu xa mina xa wuhosi, a wutshamu legi nzi yimileko hi mikonzo ya mina, lomu nzi ta nga tshama xikari ka vanana va ka Israeli kala kupinzuka. A yindlu ya ka Israeli yi nga ta ha nyenyezisa a vito ga mina ga kubasa, vona ni tihosi tabye, hi wubhayi gabye ni zirumbi za tihosi tabye a kufeni ka tona, 2 Tih. 21:18, 26

Ezekieli 6:13

Nwina mu ta zi tiva lezaku nzi mina Jehova, laha a vanhu vabye va delweko va mbambamela xikari ka zifananiso zabye, ni lomu matlhelweni ya maganzelo yabye, ni ka miganga yontlhe, ni lomu hehla ka zitsunga, ni lomu hasi ka tisinya to nyuka, ni hasi ka tisinya tontlhe ta mikuhlu, laho va nga mahela kona a minyikelo yo nuhela ka zontlhe zifananiso zabye.

Hosea 10:2

A timbilu tabye ti khohlakele, hikwalaho va ta koneka. Nungungulu i ta khungumula a maalati yabye, a wisa zifananiso zabye.

Levi 20:23

Mu nga lanzeli mikhuwo ya vanhu va tiko lego nzi va hlongolako mahlweni ka nwina, hakuva va mahile zontlhe lezi zilo, va nzi hlamukisa ha zona.

Levi 26:11

Nzi ta aka a yindlu ya mina xikari ka nwina, ni muhefemulo wa mina wu nga ta swireka ha nwina. 2 Kor. 6:16

Levi 26:15

ni loku mu kanyisa a zileletelo za mina, ni loku mihefemulo ya nwina yi nyenya a ziyimiso za mina, mu nga ha hlayisi milayo ya mina yontlhe, kanilezi mu tshova xivumelwano xa mina,

Amosi 6:8

Hosi Jehova i hlambanyile hi wutsumbu gakwe, aku: Jehova a Nungungulu wa tiyimpi i ngalo; Nza swireka hi matshanza ya Jakobe, nza venga a ziluvelo zakwe, hikwalaho nzi ta nyikela kulobyisweni a muti ni zontlhe zi nga ka wona.

Amosi 7:9

A matshamu ma tlakukileko ya Isaka ma ta hahlulwa, ni matshamu ma basileko ya ka Israeli ma ta hangalasiwa; nzi ta vukela a yindlu ya ka Jeroboamu hi supado. 2 Tih. 17:20

Deuteronome 32:19

Jehova i lo zi wona, a va tsika, A holovela vana vakwe va xinuna ni va xisati,