Hosea 4:16 - Tshwa Bible

¹⁶ Hakuva Israeli i na ni kanu khwatsi i thokazi ka xitlalu; makunu Jehova i ta va risa khwatsi i tiyivana wutshanwini gi anamileko.

Hosea 4:16 Mawu Ofanana

Tisimu 78:8

Va nga fanani ni vararu vabye, A xizukulwana xa xikaha ni kuhluwuka, A xizukulwana xi nga hiko na mbilu yo tiya, Lexi a moya wa xona wu nga kholekangiko ka Nungungulu Ekso. 32:9; 33:3; 34:9

Isaya 22:18

i ta ku hoxa u wumbulukela kukotisa a bhola tikweni gi anamileko; u ta fela laho, ni tikareta ta wena to saseka ti ta gumelwa kwalaho, wena u nga tingana ta yindlu ya hosi ya wena.

Isaya 30:23

Zonake a timbewu ta nwina leti mu nga ti byala i ta ti nisela vula, ni zibaba zi humeswako hi pfuno wa masimu zi ta nanziha zi xurisa; a xikhatini lexo a mitlhambi ya nwina yi ta gela mikoveni ya hombe. Levi 26:4; Deut. 11:14; 28:12

Isaya 5:17

Zonake a tiyivana ti taga kona khwatsi hi loku ti hi wuriselweni ga tona, Ni vamatiko va taga a zipetso zi onhekileko za laʼvo fuma.

Jeremia 14:7

Hambu loku a zionho za hina zi hi ranisa, O Jehova, hi vune hi kota ya vito ga wena. Hakuva hi hluwukile kanyingi, hi ku onhela.

Jeremia 3:11

Jehova i te ngalo ka mina: Israeli loyi a hambukileko i kombisile kululama ku hunza Juda loyi a nga tsumbekangiko.

Jeremia 3:6

Jehova i lo wula ka mina masikwini ya hosi Josia, aku: Xana u wonile lezi Israeli a wasati loyi a hambukileko a nga zi maha ke? Yena i kanzihile a zitsunga zontlhe zi tlakukileko, ni hasi ka tontlhe tisinya to nyuka, kwalomo i na si hutsetse wubhayini. 2 Tih. 17:10

Jeremia 3:8

Nzi lo wona lezaku hambu lezi nzi nga hlongole Israeli, nzi mu nyika a papilo ga kuhambana hi kota ya wubhayi gakwe, Juda a makabye wakwe loyi a nga tsumbekangiko, a nga chavangi, kanilezi yenawu i lo famba a ya maha gona wubhayi. Deut. 24:1; 2 Tih. 17:18

Jeremia 31:18

Nzi zwile Efraime ku ti tsetsa, aku: U nzi tsayisile, nzi kwapiwa A ku fanana ni nkuzana yi nga tolovelangiko a muyoko; Nzi hunzuluse, kasi nza wuya, Hakuva hi wena Jehova Nungungulu wa mina.

Jeremia 5:6

Hi lezo-ke a nghala ya lomu khwatini yi ta va daya, Ni hlolwa ga lomu xiwuleni gi ta va hlakahla, A yingwe yi ta nyanimela a miti yabye; Munwe ni munwani a ta nga huma handle i ta hanzulelwa. Hakuva a zihambunyeto zabye zi tele, Ni zigoho zabye zinyingi. Jer. 4:7; Hos. 13:7

Jeremia 7:24

Kanilezi a va ingisangi, hambu ku riya tindleve; kanilezi va lo famba lomu makungweni yabye ni lomu ka kunonoha ka timbilu tabye ta kubiha, va lo tlhelela nzhako, a va yangi mahlweni.

Jeremia 8:5

Hikuyini lava vanhu va Jerusalema va hluwuka hi kusimamisilweko ke? Va tiyile kukhohlakaleni, va ala ku wuya.

Hosea 10:11

Efraime i thokazi legi gi gonzisilweko, gi ranzako ku hula mavele: kanilezi nzi vekile muyoko nhanwini ya gona yo saseka. Nzi ta veka mukhileli hehla ka Efraime; Juda i ta rima, na Jakobe a fayetela marukwani. Deut. 25:4; 1 Kor. 9:9

Hosea 11:6

A supado yi ta daya lomu mitini yakwe, yi tshova a zikwinyaro za yona, yi va hihirita hi kota ya xikungo xabye wutsumbu.

Hosea 11:7

A vanhu va mina va bohile xifungo xo nzi fularela, hambu loku va vitanwa a kuya ka loyi a nga hehla, a nga kona ni munwe a mu tlakuselako a mbilu yakwe.

Levi 26:33

Na nwina nzi ta mu hangalasa lomu matikweni, nzi mu hlongorisa hi matlhari, a tiko ga nwina gi sala gi maha xiwula, ni miti ya nwina yi maha marumbi.

Zakaria 7:11

Kanilezi va lo ala ku ingisa, va tshukwama makatla, va vala tindleve tabye, aku kasi va ngazwi.

1 Samueli 15:11

Nza ti laya hi lezi nzi nga yimisa Saule a kuva hosi, hakuva i hluwukile, a nga hlayisangi timhaka ta mina. Zonake Samueli i lo zangara, a rila ka Jehova gontlhe wusiku. Gen. 6:6