रोमियो 1:16 - बुक्सा

¹⁶ मैं अच्‍छी खबर सै ना सरमाबौ हौं, कैसेकै अच्‍छी खबर मुक्‍ति पानै के ताँई, जो उसके ऊपर बिसवास करै है, उन सबके ताँई परमेसर की सकति है पैले यहूदी के ताँई फिर यूनानी के ताँई।

रोमियो 1:16 Mawu Ofanana

मरकुस 8:38

अगर कोई मैंकै और मेरी बातौं कै, बैबिचारी और पापी लोगौ के डर सै मेरो इनकार करैगो, तौ ‘मैं’ आदमी को लौंड़ा बी जब पबित्‍तर सुरगदूतौं के संग अपने अब्बा की महिमा मै आंगो, तब मैं बी उसको इनकार कर दंगो।”

लूका 9:26

जो कोई मैंकै और मेरी बातौं कै लोगौ के बीच मै माननै सै सरमागो तौ ‘मैं’ आदमी को लौंड़ा बी, जब अपनी और अपने अब्बा की, और पबित्‍तर सुरगदूतौं की महिमा के संग आंगो, तौ मैं बी उसकै ना मानंगो।

यहून्‍ना 7:35

तब यहूदिऔं नै आपस मै कैई, “जौ आदमी कहाँ जानो चाँहै है कै हम बाकै ना ढूंड़ सकैं? का बौ उन यहूदी लोगौ के धौंरे जागो, जो यूनानी लोगौ के बीच मै इतै-उतै होकै बसे पड़े हैं, और का बौ यूनानी लोगौ कै बी सिक्‍छा देगो?

चेलौ के काम 3:26

परमेसर नै जब अपने लौंड़ा ईसु कै मरे भएऔं मै सै जिन्‍दो करो तौ सब सै पैले तुमरे धौंरे भेजो जिस्सै कै तुमरे बुरे कामौ सै छुटाकै तुमकै आसीस दे।”

रोमियो 10:17

और हम देखै हैं कै सुननै सैई बिसवास पैदा होवै है, और जो सुनो जावै है बौ मसी को बचन है।

रोमियो 15:19

सकतिसाली चिन्‍नौ, चमत्कारौं और पबित्‍तर आत्‍मा की सकति सै, मेरे दुआरा ऐरूसलेम सै लेकै इलुरिकुम तक मसी की अच्‍छी खबर को काम पूरो करो।

रोमियो 15:29

और मैं जानौ हौं कै जब मैं तुमरे धौंरे आंगो तौ तुमरे ताँई मसी की पूरी आसीस के संग आंगो।

रोमियो 2:9

बुराई कन्‍नै बारे हर एक आदमी कै पैले यहूदी फिर गैर यहूदी कै दुख और मुसीबत सैहनी पड़ंगी।

रोमियो 4:11

खतना होनै सै पैलेई इब्राहिम कै बिसवास के दुआरा धरमी ठैराओ गओ। बाकै धारमिकता साबित कन्‍नै के ताँई छाप मिली। इसताँई बौ उन सबको अब्बा ठैरो, जो बिना खतना के बिसवास करैं हैं जिस्सै कै बे धरमी ठैराए जाँय।

1 कुरन्‍थियों 15:2

अगर तुम बा अच्‍छी खबर कै पूरे बिसवास के संग थामे रैहओगे तौ जो अच्‍छी खबर मैंनै सुनाई ही बाई सै तुमकै मुक्‍ति मिलैगी, ना तौ तुमरो बिसवास कन्‍नो बेकार है।

1 कुरन्‍थियों 2:2

कैसेकै मैंनै अपनी जिन्‍दगी मै जौ बात ठान लई ही, कै जब मैं तुमरे धौंरे रैहंगो तौ ईसु मसी और जैसी बाकी मौत कुरूस मै भई बाकै छोड़कै किसी दूसरी चीज के बारे मै बात ना करंगो।

1 कुरन्‍थियों 2:4

जो परचार और सिक्‍छा मैंनै तुमरे बीच मै दंई बामै कोई चालाँकी बारी और आदमी की समज की बात ना ही पर परमेसर की आत्‍मा की सकति को सबूत हो।

1 कुरन्‍थियों 9:12

जब दूसरे लोग कुछ पानै को हक रक्‍खै हैं, तौ का हमरो हक उन लोगौ सै जादा ना है? फिर बी हमनै इस हक को फाएदा ना उठाओ। उल्टा, हम मसी की अच्‍छी खबर के परचार मै कोई रुकाबट ना डारै हैं। इसताँई हम हर तरै सै दुख सैहबैं हैं।

1 कुरन्‍थियों 9:18

तौ फिर मेरी डिहाड़ी किस चीज मै है? जामै है कै जब मैं किसी सै बिना कुछ लेए भए मसी की अच्‍छी खबर को परचार करौ हौं, और अच्‍छी खबर सुनानै मै जो कुछ मेरो पानै को हक है, बाको फाएदा मैं ना उठामौ हौं।

2 कुरन्‍थियों 2:12

जब मैं मसी की अच्‍छी खबर कै सुनानै के ताँई तरोआस नाम की जघै मै आओ हो, तौ परभु नै मेरे ताँई पैलेई सै एक रस्ता खोलर खाई ही।

2 कुरन्‍थियों 4:4

सैतान जा दुनिया को देबता है, और बानै उन लोगौ की बुद्‍धि बन्‍द करर खाई है, और बे मसी मै बिसवास ना करै हैं जो परमेसर को रूप है, जो मसी की अच्‍छी खबर की महिमा की चमक कै ना देख सकै हैं।

2 कुरन्‍थियों 9:13

तुमरो जौ सेवा को काम देक्‍कै बे परमेसर की बड़ाई करंगे कैसेकै तुम ईसु मसी की अच्‍छी खबर के हिसाब से चलौ हौ और बाके आधीन रैहबौ हौ और जो तुम परमेसर के लोगौ के ताँई और सबई के ताँई दान देवौ हौ, तौ बे जाके ताँई परमेसर को धन्‍नबाद करै हैं।

गलातिऔ 1:7

पर सई मै कोई दूसरी अच्‍छी खबर हैई ना पर कुछ लोग ऐंसे हैं जो तुमरे दिल मै बैहैम डारै हैं और मसी की अच्‍छी खबर कै बिगाड़नै की सोचै हैं।

1 थिसलुनीकियौ 2:13

इसताँई हम बी परमेसर कै हमेसा धन्‍नबाद देवै हैं। कैसेकै हमरे दुआरा परमेसर को बचन तुमरे धौंरे पौंचो, तौ तुमनै बाकै आदमिऔ को ना पर परमेसर को पबित्‍तर बचन समजकै बिसवास करो और जौ बचन तुम लोगौ के बीच मै काम करै है।

1 तीमुथियुस 1:11

जौ सिक्‍छा धन्‍न परमेसर की बा महिमा के ताँई उस अच्‍छी खबर के हिसाब सै है, जो मैंकै सौंपी गई है।

2 तीमुथियुस 1:12

इसताँई मैं जे दुख बी उठा रओ हौं, फिर बी मैं सरमाबौ ना हौं कैसेकै मैं जौ बात जानौ हौं कै मैंनै किस मै बिसवास करो है। मैंकै पक्‍को भरोसो है कै जो मैंकै चीज सौंपी हैं बाकी रखबारी बौ कर सकै है, जब तक कै बौ नियाय को दिन ना आय।

2 तीमुथियुस 1:16

उनेसिफुरूस के टब्बर के ऊपर परभु दया करै कैसेकै बानै मेरे दिल कै कई दफै तसल्‍ली दई है और मेरे जेल मै रैहनै सै बाकी खोपड़ी सरम सै नीची ना भई।

2 तीमुथियुस 1:8

इसताँई ना तौ तू हमरे परभु की गभाई दैनै सै और ना मैंसै जो बाको कैदी है, सरमईओ। पर बा सकति के दुआरा अच्‍छी खबर कै सुनानै के ताँई मेरे संग दुख उठाऔ जो परमेसर की ओर सै मिलै है।

इबरानिओ 4:12

कैसेकै परमेसर को बचन जिन्‍दो और सकतिसाली है और बौ दोधारी पैनी भई तरवार सै बी जादा पैनो है। बौ पिरान, आत्‍मा और जोड़ौ और गूदा कै अगल करकै आर पार छेदै है और हमरे दिल की बातौं और इच्‍छाऔं कै जानै है।

1 पतरस 4:16

पर जो कोई मसी के नाम की बजै सै दुख झेलै है, तौ बौ सरमाऐ ना, पर बा नाम मै परमेसर की बड़ाई करै।