जब उसके पकड़बानै बारे यहूदा नै देखो कै ईसु दोसी ठैराओ गओ है, तौ बौ भौत दुखी भओ और उसनै मुक्ख पुजारिऔं और बुजरग यहूदी नेताऔं कै चाँदी के बे तीस सिक्का लौहटा दए।
ईसु बोलई रओ हो कै उसके बारैह खास चेलौ मै सै एक यहूदा दिखाई पड़ो। उसके संग लठिया और तरवार लेए भए एक भीड़ ही, जिसकै मुक्ख पुजारिऔं, सास्तरिऔं और बुजरग इज्जतदार यहूदिऔं नै भेजो हो।
जब ईसु बात करई रओ हो तौ देखौ, एक भीड़ आ पौंची और बारैह चेलौ मै सै एक जो यहूदा कैलाबै हो, भीड़ के अग्गे-अग्गे चलो आ रओ हो, बौ ईसु कै चूमनै के ताँई उसके धौंरे आओ।
और बहाँ पौंच कै पतरस, यहून्ना, याकूब, अन्दरयास, फिलिप्पुस, थौमा, बरतुलमै, मत्ती, हलफई को लौंड़ा याकूब, जोसीलो भक्त समौन और याकूब को लौंड़ा यहूदा जे सबई बा ऊपर के कमरा मै इखट्टे भए जहाँ जे रुके हे।
