गलातिऔ 2:9 - बुक्सा

⁹ याकूब, पतरस और यहून्‍ना बिसवासी लोगौ के बीच मै जानेमाने नेता हे। जो किरपा मैंकै परमेसर सै मिली ही जब उन्‍नै बाकै जान लओ तबई मैंकै और बरनबास कै अपनो साती मानो। और बे जा बात मै राजी हो गए कै हम गैर यहूदी लोगौ के धौंरे जांऐ और बे यहूदी लोगौ के धौंरे जांगे।

गलातिऔ 2:9 Mawu Ofanana

मत्‍ती 16:18

और मैं बी तेसै कैरओ हौं, कै तू पतरस यानी ‘चट्‍टान’ है, और मैं जा चट्‍टान मै अपने बिसवासिऔ की मंडली बनांगो, और मौत के फाटक इसके सामने टिक ना सकंगे।

लूका 22:8

तब ईसु नै पतरस और यहून्‍ना जौ कैह कै भेजे, जाकै हमरे खानै के ताँई फसै को खानो तईयार करौ।

यहून्‍ना 1:42

फिर अन्‍दरयास समौन कै ईसु के धौंरे लाओ। ईसु नै बौ देखो और कैई, “तू यहून्‍ना को लौंड़ा समौन है। तू कैफा यानी पतरस कैलागो।”

चेलौ के काम 12:17

तबई बानै उनकै चुप रैहनै के ताँई हात हलाकै इसारो करो और उनसै कैई कै, “परभु मैंकै जेल मै सै कैसे बाहार लिकारकै लाओ है।” फिर बानै कैई कै, “जा बात कै याकूब और दूसरे भईयौ सै कैह देईओ।” और तबई पतरस बहाँ सै किसी दूसरी जघै चलो गओ।

चेलौ के काम 15:13

जब उन्‍नै अपनी बात खतम करी, तबई याकूब नै कैई कै, “हे भईयौ, मेरी बात सुनौ।

चेलौ के काम 15:7

सला कन्‍नै के बाद पतरस नै खड़े होकै कैई कै, “हे भईयौ, तुम जौ बात जानौ हौ कै कुछ दिनौ पैले परमेसर नै तुम्मै सै मैंकै छाँटो, कैसेकै मेरे मौह सै गैर यहूदी लोगौ नै परमेसर की अच्‍छी खबर सुनी और बिसवास करो।

चेलौ के काम 4:36

कुपरूस जघै मै एक आदमी हो जिसको नाम यूसप हो और बौ एक लेबी गोत को हो। और भेजे भए चेला बाकै बरनबास नाम सै बुलाबै हे, जिसको मतलब है, “हिम्मत बढ़ानै बारो लौंड़ा।”

रोमियो 1:5

और मरे भए मै सै जी उठनै सै पबित्‍तर आत्‍मा दुआरा सकति के संग परमेसर को बेटा ठैराओ गओ, और बौ हमरो परभु ईसु मसी है।

रोमियो 12:3

कैसेकै मैं उस किरपा के दुआरा जो मैंकै देओ गओ है, तुम्मै सै हर एक कै कैबौ हौं, कै जैसो समजनो चँईऐ, उस सै जादा कोई बी अपने आपकै ना समजै, पर परमेसर नै हर एक कै जितनो जितनो बिसवास दओ है, बैसेई सोच समजनै के बाद अपने आपकै समजै।

रोमियो 15:15

मगर मैंनै तुमकै फिर सै याद दिब्बानै के ताँई कुछ बातौं के बारे मै साप-साप लिखो है। और जो किरपा मैंकै परमेसर सै मिली है, उसई की बजै सै जौ कर रओ हौं।

1 कुरन्‍थियों 15:10

पर मैं जो कुछ बी हौं, बौ परमेसर की किरपा सै हौं। बाकी किरपा जो मेरे ऊपर भई, बौ बेकार ना गई। पर मैंनै सबई सै जादा मैहनत करी, तौबी जौ मेरी ओर सै ना पर परमेसर की किरपा सै भओ, जो मेरे ऊपर ही।

2 कुरन्‍थियों 11:5

तुम जिनकै बड़ो भेजो भओ चेला समजौ हौ, उनसै मैं खुद कै कम ना समजौ हौं।

2 कुरन्‍थियों 12:11

मैंकै बेबकूफ के हाँई बोलनै के ताँई तुमनै मजबूर करो। तुमकै तौ मेरी बड़ाई कन्‍नी चँईऐ ही। बैसे तौ मैं कुछ बी ना हौं, पर जिनकै तुम बड़े-बड़े भेजे भए चेला समजौ हौ उनसै मैं किसी बी बात मै कम ना हौं।

2 कुरन्‍थियों 8:4

बे ऐरूसलेम मै रैहनै बारे परमेसर के लोगौ की सायता कन्‍नै के ताँई हम सै बेरमबेरा बिनती करै हैं।

गलातिऔ 1:16

और अपने लौंड़ा कै मैं मै परकट करो जिस्सै कै मैं गैर यहूदी लोगौ के बीच मै बाके लौंड़ा की अच्‍छी खबर को परचार करौं, तौ मैंनै तुरन्‍त जाकै किसी आदमी की सला ना लई।

गलातिऔ 1:18

फिर तीन साल के बाद मैं ऐरूसलेम मै पतरस सै मिलनै गओ और पन्‍दरै दिन तक मैं बाके धौंरे रैहओ।

गलातिऔ 2:1

चौदैह साल के बाद बरनबास के संग जब मैं फिर ऐरूसलेम गओ तौ तीतुस कै बी अपने संग ले गओ।

गलातिऔ 2:2

परमेसर नै मैंकै कैई और इसताँई मैं बहाँ गओ और जिस अच्‍छी खबर को मैंनै गैर यहूदी लोगौ के बीच मै परचार करो हो बाके बारे मै उनकै बताओ। हाँ सिरप उनकै बताओ हो जो जानेमाने लोग हे। कैसेकै ऐंसो ना होए कै बे काम जो मैंनै पैले करे हे और जो काम मैं कर रओ हौं बे बेकार ना जाऐ।

गलातिऔ 6:3

कैसेकै अगर कोई आदमी खुद कै बड़ो समजै है और बौ बड़ो ना है, तौ बौ खुद कै धोको देरओ है।

इफिसिऔ 2:20

तुम एक ऐंसो बनो भओ घर हौ जिसकी नीह खास चेलौ और नबिऔ के ऊपर खड़ी करी है और जिसको कौने को पत्‍थर खुद ईसु मसी है।

इफिसिऔ 3:8

मैं परमेसर के सबई पबित्‍तर लोगौ मै छोटे सै बी छोटो हौं, तब्बी मैंकै जौ बरदान मिलो कै मैं गैर यहूदी लोगौ कै कबी खतम ना होनै बारे मसी की बरकत की अच्‍छी खबर सुनाऔ।

कुलुसिऔं 1:29

इस मकसद कै पूरो कन्‍नै के ताँई मैं बाकी पूरी सकति के दुआरा जो मेरे भीतर मजबूती सै काम करै है, पूरे दिल सै कोसिस करकै बेसानी मैहनत करौ हौं।

1 तीमुथियुस 3:15

अगर मैंकै आनै मै देर होए तौ तुमकै जौ पतो होनो चँईऐ कै परमेसर के टब्बर के लोगौ को बरताब कैसो होनो चँईऐ। जौ टब्बर जिन्‍दे परमेसर के बिसवासिऔ की मंडली है, और सच्‍चाई की बुनियाद और खम्मा है।

1 यहून्‍ना 1:3

हमनै जो देखो और सुनो है, बौई हम तुमकै बताबै हैं, जिस्सै तुम हमरे संग अब्बा और बाके लौंड़ा ईसु मसी के साती बनौ।

परकासन 3:12

जो जीत जागो, उसकै मैं अपने परमेसर के मन्‍दर मै एक खम्मा बनांगो। और बौ फिर कबी बाहार ना लिकरैगो। मैं अपने परमेसर को नाम और अपने परमेसर के सैहर को नाम बाके ऊपर लिखंगो यानी नए ऐरूसलेम को नाम जो मेरे परमेसर के धौंरे सै सुरग सै उतरनै बारो है, और मैं अपनो नओ नाम बी बाके ऊपर लिखंगो।