2 कुरन्‍थियों 5:11 - बुक्सा

¹¹ परभु को डर मानते भए हम लोगौ कै समजानै की कोसिस करै हैं और परमेसर हमकै अच्‍छे ढंग सै जानै है, और मैं जौ उमीद करौ हौं कै तुमरो मन बी जौ बात जरूर जानै है।

2 कुरन्‍थियों 5:11 Mawu Ofanana

मत्‍ती 10:28

“उनसै ना डरौ, जो सरीर कै मार डारै हैं, पर आत्‍मा कै ना मार सकैं हैं; पर उस्सै डरौ, जो आत्‍मा और सरीर दौनौ कै नरक मै नास कर सकै है।

मत्‍ती 25:46

“फिर जे बुरे लोग हमेसा के ताँई सजा भुगतंगे, पर धरमी हमेसा की जिन्‍दगी मै परबेस करंगे।”

लूका 12:5

पर मैं तुमकै बता रओ हौं, तुमकै किस्सै डरनो चँईऐ, परमेसर सै डरौ, जो तुमकै मारकै नरक मै डान्‍नै की बी सकति रक्‍खै है। हाँ, मैं तुमकै बता रओ हौं, बस उसई सै डरौ।

लूका 16:31

इब्राहिम नै उस्सै कैई, अगर बे मूसा और परमेसर के नबिऔ की ना सुनै हैं, तौ फिर कोई मरे भएऔं मै सै बी जी उठै तौबी बे उसकी ना मानंगे।”

चेलौ के काम 13:43

और जब संगत की बैठक खतम हो गई तबई भौस्से यहूदी और यहूदी धरम माननै बारे बड़े लोग पौलुस और बरनबास के पिच्‍छे आए, और तबई उन्‍नै उनके संग बात करकै समजाओ कै परमेसर के किरपा मै बने रौह।

चेलौ के काम 18:13

और बोले, “जौ आदमी परमेसर की ऐंसी भक्‍ति कन्‍नी सिकाबै है, जो हमरे नियम के खिलाप है।”

चेलौ के काम 18:4

पौलुस आराम कन्‍नै बारे दिन यहूदी पिराथना घरौं मै जाकै और उनसै बैहसबाजी करकै यहूदी और यूनानी लोगौ कै समजाबै हो।

चेलौ के काम 19:26

तुमनै देखो और सुनो है कै बा पौलुस नै सिरप इफिसुस मै ना पर सिगरे एसिया के मुलक के लोगौ कै भड़का कै बैहका दओ है। और बानै कैई है कै, हात सै बनाए देबता सच्‍चे देबता ना हैं।

चेलौ के काम 26:26

हे राजा अगरिपा, मैं तेरे सामने बिना डरे बोल रओ हौं और तू खुद बी इन बातौं के बारे मै जानै है। मैंकै बिसवास है कै इन बातौं मै सै कुछ बी बात तेसै लुकी ना है। कैसेकै जौ घटना किसी कौने मै ना भई।

चेलौ के काम 28:23

तबई उन्‍नै बाके ताँई एक दिन ठैराओ और बहाँ भौस्से लोग इखट्‍टे भए जहाँ पौलुस रुको हो। पौलुस नै परमेसर के राज के बारे मै गभाई दई और मूसा के नियम और नबिऔ की किताबौ सै ईसु के बारे मै सुबे सै रात तक समजातो रैहओ।

2 कुरन्‍थियों 2:17

हम उन भौस्से लोगौ के हाँई ना हैं, जो परमेसर के बचनौ कै खुद के फाएदा के ताँई मिलाबट करै हैं। पर हम तौ परमेसर के बचनौ को परचार सच्‍चाई और ईसु मसी के हक सै और परमेसर की नजरौ के सामने करै हैं।

2 कुरन्‍थियों 5:20

इसताँई हम मसी के दूत हैं, और परमेसर हमरे दुआरा तुमकै समजाबै है। और हम मसी की ओर सै तुमसै बिनती करै हैं कै तुम परमेसर के संग मेल करौ।

2 कुरन्‍थियों 6:1

हम परमेसर के संग मिलकै काम कन्‍नै बारे साती हैं। इसताँई हम तुमसै बिनती करै हैं कै तुम परमेसर के किरपा कै बेकार ना जान दो।

गलातिऔ 1:10

का मैं आदमी की ओर सै अपनी बड़ाई चाँहौ हौं या परमेसर की? का मैं आदमिऔ कै खुस कन्‍नै के ताँई लगो रैहबौं हौं? अगर मैं अब तक लोगौ कै खुस करतो रैहतो तौ मैं मसी को सेवक ना होतो।

इफिसिऔ 5:21

मसी को डर मानते भए एक दूसरे के आधीन मै रौह।

इबरानिओ 10:31

जिन्‍दे परमेसर के हात मै पड़नो कितनी खतरनाक बात है।

इबरानिओ 12:29

कैसेकै हमरो परमेसर भसम कन्‍नै बारी आग है।

यहूदा 1:23

दूसरे लोगौ कै नरक की आग सै खैंच कै बचाऔ और डर के संग औरौं के ऊपर दया करौ; पर जो लोग सरीर की बुरी इच्‍छाऔं के हिसाब सै चलै हैं उनके लत्‍तौ सै बी नफरत करौ जिनके गलत कामौ के दाग उनके लत्‍तौ के ऊपर दिखाई देवै हैं।

परकासन 20:15

और जिस किसी को नाम जिन्‍दगी की किताब मै लिखो भओ ना मिलो, बौ आग की झील मै डारो जागो।