1 पतरस 4:11 - बुक्सा

¹¹ जिसकै परचार कन्‍नै को बरदान मिलो है तौ बाकै जौ बात पतो रैह, कै बौ परमेसर की ओर सै बोल रओ है; अगर किसी कै दूसरौं की सायता कन्‍नै को बरदान मिलो है तौ बौ बा सकति सै करै जो परमेसर सै मिलै है, और इन सिगरी बातौं मै ईसु मसी के दुआरा परमेसर कै महिमा मिलै। सिगरी महिमा और सकति युगौं-युगौं तक बाई की हो। ऐंसोई होए।

1 पतरस 4:11 Mawu Ofanana

मत्‍ती 6:13

और हमकै पाप मै ना पड़न दे, पर बुराई सै बचा, (कैसेकै राज और पराकरम और महिमा हमेसा तेरेई हैं। ऐंसोई होए)।

यहून्‍ना 13:31

बाके चले जानै के बाद ईसु नै कैई, “आदमी के लौंड़ा की अब महिमा भई और बाके दुआरा परमेसर की बड़ाई भई है।

चेलौ के काम 7:38

और जौ बौई मूसा है जिस्सै सिने पहाड़ मै सुरगदूत नै बात करी। बौई मूसा हमरे बापदादौं की मंडली के संग बियाबान मै हो और बाई नै हमकै सुनानै के ताँई परमेसर सै जिन्‍दे बचन पाए।

रोमियो 11:36

कैसेकै सब कुछ बनानै बारो बौई है। उसई सै सब कुछ टिको है और बौ उसई के ताँई है। उसकी महिमा हमेसा होती रैह! ऐंसोई होए।

रोमियो 12:3

कैसेकै मैं उस किरपा के दुआरा जो मैंकै देओ गओ है, तुम्मै सै हर एक कै कैबौ हौं, कै जैसो समजनो चँईऐ, उस सै जादा कोई बी अपने आपकै ना समजै, पर परमेसर नै हर एक कै जितनो जितनो बिसवास दओ है, बैसेई सोच समजनै के बाद अपने आपकै समजै।

रोमियो 16:27

उसी एक मात्‍तर बुद्‍धिमान परमेसर की, ईसु मसी के दुआरा, युगौं-युगौं तक महिमा होती रैह। ऐंसोई होए।

रोमियो 3:2

हर तरै सै भौत फाएदा है। पैले तौ जौ कै परमेसर के बचन उनकै सौंपे गए हैं।

1 कुरन्‍थियों 10:31

इसताँई तुम लोग चाँहे खाऔ-पिऔ, या जो कुछ बी करौ, सब परमेसर की बड़ाई के ताँई करौ।

1 कुरन्‍थियों 12:4

बरदान तौ भौस्से हैं, पर उन बरदानौ कै दैनै बारो आत्‍मा तौ एकई है।

1 कुरन्‍थियों 3:10

परमेसर के बा किरपा सै, जो मैंकै देओ गओ है। मैंनै समजदार राजमिस्तरी के हाँई नीह डारी, और दूसरो बामै लद्‍धा रखै है, पर हर एक आदमी चौकस रैह, कै बौ बामै कैसो लद्‍धा रखै है।

1 कुरन्‍थियों 6:20

कैसेकै परमेसर नै तुमकै मोल लेर खाओ है। इसताँई अपने सरीर के दुआरा परमेसर की इज्‍जत करौ।

2 कुरन्‍थियों 2:17

हम उन भौस्से लोगौ के हाँई ना हैं, जो परमेसर के बचनौ कै खुद के फाएदा के ताँई मिलाबट करै हैं। पर हम तौ परमेसर के बचनौ को परचार सच्‍चाई और ईसु मसी के हक सै और परमेसर की नजरौ के सामने करै हैं।

2 कुरन्‍थियों 9:13

तुमरो जौ सेवा को काम देक्‍कै बे परमेसर की बड़ाई करंगे कैसेकै तुम ईसु मसी की अच्‍छी खबर के हिसाब से चलौ हौ और बाके आधीन रैहबौ हौ और जो तुम परमेसर के लोगौ के ताँई और सबई के ताँई दान देवौ हौ, तौ बे जाके ताँई परमेसर को धन्‍नबाद करै हैं।

इफिसिऔ 1:19

और हम बिसवास कन्‍नै बारौ के भीतर काम कन्‍नै बारी बाकी महान सकति ऐंसी है जिसकी कोई थाह ना है बाकै बी जान सकैं।

इफिसिऔ 4:29

तुमरे मौह सै कोई बी गलत बात ना लिकरै, पर जरूरत के हिसाब सै बौई लिकरै जो उनके अग्गे बढ़ानै के ताँई अच्‍छो है जिस्सै कै उन सुन्‍नै बारौ के ऊपर उस्सै भलो होए।

इफिसिऔ 5:20

सिगरी बातौं मै हमरे परभु ईसु मसी के नाम सै अब्बा परमेसर को हमेसा धन्‍नबाद करते रौह।

इफिसिऔ 6:10

आखरी मै, परभु मै और बाकी सकति मै मजबूत बनौ।

फिलिप्‍पीऔ 1:11

और परमेसर की बड़ाई और तारीफ के ताँई तुम बा धारमिकता के फल सै भरपूर होते जाँय जो ईसु मसी के दुआरा मिलै है।

फिलिप्‍पीऔ 2:11

और पिता परमेसर की महिमा के ताँई सब आदमी जौ मान लंगे कै ईसु मसी ई परभु है।

कुलुसिऔं 4:6

तुमरी बोली हमेसा किरपा सै भरी और मीठी होए, जिस्सै कै तुमकै हर एक आदमी कै सई तरीका सै जबाब देनो आ जाय।

1 थिसलुनीकियौ 2:4

पर परमेसर नै हमकै अच्‍छी खबर कै सौंपनै के ताँई लायक समजो है। इसताँई हम लोगौ कै खुस कन्‍नै के ताँई ना पर हमरे दिल कै परखनै बारे परमेसर कै खुस कन्‍नै के ताँई सुनावै हैं।

1 तीमुथियुस 1:17

हमेसा राज कन्‍नै बारो राजा और कबी नास ना होनै बारो और जिसकै हम ना देख सकै हैं। बौ एकई परमेसर है और बाकी इज्‍जत और बड़ाई युगौं-युगौं तक है। ऐंसोई होए।

1 तीमुथियुस 6:16

सिरप बौई अमर है जो हमेसा की जोती मै रैहबै है, जिसकै किसी आदमी नै ना तौ कबी देखो है और नाई देख सकै है। बाकी इज्‍जत और सकति युगौं-युगौं तक रैह। ऐंसोई होए।

तीतुस 2:1

पर तू ऐंसी बात कैह कर, जो खरी सिक्‍छा के लायक हैं।

तीतुस 2:15

इन बातौं कै पूरे अधकार के संग कैह और समजातो, सिकातो और डाटतो रैह। जिस्सै कोई तेरी अनसुनी ना कर सकै।

इबरानिओ 13:7

जो तुमरे अगुबा हे, जिनौनै परमेसर को बचन तुमकै सुनाओ हो उनकै याद रक्‍खौ और धियान दो कै बे कैसे जीए और कैसे मरे और उनके बिसवास की नकल करौ।

इबरानिओ 5:12

तुमकै अबी तक तौ सिकानै बारो बन जानो चँईऐ। पर तुमरे ताँई तौ अबी बी ऐंसे लोगौ की जरूरत है जो तुमकै परमेसर के बचनौ को गियान सुरू सै दे सकैं। तुमकै रोटी ना चँईऐ पर छोटे बालक के हाँई दूदई चँईऐ है।

याकूब 1:19

हे मेरे पियारे भईयौ, जौ बात कै तुम जानलो कै हर एक आदमी सुन्‍नै के ताँई तईयार रैह और बोलनै मै जल्दबाजी ना करै, और नाई जल्दी सै घुस्सा करै।

याकूब 1:26

अगर कोई आदमी खुद कै धरमी समजै है, पर अपनी जबान मै लगाम ना लगाबै है, तौ बौ खुद कै धोको देवै है और बाकी भक्‍ति बेकार है।

1 पतरस 2:12

जो लोग बिसवासी ना हैं उनके बीच मै तुमरो चाल-चलन अच्‍छो रैह, चाँहे बे तुमरे ऊपर गलत काम कन्‍नै को इलजाम बी लगाऐ पर तुमरे भले कामौ कै देक्‍कै नियाय के दिन बे परमेसर की महिमा करैं।

1 पतरस 2:5

तुम बी खुद जिन्‍दे पत्‍थरौं के हाँई हौ और आत्‍मिक घर बनते जाबौ हौ, जिस्सै कै पुजारिऔं को पबित्‍तर समाज बनकै, ऐंसे आत्‍मिक बलिदान चढ़ाऔ, जो परभु ईसु मसी के दुआरा परमेसर कै परसन्‍द हौं।

1 पतरस 4:10

परमेसर की ओर सै जिसकै जो खास बरदान मिलो है, बाकै एक अच्‍छे भन्डारी के हाँई, एक दूसरे की सेवा के काम के ताँई लगाऐ।

1 पतरस 4:16

पर जो कोई मसी के नाम की बजै सै दुख झेलै है, तौ बौ सरमाऐ ना, पर बा नाम मै परमेसर की बड़ाई करै।

1 पतरस 5:11

बाकी सकति युगौं-युगौं तक रैह। ऐंसोई होए।

यहूदा 1:25

और बा एक मात्‍तर परमेसर की ओर सै जो हमकै मुक्‍ति दैनै बारो है, बाकी बड़ाई, महिमा, तागत और बाको अधकार जो हमरे परभु ईसु मसी के दुआरा पुराने जमाने सै हो रओ है और अबी बी है और युगौं-युगौं तक होतो रैहगो। ऐंसोई होए।