1 पतरस 2:11 - बुक्सा

¹¹ पियारे भईयौ, तुम परदेसी और यातरी हौ इसताँई मैं तुमसै बिनती करौ हौं कै तुम अपने सरीर की बुरी इच्‍छा सै बचे रौह जो आत्‍मा के बिरोद मै लड़ाई के ताँई उठै हैं।

1 पतरस 2:11 Mawu Ofanana

लूका 21:34

“इसताँई चौकस रैहऔ, कहीं ऐंसो ना होए कै तुमरो मन भोग-विलास, नसा और जा जिन्‍दगी की चिन्‍ताऔं के बोज सै दब जाय और बौ दिन फंदा के हाँई अचानक तुमरे ऊपर आ पड़ै।

चेलौ के काम 15:20

पर उनकै जौ बात लिखकै भेज देईओ कै बे ना तौ बैबिचार करैं, और ना मूरती मै चढ़ाओ भओ चढ़ाबो खाँय, और ना साँस गोट कै मारे भए जनाबर के मांस कै, और ना खून कै खाँय।

चेलौ के काम 15:29

“तुम बैबिचार ना करिओ और ना मूरतिऔं मै चढ़ाए भए चढ़ाबे कै खइओ और ना साँस गोट कै मारे भए जनाबर के मांस कै और खून कै ना खइओ। अगर तुम खुद कै इन बातौं सै बचाकै रखौगे तबई तुमरो भलो होगो, अग्गे अच्‍छो होए।”

रोमियो 12:1

इसताँई हे भईयौ, परमेसर की दया कै याद करबाकै मैं तुमसै बिनती करौ हौं, कै अपने सरीर कै जिन्‍दो, पबित्‍तर और जैसो परमेसर कै अच्‍छो लगै है बैसो बलिदान करकै चढ़ाऔ, और जौई तुमरे ताँई सई सेवा है।

रोमियो 7:23

पर मैं अपने सरीर मै दूसरे नियम कै काम करते देखौ हौं जौ मेरी मन के नियम सै लड़ाई करै है, और जो मैंकै पाप के नियम सै बांध लेबै है जो मेरे सरीर मै है।

रोमियो 8:13

कैसेकै अगर तुम सरीर के अनुसार दिन काटौगे, तौ मरौगे। और अगर आत्‍मा सै सरीर के बुरे कामौ कै मारौगे, तौ जिन्‍दे रैहओगे।

2 कुरन्‍थियों 5:20

इसताँई हम मसी के दूत हैं, और परमेसर हमरे दुआरा तुमकै समजाबै है। और हम मसी की ओर सै तुमसै बिनती करै हैं कै तुम परमेसर के संग मेल करौ।

2 कुरन्‍थियों 6:1

हम परमेसर के संग मिलकै काम कन्‍नै बारे साती हैं। इसताँई हम तुमसै बिनती करै हैं कै तुम परमेसर के किरपा कै बेकार ना जान दो।

2 कुरन्‍थियों 7:1

हे मेरे पियारे सातिऔं, जब हमकै जे बादे मिले हैं, तौ आऔ हम बा चीज कै सुद्‍द करैं जो हमरे सरीर और आत्‍मा कै असुद्‍द बनाबै हैं, और परमेसर को डर मानते भए पबित्‍तर बनौ।

गलातिऔ 5:24

और जो लोग मसी ईसु के हैं, उनौनै अपने सरीर कै गहरी इच्‍छा और बुरी इच्‍छा के संग कुरूस मै चढ़ा दओ है।

इफिसिऔ 2:19

इसताँई अब तुम परदेसी और पराए ना हौ पर पबित्‍तर लोगौ के संग एकई देस के और परमेसर के टब्बर के हो गए हौ।

इफिसिऔ 4:1

इसताँई मैं परभु मै होनै की बजै सै जेल मै हौं, और तुम लोगौ सै बिनती करौ हौं कै तुमकै अपनी जिन्‍दगी बैसेई जीनी चँईऐ जैसे परमेसर नै तुमकै बुलार खाओ है।

2 तीमुथियुस 2:22

जबानी की गलत इच्‍छा सै दूर भाज; और धारमिक जिन्‍दगी, बिसवास, पियार और सान्‍ति और उनके पिच्‍छे लगो रैह जो सुद्‍द मन सै परभु को नाम लेबै हैं।

इबरानिओ 11:13

जिन चीजौ को बादो करो गओ हो, बौ इन सबई लोगौ कै ना मिलो। पर उनौनै उनकै दूर सैई देखो और उनको सुआगत करो और जौ मान लओ कै हम जा धरती मै परदेसी और अनजाने हैं, जे सिगरे लोग बिसवास करते भए मर गए।

इबरानिओ 6:9

हे पियारे भईयौ और बहनौ, चाँहे हम इन बातौं कै कैरए हैं, पर हमकै पूरो भरोसो है कै तुम लोगौ की हालत इस्सै जादा अच्‍छी है और तुम मुक्‍ति की रस्ता मै चलौ हौ।

याकूब 4:1

तुमरे बीच मै लड़ाई और बैहसबाजी की बजै का है? कहीं जौ तुमरे भीतर की बुरी इच्‍छा की बजै सै तौ ना है?

1 पतरस 1:1

पतरस जो ईसु मसी को भेजो भओ चेला हो बाकी ओर सै, परमेसर के उन चुने भएऔं के नाम जो परदेसी होकै, पुन्‍तुस, गलातिया, कपदुकिया, एसिया और बिथुनिया इलाके मै सबई इतै-उतै रैहबै हैं।

1 पतरस 1:17

और अगर तुम, हर एक के करमौ के हिसाब सै बिना भेदभाब के नियाय कन्‍नै बारे परमेसर कै, हे अब्बा, कैह कै बुलाबौ हौ, तौ तुमकै अपनी जिन्‍दगी परदेसी के हाँई डरते भए काटनी चँईऐ।

1 पतरस 4:12

पियारे दोस्तौ, तुमकै परखनै के ताँई आगी हाँई दुख की घड़ी आई है और तुम ऐंसो सोचकै अचम्बो ना करिओ कै जौ तुमरे ताँई कोई अजीब बात है।

1 पतरस 4:2

ताकि अग्गे की जो जिन्‍दगी बची है बाकै लालच और पापी आदमी के हाँई ना पर जैसो परमेसर चाँहै है, बैसेई जीऐं।

2 पतरस 3:1

हे मेरे पियारे भईयौ, अब मैं जौ दूसरी चिट्‌ठी लिख रओ हौं। और इन दौनौ चिट्‌ठिऔ सै तुमकै याद दिब्बाते भए तुमरे सच्‍चे मन कै जगानो चाँहौ हौं।