Pilipai 4:8 - Panake Pi La: Ula: Buka pita: Kine Pieke Buka

⁸ Ya yankeke tonuo. Ya paeyaaso pita꞉ dupa alome. Ika꞉ honema꞉ mo epeke hau pita꞉la꞉ haumanu make mo yeiya꞉ lapeke ya꞉la꞉ haumanu make kota꞉ haumanu homeke hone u moneao hapa꞉peke. Dupiki hauna꞉ loa꞉me. Ota꞉ hau pita꞉la꞉eki leke tendepiki hau pita꞉la꞉eki tikitiki hau pita꞉la꞉eki aleta꞉ ma꞉nda꞉ na ta̱leke hau pita꞉la꞉eki hau seliapo seliapo pita꞉la꞉eki yole hau pita꞉la꞉ ekimanu make koto haumanu paeyao homeke hone u hamena꞉ alome.

Pilipai 4:8 Mawu Ofanana

Kini Pieke 18:19

I̱ma꞉ta꞉ ipikana꞉ma꞉ ipika꞉ weki titi make ipika꞉ monduma꞉ monduma꞉ pilia꞉ wekiwandikina꞉ wekiwandiki pa꞉ta꞉ make I̱ pa꞉ta꞉ homu pea tikitiki hau make ota꞉ hau make ota꞉ pia꞉pa꞉peke laa la halena꞉yeke ipiki ma̱leke lulume. Ikana꞉ma꞉ kutu pimika꞉na꞉ta꞉ kota꞉ I̱ma꞉ mo ipiki pa꞉ta꞉ pi la꞉ ua꞉ tupa꞉ hau paeyao peawalueke leekeme.

Ma꞉tiu 22:16

Mo hone pambao wimiki lota꞉ pita꞉la꞉ pi manuma꞉ ipiki tamuluekema꞉ ika꞉ disaipolo haliweki make Hetodi ame̱le̱ ta꞉ma꞉ni pieke haliweki make Yesu pa꞉ta꞉ tapaemekeme. Koto haliweki a꞉pa ipiki pa꞉ta꞉ alota꞉ Wala꞉la꞉ Halio. Neketa꞉ ota꞉ pimanu lo hala꞉ halie. Kutaa nakana꞉ma꞉ wanda꞉hali pa꞉ta꞉ hone ma꞉nda꞉ ma꞉nda꞉ na u hake iki paeyao pa꞉ta꞉ mandake hau piki wanda꞉halie laaka꞉na꞉ Koda꞉na꞉ ota꞉ hau pita꞉la꞉ pi homeke walo haleme la alota꞉

Maka 6:20

Hetodima꞉ta꞉ Dionina꞉ tiki tiki hau pu hayekeeki make yako piki hali make handeeke handaata꞉ ipiki pa꞉ta꞉ paala꞉ma꞉ homolo hata꞉ panka mea hao hayekeme. Dionima꞉ wala꞉tiki pieke pimanu Hetodima꞉ opua weiya꞉tiki piekepate ta꞉na꞉ma꞉ homa opua꞉tiki piekeme.

Luku 16:15

Koto ekina꞉ Yesuma꞉ iki pa꞉ta꞉ alo hata꞉ alota꞉ Ikita꞉ kenke wanda꞉halina꞉ leke popelekena꞉ ota꞉ epeke tupa꞉ haleme tapakema꞉ handolo pelemepate Koda꞉ma꞉ta꞉ ika꞉ puki hone paeyaota꞉ hone ula꞉me. Do kenke wanda꞉halima꞉ Ota꞉ hau tieke ale manue laa hone witeleme ale manuta꞉ Koda꞉na꞉ leke popelekena꞉ta꞉ pa pa alee hone ula꞉me leekeme.

Luku 2:25

Kutupa mo Diutuseleme da pa꞉ta꞉ta꞉ koke hali ma꞉nda꞉ Simioni hayekeme. Koto halima꞉ta꞉ Koda꞉ pa꞉ta꞉ paala꞉ma꞉ homa hata꞉ epeke hau pitolo hata꞉ make mo Isulai wanda꞉halina꞉ da꞉taalo pieke nate epena꞉ handeteke hao hayekeme. Ipikita꞉ Holi Sipitidi yaapo hayekeeki yolo hata꞉

Luku 23:50

Mo Diudia nane wieke daoni ma꞉nda꞉ A꞉ta꞉matia da hali Diosepe hayekeme. Ipikita꞉ ota꞉ epeke tiki tiki hau pu hake hali hao hata꞉ Koda꞉na꞉ Kilu Tombuao Hala꞉eki ipula꞉eki yu wia hao hayekeme. Ipikita꞉ mo Ka̱le̱sete haliweki ma꞉nda꞉ hondo hayekepate kone ipikana꞉ma꞉ mo haliweki ame̱le̱ apa꞉tao pimanu make hau ma꞉nda꞉ make na piekeme.

Dioni 7:18

Hali epima꞉ ipika꞉ hone wia pi lea꞉ka꞉na꞉ta꞉ kota꞉ ipika꞉ biki kone a꞉meiyaasa꞉me. Koto pa꞉la꞉pate hali epima꞉ ipika꞉ biki kone na a꞉meiyaake ipiki tapaala꞉ halina꞉ biki a꞉meiyaluekema꞉ pia꞉ka꞉na꞉ta꞉ kota꞉ koto halita꞉ yayapiki hau pita꞉la꞉ hali dia꞉me. Ota꞉ hau pita꞉la꞉ halie.

Aposolo 10:22

Mo haliwekima꞉ alota꞉ Koniliesita꞉ ami opisa epeke halima꞉ tapaeya꞉me laa ipikana꞉ma꞉ Koda꞉ pa꞉ta꞉ paala꞉ma꞉ homa꞉la꞉ halie laata꞉ Diu wanda꞉hali paeyaoma꞉ epeke pi lo hala꞉ halie. Kutupa Koda꞉na꞉ yako piki enisolo homekema꞉ leeke handa naka꞉ pimanu tonka꞉na꞉ opuluekema꞉ neke handa꞉ mulu pupe leeke handa ipuluma꞉me lemekeme.

Aposolo 22:12

Kutupa hali ma꞉nda꞉ A꞉na꞉naisita꞉ hande Lo Pimanu wotu opu hayeke hali make koto pa꞉ta꞉ haemeke Diu haliweki paeyaoma꞉ ipika꞉ pi lao hatiki pimiki hali I̱ pa꞉ta꞉ epoa꞉me.

Aposolo 6:3

Koto ekina꞉ kame titio. Hali paeyao watake hata꞉ hali Holi Sipitidima꞉ tumbula꞉ hali hone wopu u hala꞉ hali kutupa koto hali manuma꞉ do ne telipatiki pina꞉ mimika꞉na꞉ta꞉ nikana꞉ma꞉ mea haena꞉ lolumeke lemekeme.

Loma꞉ 13:13

Nikita꞉ natena꞉ pominoloma꞉ wanda꞉hali leke hata꞉ta꞉ popeke pa꞉la꞉ haumanu pumana꞉e. Hoke ikali naa keaaso hata꞉ yaala꞉ma꞉ na homeke haumanu make suseke haasa꞉ hau pamba na piki haumanu make a꞉nda꞉ pita꞉la꞉eki honditi pita꞉la꞉eki make kutupiki haumanu ikana꞉ma꞉ pea꞉peke na ya꞉la꞉me.

Loma꞉ 13:3

Epeke hau pu haleme wanda꞉halima꞉ta꞉ handeteke haleme you haliweki pa꞉ta꞉ paala꞉ma꞉ na homolo pelemepate hoke hau pu haleme wanda꞉halima꞉ta꞉ paala꞉ma꞉ homilimikie. Nakana꞉ma꞉ mo handeteke hala꞉ you hali pa꞉ta꞉ paala꞉ma꞉ na homolueke hone wika꞉na꞉ta꞉ kota꞉ epeke hau pu halipieki ipikana꞉ma꞉ handaata꞉ naka꞉ pi laalieke.

Loma꞉ 14:18

Kutupa hali epima꞉ Ketisona꞉ hau dupa peaeya꞉ka꞉na꞉ta꞉ kota꞉ Koda꞉ma꞉ ipiki pa꞉ta꞉ ta꞉na꞉ma꞉ homilieke. Kutupa wanda꞉halima꞉ make ipiki pa꞉ta꞉ epeke pita꞉la꞉me laa ipika꞉ pi laalimikie.

Loma꞉ 2:29

Ota꞉ Diu hali hala꞉ ekita꞉ puki pa꞉ta꞉ mea mendia hala꞉eki ota꞉ekie. Kutu piki halina꞉ puki pa꞉ta꞉ Koda꞉ma꞉ make amba꞉ hao hala꞉me. Kutu piki hauta꞉ Koda꞉na꞉ Sipitidima꞉ peaala꞉me. Hande wape peaala꞉ Lo Pimanu na peaala꞉me. Kutu piki halita꞉ wanda꞉halima꞉ ipika꞉ pi na laasemepate Koda꞉ma꞉ kone ipika꞉ pi laasa꞉me.

1 Kotindi 4:5

Koto ekina꞉ mo Tekehalina꞉ pi yokaalu pulu pa꞉la꞉ Nate epena꞉yeke handeteke hata꞉ta꞉ ikana꞉ma꞉ ma꞉nda꞉na꞉eki amba꞉la pi yokaalu na peke pa handeteke hapa꞉peke. Tekehalima꞉ epena꞉ yu wia hapa꞉peke. Ipikana꞉ma꞉ mo timba꞉ lekeeki pa꞉ta꞉ a꞉mbao ula꞉eki paeyaota꞉ pa̱a̱na꞉ mea wilieke. Kutupa wanda꞉halima꞉ puki nane panka꞉ ula꞉ honemanu ipikana꞉ma꞉ peneme yaalieke. Koto dina꞉ta꞉ Koda꞉ma꞉ wanda꞉hali paeyaoma꞉ pimi ekina꞉ yenkita꞉ ana꞉na꞉ mea꞉peke ekimanu handolo hata꞉ ikina꞉ pi la wilieke.

2 Kotindi 13:7

Ikana꞉ma꞉ ata꞉ka꞉ pikieki ma꞉nda꞉ na puemena꞉ laa nikana꞉ma꞉ Koda꞉ pa꞉ta꞉ yeni pu haloma꞉me. Kota꞉ nikita꞉ mo la handa꞉la꞉eki lombei puma꞉me laa waluekema꞉ dia꞉ya꞉la꞉me. Pate nikita꞉ lopo hake nono piomono kone ikita꞉ mo ota꞉ tikitiki piki hau puemena꞉ yeke loma꞉me.

2 Kotindi 6:8

Nate ma꞉nda꞉ nina꞉ta꞉ niki pa꞉ta꞉ yeiya꞉ laasa꞉ hau pu haleme make yaala꞉ peaasa꞉ hau make pu halememe. Kutupa make kitata pu haleme make nika꞉ biki mea mina꞉liao halememe. Kutupa make nikita꞉ yayapiki pi lo haleme haliwekie lo halemepate nikana꞉ma꞉ta꞉ ota꞉ pi homeke lo haloma꞉me.

2 Kotindi 8:18

Ipiki yaapota꞉ mo kame ma꞉nda꞉ ipikita꞉ siosi paeyao pa꞉ta꞉ ipika꞉ mo pi seliapo wala꞉la꞉ ekina꞉ ota꞉ epeke halie lo haleme kame tapaasoma꞉me.

2 Kotindi 8:21

Nika꞉ hone homeke homeketa꞉ ota꞉ tikitiki hau homeke puluekema꞉ hone witoloma꞉me. Ota꞉ Koda꞉na꞉ leke popelekena꞉ homeke dia꞉ya꞉la꞉pate pa kenke wanda꞉halina꞉ leke popelekena꞉ make loa꞉me.

Ka꞉leisia 5:22

Koto pa꞉la꞉pate mo Holi Sipitidima꞉ta꞉ epeke haumanu dupa peawaasa꞉me. Pukima꞉ homa꞉la꞉ hau make puki tukiki nane ota꞉ ta꞉na꞉ma꞉ homa꞉la꞉ hau make puki lopaasa꞉ hau make homu pea yu wia hala꞉ hau make a꞉ta꞉ma꞉ homolo epeke pita꞉la꞉ ekima꞉ ma꞉nda꞉ tamba꞉ mina꞉la꞉ hau make hone tulao hata꞉ e poka꞉la꞉ hau make

Epesese 4:25

Koto ekina꞉ yayapiki pi ala꞉eki paapa꞉peke. Nikita꞉ Ketiso ipika꞉ lokena꞉ tunao homekeeki yolo hata꞉ nika꞉ kame pa꞉ta꞉ ota꞉ pi la꞉tiki pulumeke.

Epesese 5:9

Mo hande pa̱a̱ pita꞉la꞉ ekima꞉ peaasa꞉ hau manuta꞉ dupae. Epeke hau pita꞉la꞉ ekimanu make tikitiki hau pita꞉la꞉ ekimanu make ota꞉ hau pita꞉la꞉ ekimanu make peaasa꞉me.

Epesese 6:14

Koto ekina꞉ tiao hata꞉ tikitiki yao hapa꞉peke. Ika꞉ hako yameleme ekita꞉ ota꞉ hau pita꞉la꞉eki yama꞉pa꞉peke. Ika꞉ hakoko a꞉mbaasa꞉ hanka꞉ta꞉ tikitiki hau pita꞉la꞉ ekima꞉ a꞉mbaapa꞉peke.

Pilipai 3:1

Ya Ketiso yankeke tonuo. Ya pi lo paeyaaluekema꞉ta꞉ dupa alome. Ikana꞉ma꞉ mo Tekehali pa꞉ta꞉ tunao hata꞉ta꞉ ta꞉na꞉ma꞉ homo hapa꞉peke. Amba꞉ hande wape pua꞉eki paa wape puluekema꞉ soka꞉la꞉ na pa꞉la꞉pate iki lopaama꞉na꞉ sa꞉sa꞉ pina꞉e hone witolo ekina꞉ paa wape pitolome.

Kolosi 4:5

Mo hone na tulaaleme wanda꞉hali pa꞉ta꞉ta꞉ ika꞉ piteleme hau manuta꞉ hone wopu u lenkena꞉ pea pea꞉pa꞉peke. Iki pa꞉ta꞉ waleke wita꞉la꞉eki paeyao epea꞉ka꞉na꞉ta꞉ iki na pakalaena꞉ leke epeke tupa꞉ mina꞉pa꞉peke.

1 Desalonaika 4:12

Kutu pu haemeka꞉na꞉ta꞉ mo pi na miki wanda꞉halima꞉ handolo hata꞉ iki pa꞉ta꞉ epeke hone wilimikie. Kutupa make ma꞉nda꞉ma꞉ peaena꞉e hone na wiki ika꞉ honumake kone handeteke hapeke yelieke.

1 Timodi 3:11

Koto haliwekina꞉ wanda꞉wekima꞉ make ika꞉ta꞉ epeke hone manuma꞉ tekele tekele pea hata꞉ pi la la na piki wanda꞉weki halimikie. Epeke hone wia hoto paeyao ika꞉ hau pita꞉ pi yaapoma꞉ ota꞉ hau homeke pu hapeke yeke wanda꞉weki halimikie.

1 Timodi 3:4

Ipikana꞉ma꞉ ipika꞉ wekiwanda꞉ wopu handeteke hata꞉ make ipika꞉ wekiwandikima꞉ ipiki pa꞉ta꞉ epeke hone wia ipika꞉ pi opina꞉ lelieke.

1 Timodi 4:12

Wanda꞉halima꞉ neke wekihali hale ekina꞉ handolo hata꞉ ipikita꞉ pa wekie laama꞉na꞉ nakana꞉ma꞉ ota꞉ Ketiso hau moka꞉la꞉ tiaapeke. Koto puluekema꞉ta꞉ naka꞉ pilipi hauma꞉ make naka꞉ lelipi pima꞉ make naka꞉ pukima꞉ homilipi ekima꞉ make naka꞉ hone tulalipi ekima꞉ make naka꞉ tikitiki piki hauma꞉ make koto hau paeyaota꞉ mo pi mineleme wanda꞉halima꞉ ota꞉ handena꞉ lapeke.

1 Timodi 5:10

wanda꞉halima꞉ epeke hau pia꞉ wanda꞉e aleme wanda꞉ make ipika꞉ wekiwandiki epeke tupa꞉ handeteke haya꞉ wanda꞉ make na handeke da ma꞉nda꞉ wanda꞉hali epemeke handa꞉mea wamo pia꞉tiki pieke wanda꞉ make Ketiso yankeketonu oto nane hata꞉ tamba꞉ mieke wanda꞉ make ka꞉nda꞉ mina꞉la꞉ wanda꞉hali petelea꞉ wanda꞉ make epeke haumanu puluekema꞉ hone wopu u hayeke wanda꞉ make kosa꞉piki wanda꞉ homekema꞉ koto hau paeyao tonka꞉na꞉ apa꞉tao pea꞉tiki pieki handemeka꞉na꞉ta꞉ kota꞉ ipika꞉ biki wape pea꞉peke.

1 Timodi 5:2

Koke wanda꞉weki make naka꞉ ama꞉ tupa꞉ kone handeteke hata꞉ta꞉ panake wanda꞉weki make naka꞉ ana꞉ leke tikitiki piki hauma꞉ homeke handeteke hapeke.

Taitasi 1:8

Ipika꞉ da pa꞉ta꞉ta꞉ kimisu wanda꞉hali pambolo opolo pina꞉ ala꞉ hali make epeke hau pita꞉la꞉ ekita꞉ ta꞉na꞉ma꞉ homa hone wotu wita꞉la꞉ hali make ipika꞉ hone pa꞉ta꞉ kone ana꞉e ala꞉ hali make tikitikina꞉ hala꞉ hali make yakopiki hali make ipika꞉ loke handeteke hala꞉ hali make hapeke yelieke.

Taitasi 2:14

Ketiso ipikita꞉ nikina꞉ homeekeme. Kutu pieke ekima꞉ta꞉ nikita꞉ mo hoke hau pa꞉ta꞉ haomeke yoka꞉ muluekema꞉ make ipika꞉ epeke hauna꞉ puawee hone pa꞉la꞉ yako piki wanda꞉hali homeke hamono yeke piekeme.

Taitasi 2:2

Keileke haliweki pa꞉ta꞉ Mo hoke ikali naa keaapeke na ya꞉la꞉me laata꞉ ikana꞉ma꞉ epeke hau pa꞉ta꞉ tikitiki piki hone witolo make mo ika꞉ hone wopu handeteke hata꞉ ika꞉ hone tulalemeeki make pukima꞉ homelemeeki make kutupa mo ika꞉ puki taka꞉laasa꞉ hau pitolo pitolo haleme hau make kota꞉ hau paeyaona꞉ ala꞉ta꞉ na ta̱lena꞉ leke epeke tupa꞉ hapa꞉peke laa wala꞉peke.

Taitasi 2:7

Naka꞉ kone naka꞉ pilipi hau paeyaota꞉ wanda꞉halima꞉ handaa honda꞉mea pu haena꞉ epeke hau seliapomanu pu hapeke. Naka꞉ pi wala꞉la꞉ hauna꞉ hone wopu wia mo hapeke pitiki pimanu homeke walo hapeke.

Taitasi 3:14

Nika꞉ Ketiso tapakema꞉ a꞉pa꞉la꞉ haumanu puluekema꞉ ikana꞉ma꞉ mo ika꞉ nate leke epeke tupa꞉ handeteke hata꞉ pina꞉ moka꞉la꞉ tiatiki pea꞉pa꞉peke alee. Kutupa make mo wanda꞉halina꞉ ka꞉nda꞉ma꞉ homa꞉la꞉eki handa꞉ peteluekema꞉ ikana꞉ma꞉ mo napeke na pitiki epe na piki haumanu leke na pea꞉peke ya꞉la꞉me.

Hibulu 11:2

Amba꞉ kiake haemeke wanda꞉hali ika꞉ hone tulao hao haemeke ekina꞉ta꞉ Koda꞉ma꞉ iki pa꞉ta꞉ ta꞉na꞉ma꞉ homo hayekeme.

Hibulu 13:18

Koda꞉ma꞉ niki tamba꞉ mina꞉ yeni na mina꞉pa꞉lake wopu peao hapa꞉peke. Nikana꞉ma꞉ hoto paeyao ota꞉ tikitiki piki hau puluekema꞉ taapo haloma꞉me. Koto ekina꞉ nika꞉ hone teketa꞉ Koda꞉na꞉ leke popelekena꞉ ota꞉ tikitiki pa꞉la꞉me hone witoloma꞉me.

Dia꞉mesi 1:27

Hoe ma꞉nda꞉ na piki ota꞉ Ketiso tikitiki hauta꞉ nika꞉ Apa꞉ Koda꞉ma꞉ta꞉ dupae ala꞉me. Pa haleme weki wandiki make kineke wanda꞉sunu make ika꞉ ka꞉nda꞉ma꞉ homelemeeki handaata꞉ tamba꞉ mina꞉la꞉eki mea꞉peke ya꞉la꞉me. Kutupa make mo kenke hauma꞉ na hoeyaena꞉ aloma꞉ ekina꞉ ala꞉me.

Dia꞉mesi 3:17

Kutu pita꞉la꞉pateta꞉ oli ya nanema꞉ ipula꞉ hone epekeeki dupae. Titina꞉ amba꞉la kipabaake hone wita꞉la꞉ekie. Kutupa make puki lopa꞉niao pila꞉eki make yopu hala꞉eki make homu pea hala꞉eki make a꞉ta꞉ma꞉ wopu homolo hata꞉ epeke haumanu pita꞉la꞉eki make paeyao ya nanema꞉ ipula꞉pateta꞉ honditi pita꞉la꞉eki make yayapiki hau pita꞉la꞉eki make apa꞉tao na ipula꞉me.

1 Pida 1:22

Koda꞉na꞉ ota꞉ pi opua pu haleme ekima꞉ta꞉ ika꞉ temoko yako pina꞉ lelememe. Ame ika꞉ Ketiso yankeke ota꞉ pukima꞉ homa halememe. Koto pelemepate ika꞉ puki paeyaoma꞉ pukima꞉ ota꞉ homa꞉ alualu pu hapa꞉peke.

1 Pida 2:12

Ikana꞉ma꞉ pi na ma꞉la꞉ wanda꞉hali taapuna꞉ ota꞉ epeke hau pu hapa꞉peke. Kutu pimikina꞉ta꞉ hande pi na ma꞉la꞉ wanda꞉halima꞉ iki biki hoeyaaluekema꞉ taapilimipate ika꞉ epeke piteleme ekimanu pa꞉ta꞉ handilimikie. Koto ekina꞉ koto wanda꞉halima꞉ta꞉ hande la꞉ ula꞉ nate epea꞉ka꞉na꞉ta꞉ Koda꞉na꞉ biki a꞉meiyalimikie.

1 Pida 4:8

Pukima꞉ homa꞉la꞉ ekima꞉ta꞉ hoke hau eleke eleke a꞉mbao haleke handa ika꞉ titina꞉ hauta꞉ pukima꞉ ota꞉ wopu homa꞉ alualu pu hapa꞉peke.

2 Pida 3:1

Yaka yankeke tonuo. Dota꞉ iki pa꞉ta꞉ yaka yaapo peao tameiya꞉ tapaasome. Do tameiya꞉ yaapo telipuna꞉ pa꞉ta꞉ta꞉ ika꞉ hone pa꞉ta꞉ hakepiki honemanu mea tialuekema꞉yeke do haumanu paa hone u tiaasome.

1 Dioni 3:18

Yaka wekiwandikio. Nika꞉ pukima꞉ homoloma꞉ ekita꞉ kakema꞉ homeke o pima꞉ homeke lapeke na ya꞉la꞉me. Dia꞉me. Koto pukima꞉ homa꞉la꞉ ekima꞉ta꞉ pa mo ota꞉eki peneme yaena꞉ nika꞉ kikima꞉ pitolo hata꞉ homekee.

1 Dioni 3:3

Pea꞉ epima꞉ Ketiso pa꞉ta꞉ dupiki hone puao haya꞉ka꞉na꞉ta꞉ kota꞉ koto somema꞉ mo Ketisota꞉ ala꞉ta꞉ ma꞉nda꞉ na ta̱lolo hata꞉ pa yako peaa hala꞉ tupa꞉ ipiki make ha̱i̱ peaama꞉na꞉ pa yako peatiki pu hala꞉me.

1 Dioni 4:1

Yaka pukipiki ta꞉ma꞉ni sunuo. Mo Koda꞉na꞉ Sipitidi moloma꞉me aleme wanda꞉hali paeyao pa꞉ta꞉ hone na tulaake pa ika꞉ ekita꞉ Koda꞉ pa꞉ta꞉ yama꞉ a꞉pa꞉la꞉pe laa amba꞉la handaa handa꞉pa꞉peke. Pa ekipeke mo makeaaso potopede hali paeyaota꞉ mo kenke honiki paeyao pa꞉ta꞉ pelemeke loa꞉me.