Pilipai 2:9 - Panake Pi La: Ula: Buka pita: Kine Pieke Buka

⁹ Koto haumanu piekeeki tekena꞉ta꞉ Koda꞉ma꞉ Yesuta꞉ ota꞉ paeyaona꞉ titina꞉ hali haena꞉ mea a꞉meiyao ota꞉ biki paeyao lombeipiki biki kone haleekeme.

Pilipai 2:9 Mawu Ofanana

Kini Pieke 3:15

Kutupa I̱ma꞉ neketa꞉ mo wanda꞉ yaapo a꞉nda꞉ tunkula꞉ alu peao ipika꞉ monduma꞉ monduma꞉ pilia꞉ wekiwandikima꞉ make naka꞉ ekima꞉ make a꞉nda꞉ tunkula꞉ alu alu pu haena꞉ lolueke. Ipikana꞉ma꞉ naka꞉ you da꞉ka꞉pa꞉ tombuaeya꞉ka꞉na꞉ta꞉ nakana꞉ma꞉ ipika꞉ anke kinuku handulu nelipikie leekeme.

Ma꞉tiu 11:27

Ala꞉ta꞉ ala꞉ta꞉ paeyaota꞉ ya Apa꞉ma꞉ I̱ pa꞉ta꞉ amba꞉ ka꞉la꞉me. Eiyeketa꞉ hali ma꞉nda꞉ma꞉ ota꞉ na handa꞉la꞉pate Apa꞉ma꞉ homeke handa꞉la꞉me. Koto mandake tupa꞉ kone Apa꞉ta꞉ hali ma꞉nda꞉ma꞉ ota꞉ na handa꞉la꞉pate Eiyekema꞉ homeke handa꞉la꞉me. Koto pa꞉la꞉ ekina꞉ mandane wanda꞉halima꞉ make Ateke handena꞉ Eiyekema꞉ iki ma̱leke lia peneme yaeya꞉ka꞉na꞉ta꞉ handilimikie.

Ma꞉tiu 28:18

Yesuma꞉ teke pa꞉ta꞉ opolo ipulu iki pa꞉ta꞉ alota꞉ Mo hepeni handeteke hapeke wele make do kenke handeteke hapeke wele make Koda꞉ma꞉ I̱ pa꞉ta꞉ ka꞉la꞉me.

Luku 10:22

Yaka Apa꞉ma꞉ta꞉ ala꞉ta꞉ ala꞉ta꞉ paeyao sikita꞉ I̱ pa꞉ta꞉ ka꞉la꞉me. Mo Eiyeketa꞉ ma꞉nda꞉ma꞉ hone na ula꞉pate ipika꞉ Atekema꞉ homeke hone ula꞉me. Kutupa Ateketa꞉ ma꞉nda꞉ma꞉ hone na ula꞉pate ipika꞉ Eiyekema꞉ homeke hone ula꞉me. Kutupa make mo Eiyekema꞉ ipika꞉ hone pilia꞉ wanda꞉hali pa꞉ta꞉ta꞉ ipika꞉ Ateke walea꞉ka꞉na꞉ta꞉ kota꞉ ikana꞉ma꞉ homeke Ateke hone wilimikie leekeme.

Dioni 13:3

Yesuma꞉ta꞉ hande ipika꞉ Atekema꞉ ala꞉ta꞉ ala꞉ta꞉ paeyao ipiki pa꞉ta꞉ haleekeeki make ipikita꞉ Koda꞉ yaapo hao a꞉pa Koda꞉ pa꞉ta꞉ polo piekeeki make hone wiekeme.

Dioni 17:11

Ameta꞉ I̱ta꞉ do kenkena꞉ pa na hake neke pa꞉ta꞉ epolo polopate do haliwekita꞉ do kenkena꞉ pa ha pelia halimikie. Yako piki Apa꞉o. Nakana꞉ma꞉ I̱ pa꞉ta꞉ ki bikita꞉ koto bikina꞉ welema꞉ iki handeteke haena꞉ lapeke. Dikita꞉ homeke kone halopa꞉ tupa꞉ iki make homeke tupa꞉ haena꞉yeke loa꞉me.

Dioni 17:12

I̱ta꞉ do haliweki ame̱le̱ hata꞉ta꞉ nakana꞉ma꞉ I̱ pa꞉ta꞉ ki bikita꞉ koto bikina꞉ welema꞉ kone iki wotu handeteke haowa꞉me. I̱ma꞉ iki handeteke haowa꞉ pita꞉ta꞉ hali ma꞉nda꞉ na alu pia꞉pate pa mo Baibolo buka pa꞉ta꞉ wape pa꞉la꞉eki yaena꞉yeke hande alu pulu pa꞉la꞉ hali homekee.

Dioni 17:5

Apa꞉o. Amba꞉ do kenke a̱i̱ na wepiki hata꞉ neke yaapo hata꞉ mua꞉ pa̱a̱ piki kapu tieketa꞉ kotoeki kone ameta꞉ naka꞉ leke popelekena꞉ hano kie.

Aposolo 5:31

Koda꞉ma꞉ Yesu paa mea tiaota꞉ ipikita꞉ Titina꞉ Pula꞉ Hali make Da꞉taasa꞉ Hali make ipika꞉ popeke kiki nane haena꞉ laata꞉ Isulai wanda꞉halima꞉ hone ma꞉nda꞉ la꞉ka꞉la mina wiaata꞉ ika꞉ hoke hau peleme ekimanu pa tumbaena꞉yeke piekeme.

Epesese 1:10

Koda꞉ma꞉ ipika꞉ hone u hala꞉ ekita꞉ dupae. Kenke ya yaapo nane ula꞉ ale hala꞉ ekimanu paeyaota꞉ hande Koda꞉ma꞉ wepia haena꞉ la꞉la꞉ ekimanu paeyao ipikana꞉ma꞉ mea momba꞉laota꞉ kutupa Ketisota꞉ you haena꞉ lelieke. Ipika꞉ di tunkulia꞉ka꞉na꞉ta꞉ Koda꞉ma꞉ koto hau pu paeyaalieke.

Kolosi 1:18

Ipikita꞉ ipika꞉ lokena꞉ you halie. Mo siosina꞉ loa꞉me. Ipikita꞉ mo lokena꞉ da꞉ta꞉la꞉ ekina꞉ tekee. Ipikita꞉ mupeke weki hata꞉ homeekepate paa mea tiaeyeke ekita꞉ ipiki homeke mo ale paeyaona꞉ titina꞉ hali haena꞉yeke piekeme.

2 Desalonaika 1:12

Koda꞉ma꞉ kutu pia꞉ka꞉na꞉ta꞉ ikana꞉ma꞉ nika꞉ Tekehali Yesuna꞉ biki yeiya꞉ lalimikie. Kutupa ipikana꞉ma꞉ iki make kutu pilieke. Kutupa nika꞉ Koda꞉ make Tekehali Yesu Ketiso ipilika꞉ a꞉ta꞉ma꞉ homolo tamba꞉ minelepe ekima꞉ta꞉ koto tupa꞉ pilipipikie.

Hibulu 1:4

Koda꞉na꞉ Eiyeke ipika꞉ bikita꞉ mo enisolo tonuna꞉ biki lombei piki biki mieke tupa꞉ ipiki make mo enisolo tonu lombei pao hayekeme.

Hibulu 1:9

Nakana꞉ma꞉ta꞉ epeke hau pa꞉ta꞉ta꞉ puki wopu pelepate hoke hau pa꞉ta꞉ta꞉ honditi wopu peleme. Koto ekima꞉ta꞉ Koda꞉ naka꞉ Koda꞉ hata꞉ neke mea mo naka꞉ yankeke tonu lombei piki some halena꞉ tombo kitolo hata꞉ ta꞉na꞉ peaasa꞉ honku naka꞉ kitawaya꞉me leekeme.

Hibulu 12:2

Kutu puluekema꞉ta꞉ kota꞉ Yesuta꞉ nika꞉ hone tulaasa꞉ ekina꞉ kini pu mea pua ana꞉ lawalo pa꞉la꞉ teke hali hala꞉ ekina꞉ ipiki homeke handa꞉ paleke pomana꞉e. Ipikana꞉ma꞉ mo hande a꞉ka꞉tei wape piki ti yeke handaata꞉ pa pina꞉ na kiaeyekeme. Dia꞉me. Ipika꞉ pua mulu pieke ta꞉na꞉ma꞉ homa꞉la꞉ hau tieke handeeke ekima꞉ mo hande a꞉ka꞉tei wape piki tina꞉ homa꞉peke ekina꞉ yaala꞉ mea꞉peke ekina꞉ta꞉ hone ma꞉nda꞉ na wiekeme. Kutaa ameta꞉ ipikana꞉ma꞉ Koda꞉na꞉ pila꞉ ale tieke popeke nanema꞉ tilao pila꞉me.

Hibulu 2:9

Pate pa Yesu handoloma꞉me. Ipikana꞉ma꞉ Koda꞉na꞉ a꞉ta꞉ma꞉ homa tamba꞉ mina꞉la꞉eki pa꞉ta꞉ yama꞉ wanda꞉halina꞉ anketeke mea homaena꞉ Koda꞉ma꞉ ipiki enisolo manuna꞉ oto nane hosiki haena꞉ leekeme. Pate ameta꞉ nika꞉na꞉ tanda tieke mea homeeke yekema꞉ koto ekima꞉ta꞉ Koda꞉ma꞉ mo yeiya꞉ laasa꞉eki tieke pita꞉ pa̱a̱ peaasa꞉eki tieke yaapo ipiki pa꞉ta꞉ dopuaeyeke ekita꞉ handoloma꞉me.

1 Pida 3:22

Koto Ketisota꞉ ame hepeni tukiki pa꞉ta꞉ pua Koda꞉na꞉ popeke nane hata꞉ mo enisolo haliweki make hepeni nane haleme you haliweki make mo wele pita꞉la꞉ ekimanu make iki paeyao ipikana꞉ma꞉ handeteke hala꞉me.

2 Pida 1:17

Mo hande Koda꞉ Apa꞉ma꞉ Yesu pa꞉ta꞉ pa̱a̱ pa꞉la꞉eki pita꞉ yeiya꞉ laasa꞉eki yaapo halea꞉ natena꞉ta꞉ nikita꞉ koto pa꞉ta꞉ hamono pia꞉me. Koto dina꞉ta꞉ mo pa̱a̱ wopupiki Koda꞉na꞉ pi ho̱la̱꞉makema꞉ alo hata꞉ alota꞉ Dota꞉ ya pukipiki wekie. I̱ma꞉ ipiki pa꞉ta꞉ ta꞉na꞉ma꞉ wopu homolome laa pi la꞉niaeya꞉me.

3 Dioni 1:7

Pa ekipeke ikana꞉ma꞉ta꞉ mo hone na tulaaleme wanda꞉halina꞉ tamba꞉ mina꞉la꞉ ekita꞉ kiaaso hata꞉ Ketisona꞉ e pokaaluekema꞉ ika꞉ kone kini pimime.

Peneme Yaeyekeeki 1:5

Kutupa make mo Koda꞉na꞉ pi ota꞉ tupa꞉ laasa꞉ hali mo hande homa꞉la꞉eki bepolao tiaeyeke titina꞉ hali make do kenke honiki paeyaona꞉ kini haliwekina꞉ handeteke hala꞉ hali Yesu Ketisoma꞉ make homeke hau kone pina꞉e. Ipikana꞉ma꞉ta꞉ niki pukima꞉ homo hala꞉me. Ipika꞉ a꞉ka꞉tei wape piki tina꞉ lopeeke wema꞉ta꞉ nika꞉ hoke hau pa꞉ta꞉ niki ka꞉la꞉pa꞉ tapaala꞉me.

Peneme Yaeyekeeki 11:15

Kutupa mo watake hata꞉ enisoloma꞉ ipika꞉ bu kanake lia꞉ dina꞉ta꞉ oli hepeni nane pi ho̱la̱꞉make tieke tieke manuma꞉ alota꞉ Mo kenke handeteke halo pa꞉la꞉ honkoputa꞉ ameta꞉ nika꞉ Tekehali pita꞉ ipika꞉ ma̱leke lila꞉ hali Ketiso pa꞉ta꞉ ula꞉me. Kutupa hoto paeyao handeteke hao halieke lememe.

Peneme Yaeyekeeki 19:16

Ipika꞉ aka꞉ hokuluna꞉ make ipika꞉ palekena꞉ maketa꞉ biki dupa laeya꞉me. Kini paeyaona꞉ kinie laa Tekehali paeyaona꞉ Tekehalie.

Peneme Yaeyekeeki 3:21

Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ I̱ ame̱le̱ mo yaka kini seana꞉ lopulao pitulupeke. I̱ma꞉ta꞉ bepolaota꞉ ameta꞉ yaka Apa꞉na꞉ kini seana꞉ lopulao pilupa꞉ tupa꞉ loa꞉me lea꞉me.

Peneme Yaeyekeeki 5:12

Kutupa pi ho̱la̱꞉make anekema꞉ emeli alo alota꞉ Mo hande lia꞉ Sipisipi Ma꞉na꞉ Ikikima꞉ta꞉ wele make hamoko make hone u tiaasa꞉eki make honkopu make biki miniliaasa꞉eki make pa̱a̱ pikieki make yeiya꞉ laasa꞉eki make paeyao mea꞉peketa꞉ ana꞉ pa꞉la꞉me lemekeme.