Pilipai 2:3 - Panake Pi La: Ula: Buka pita: Kine Pieke Buka

³ Kutupa make naka꞉ honumake homeke hone witolo o honumake hau o handaena꞉ hau ma꞉nda꞉ na pea꞉pa꞉peke. Kotoeki na pikita꞉ iki paeyao homu pu alualu pea hata꞉ ma꞉nda꞉ pa꞉ta꞉ ika꞉ hauma꞉ta꞉ nika꞉ hau lombei pa꞉la꞉me laa hone u hapa꞉peke.

Pilipai 2:3 Mawu Ofanana

Luku 18:14

Yesuma꞉ alota꞉ I̱ma꞉ iki pa꞉ta꞉ dupa la kitolome. Mo hande Pa꞉tisi halita꞉ da la꞉ka꞉la peeketa꞉ Koda꞉ yaapo halepe ekita꞉ tikitiki na pa꞉la꞉pate pa mo dakisi mu hala꞉ halita꞉ tikitiki pa꞉la꞉me. Pa ekipeke. Ma꞉nda꞉ epima꞉ ipikita꞉ aneke hali au lea꞉ka꞉na꞉ta꞉ kota꞉ Koda꞉ma꞉ ipikita꞉ mina꞉nialieke. Kutupa ma꞉nda꞉ epima꞉ ipika꞉ kone panda꞉ puniaya꞉ka꞉na꞉ta꞉ kota꞉ koto someta꞉ Koda꞉ma꞉ tieke au lalieke leekeme.

Loma꞉ 12:10

Ikana꞉ma꞉ ika꞉ Ketiso kametiti ame̱le̱ ika꞉ kone pukima꞉ homa alualu pea hapa꞉peke. Kutupa ika꞉ ika꞉ kone lu mina꞉nia alualu puluekema꞉ taapo hapa꞉peke.

Loma꞉ 13:13

Nikita꞉ natena꞉ pominoloma꞉ wanda꞉hali leke hata꞉ta꞉ popeke pa꞉la꞉ haumanu pumana꞉e. Hoke ikali naa keaaso hata꞉ yaala꞉ma꞉ na homeke haumanu make suseke haasa꞉ hau pamba na piki haumanu make a꞉nda꞉ pita꞉la꞉eki honditi pita꞉la꞉eki make kutupiki haumanu ikana꞉ma꞉ pea꞉peke na ya꞉la꞉me.

Loma꞉ 2:8

Kutu piliepate mandane wanda꞉halima꞉ta꞉ ika꞉ hone pa꞉la꞉ ekimanu pu hao pa epeke hau pea꞉pa꞉pekeeki kiao hokeeki kone pu halememe. Kutu piki wanda꞉hali pa꞉ta꞉ Koda꞉ma꞉ mineke pankolo hata꞉ hoke yenki halieke.

1 Kotindi 15:9

Mo aposolo haliweki ame̱le̱ hata꞉ I̱ta꞉ ota꞉ hosiki halisiki halome. Koto biki muluekema꞉ epeke hali na haowa꞉me. I̱ma꞉ta꞉ Koda꞉na꞉ siosi wanda꞉hali pa꞉ta꞉ tanda tieke haloa꞉ ekina꞉ loa꞉me.

1 Kotindi 3:3

Ikana꞉ma꞉ ne tunkula꞉la꞉ haumanu make ape ala꞉ ekimanu make kutupiki haumanu piteleme ekita꞉ mo kenke wanda꞉halima꞉ pu haleme tupa꞉ kone pitelememe.

2 Kotindi 12:20

I̱ koto pa꞉ta꞉ opolo epoa꞉ka꞉na꞉ta꞉ ikita꞉ dupiki wanda꞉hali a꞉pa handulueke hone wia ipulua꞉pate pa ikita꞉ ta꞉ta꞉piki wanda꞉hali handulueke laa I̱ta꞉ paala꞉ pita꞉la꞉me. Kutupa make ikana꞉ma꞉ I̱ta꞉ dupiki some handulumeke hone wilimipate I̱ta꞉ pa ta꞉ta꞉ piki some handilimikie. I̱ paala꞉ pita꞉la꞉ ekita꞉ iki tukiki pa꞉ta꞉ta꞉ ape ala꞉ haumanu make ne tunkula꞉la꞉ haumanu make mineke tieke panka꞉la꞉ haumanu make pasa꞉tei pita꞉la꞉ haumanu make yaala꞉ peake haumanu make la la piki pimanu make manda꞉ meaasa꞉ haumanu make mamataasa꞉ haumanu make paeyao handa꞉ ulueke.

Ka꞉leisia 5:15

Koto la ula꞉pate ikana꞉ma꞉ ika꞉ ika꞉ kone ape a꞉nda꞉ leke yokaalu alu pu haemeka꞉na꞉ta꞉ ya some hombo koto pimika꞉na꞉ta꞉ kota꞉ ota꞉ wopu handeteke hapa꞉peke. Ika꞉ tapake ame̱le̱ kone epeke tupa꞉ pata꞉ pea na hake ota꞉ tekili tekili pu hoeyaalimikie.

Ka꞉leisia 5:26

Nikana꞉ma꞉ hakoko lita꞉la꞉ hau na pu make ma꞉nda꞉ soka꞉la꞉ homena꞉ loluekema꞉ toya꞉ toya꞉ piki haumanu na pu make I̱ mia꞉peke alee laa honema꞉ honditi pu alualu pila꞉ hau make paeyao na pumana꞉e.

Epesese 4:2

Homu pea yopu hata꞉ta꞉ hoto paeyao handeteke hatiki pea꞉pa꞉peke. Ika꞉ kone tamba꞉ mu alu alu pilimi ekima꞉ta꞉ ika꞉ pukima꞉ homelemeeki peneme yao wala꞉pa꞉peke.

Epesese 5:21

Ikana꞉ma꞉ Ketiso pa꞉ta꞉ paala꞉ma꞉ homa haleme ekina꞉ ika꞉ kone homu pu alu alu pea hapa꞉peke.

Pilipai 2:14

Do kenkena꞉ hoihoi piki hoke hau pu haleme wanda꞉hali tukiki pa꞉ta꞉ hata꞉ ikita꞉ hoke haumanu na talo yako pea Koda꞉na꞉ tikitiki piki wekiwandiki haluekema꞉ta꞉ ika꞉ hau paeyaona꞉ la la pu ape ape na leke hao hapa꞉peke. Mo hande hoihoi piki wanda꞉hali pa꞉ta꞉ mo hande deto hala꞉ pi la halolo hata꞉ta꞉ ikita꞉ oli hande hombulanka꞉ to hala꞉ tupa꞉ hapa꞉peke alee.

Kolosi 3:12

Ikita꞉ Koda꞉na꞉ wanda꞉halie. Iki pa꞉ta꞉ pukima꞉ homolo hata꞉ ipika꞉eki hamina꞉ ma̱leke lila꞉me. Koto ekina꞉ta꞉ ikana꞉ma꞉ta꞉ dupiki hau manuta꞉ dau leke yama꞉pa꞉peke. Pukima꞉ a꞉ta꞉ma꞉ homa꞉la꞉eki make yankeke pa꞉ta꞉ a꞉ta꞉ma꞉ homolo tamba꞉ mina꞉la꞉eki make kimelema꞉ homa꞉la꞉eki make homu pea hala꞉eki make homu pea yu wia hala꞉eki paeyaoma꞉ loa꞉me.

Kolosi 3:8

Kutu pu haemepate ameta꞉ dupiki haumanu paeyao mea baapa꞉peke. Mineke panka꞉la꞉eki make titipu a꞉meinolo mineke panka꞉la꞉eki make honema꞉ yawa꞉la꞉eki make loa꞉me. Kutupa yala꞉ peake pimanu make kake na miniki pimanu make ika꞉ kake pa꞉ta꞉ ota꞉ na lapa꞉peke.

1 Timodi 6:4

kota꞉ koto someta꞉ hone na wiki hakoko lita꞉la꞉ hali hala꞉me. Ipiki pa꞉ta꞉ta꞉ hoke hone teke pila꞉me. Koto ekina꞉ ipikana꞉ma꞉ mo mana꞉ pi teke manuna꞉ta꞉ ape ape lo make pi yokaalu alu puluekema꞉ hone wopu u hala꞉me. Ipika꞉ kutu pita꞉la꞉ ekima꞉ta꞉ mo hone wopu epeke tupa꞉ na handeteke haleme wanda꞉hali tukiki pa꞉ta꞉ta꞉ I̱ I̱ ala꞉ hau make ape ape la alualu pitolo hata꞉ yaala꞉ peake pi la alualu pu make na handoma꞉ tiake hoke hone u alualu pita꞉la꞉eki make

1 Pida 3:8

Ya paeyaaso pita꞉ dupa alome. Iki paeyaoma꞉ hau paeyao pa꞉ta꞉ homeke hone wia a꞉ta꞉ma꞉ homa꞉ alualu pu hapa꞉peke. Iki homeke homeke paeyaoma꞉ nikita꞉ yankeke homeke hone witolo hata꞉ta꞉ pukima꞉ homa꞉ alualu pea make epeke hau pu alualu pea make homu pu alualu pea hapa꞉peke.

1 Pida 5:5

Koto mandake tupa꞉ kone iki panake panake haliwekima꞉ make mo keileke haliweki pa꞉ta꞉ homu pea hao hapa꞉peke. Kutu pa꞉ta꞉ iki paeyaoma꞉ homu pea ha alualu pita꞉la꞉ hau manuta꞉ ika꞉ aka꞉ leke yama hao hapa꞉peke. Kota꞉ Baiboloma꞉ alota꞉ Koda꞉ma꞉ mo hakoko lita꞉la꞉ wanda꞉halita꞉ kiao hala꞉pate mo homu pea hala꞉ wanda꞉hali pa꞉ta꞉ ipika꞉ a꞉ta꞉ma꞉ homa tamba꞉ mina꞉la꞉eki halo hala꞉me.