Ma꞉tiu 21:15 - Panake Pi La: Ula: Buka pita: Kine Pieke Buka

¹⁵ Yesuna꞉ epeke epeke haumanu piekeeki make mo wekiwandiki sunuma꞉ Tembolo da tukiki pa꞉ta꞉ hata꞉ Yesuna꞉ biki daeyaluekema꞉ mo Deipidina꞉ eiyekena꞉ biki yeiya꞉ lamana꞉e lemekeeki opu pitolo hata꞉ta꞉ mo hande yeni peao haemeke haliwekina꞉ you haliwekima꞉ make hande pi ula꞉eki wape pea walo hala꞉ haliwekima꞉ make mineke tieke kini pea pankolo hata꞉

Ma꞉tiu 21:15 Mawu Ofanana

Ma꞉tiu 20:24

Koto honke laeyekeeki mo hande mandane kiki yaapo disaipolo tonuma꞉ opuaata꞉ kota꞉ koto hama̱la̱꞉ pa꞉ta꞉ mineke pankemekeme.

Ma꞉tiu 21:23

Yesuma꞉ mo Tembolo da pa꞉ta꞉ paa la꞉ka꞉la a꞉pa pita꞉ wanda꞉hali pa꞉ta꞉ pi walolo haena꞉ mo yeni peao haemeke haliwekina꞉ you haliweki make mandane da handeteke haemeke you haliweki make ipiki pa꞉ta꞉ a꞉pa alota꞉ Hande pu haleeki manuta꞉ ekieki pea pu hata꞉ pipe kutupa make neketa꞉ epima꞉ wele peaeya꞉pe lemekeme.

Ma꞉tiu 21:9

Kutupa mo Yesu hatuku pulu hata꞉ titina꞉ hao wetepe hao pimiki wanda꞉hali paeyaoma꞉ wi aneke hapu kini pea la꞉ alu alu pitolo hata꞉ alota꞉ Hosa꞉na꞉e. Deipidina꞉ eiyeke pa꞉ta꞉ ta꞉na꞉e laata꞉ Mo Tekehalina꞉ bikina꞉ ipula꞉ halita꞉ Koda꞉ma꞉ ta꞉na꞉ma꞉ homena꞉e. Koda꞉na꞉ biki mea a꞉meiyamana꞉e laa la꞉tia pemekeme.

Ma꞉tiu 22:42

Ketiso pa꞉ta꞉ta꞉ ikana꞉ma꞉ta꞉ eki hone witemepe. Ipika꞉ apa꞉mei hali tieketa꞉ epipe leekeme. Ikana꞉ma꞉ hombo peaaso alota꞉ Ketisota꞉ Deipidina꞉ tapake wekie leekeme.

Ma꞉tiu 26:3

Koto pita꞉ kone mo Pa꞉tisi haliweki pita꞉ mo you haliweki paeyaoma꞉ mo yeni peao hayeke you hali Kaiya꞉pasina꞉ da tieke pa꞉ta꞉ a꞉pa momba꞉la pitaa

Ma꞉tiu 26:59

Mo hande yeni peao hayeke you hali make tondiki haliweki paeyaoma꞉ make Yesu lu homaaluekema꞉ ipika꞉ pa꞉la꞉ hau doe laa makeaaso hata꞉ ma̱leke lulu peleme haliweki weimikime.

Ma꞉tiu 27:1

Da ka꞉la꞉paaso siki hande yeni peao haemeke you haliweki pita꞉ tondiki haliweki ikana꞉ma꞉ Yesu homena꞉ loluekema꞉ pi hoti wimikime.

Ma꞉tiu 27:20

Mo yeni peao haemeke you haliweki pita꞉ tondiki haliweki ikana꞉ma꞉ wanda꞉halima꞉ Pailedi pa꞉ta꞉ honke alo hata꞉ Batabasita꞉ tapaaso hata꞉ Yesuta꞉ lina꞉e lena꞉ ika꞉ hone u tiao haemekeme.

Ma꞉tiu 9:27

Yesuma꞉ koto pa꞉ta꞉ mina꞉pa꞉lao pulu haena꞉ leke holu piki hali yaapoma꞉ ipika꞉ hoki nane wi tieke la꞉ paleke teli mea pulu alota꞉ Deipidina꞉ eiyekeo. Diki pa꞉ta꞉ a꞉ta꞉ma꞉ homa꞉peke la꞉tia pepekeme.

Maka 11:18

Wanda꞉hali wopuma꞉ Yesuna꞉ waleeke pimanu opuaata꞉ penkili pimiki handaata꞉ mo yeni peao haemeke you haliwekima꞉ make mo wape pea wala꞉tiki pu haemeke haliwekima꞉ make Yesu pa꞉ta꞉ paala꞉ma꞉ homolo hata꞉ ipiki lu alu palo pimiki pota꞉ weimikime.

Luku 20:1

Nate ma꞉nda꞉na꞉ Yesuta꞉ tembolo da pa꞉ta꞉ pita꞉ wanda꞉hali Koda꞉na꞉ mana꞉ pi alo make mo Pi Seliapo walo hayekeme. Kutupa mo yeni peao haemeke haliwekina꞉ you haliweki make mo Lo Pi walo haemeke haliwekima꞉ make mandane da handeteke haemeke you haliweki paeyao a꞉pa

Luku 22:2

Mo yeni peao haemeke teke haliwekima꞉ make mo Lo Pi wala꞉tiki pu haemeke haliwekima꞉ make Yesu a꞉mbao luekema꞉ yeke mandane pota꞉manu wopu weimikime. Pa ekipeke. Ikita꞉ mo wanda꞉hali paala꞉ma꞉ homolo hata꞉ pimikime.

Luku 22:66

Da kelepeeketa꞉ mo Diu haliwekina꞉ ka̱le̱sete mombuluekema꞉ mo tondiki haliweki make yeni peao haemeke teke haliweki make Lo Pi walo haemeke haliweki paeyao mombololo hata꞉ Yesu hatuku epemekeme.

Dioni 11:57

Kota꞉ mo yeni peao haemeke you haliweki make mo Pa꞉tisi haliweki tonka꞉na꞉ ikana꞉ma꞉ pi alo alota꞉ Hali epima꞉ Yesu hala꞉eki handea꞉ka꞉na꞉ta꞉ Yesu da꞉ka꞉pa꞉ minomonoyeke niki a꞉pa la kia꞉pa꞉peke lemekeme.

Dioni 12:19

Koto ekina꞉ mo Pa꞉tisi haliwekima꞉ ika꞉ kone ane la꞉ mone la꞉ pu alualu pitolo alota꞉ Handelemepe. Nikana꞉ma꞉ hau ma꞉nda꞉ pea꞉peke na ya꞉la꞉me. Handa꞉pe. Wanda꞉hali paeya꞉ tapao ipiki telia꞉ mea pulimime lemekeme.

Dioni 4:1

Koto natena꞉ta꞉ mo hande Pa꞉tisi haliweki pa꞉ta꞉ pi dupa la꞉niaeyekeme. Yesuma꞉ disaipolo wanda꞉hali wopu meaata꞉ bapitaisi peao pita꞉la꞉ ekima꞉ Dionima꞉ pita꞉la꞉ ekita꞉ wetepe yaasa꞉me laa la꞉niaeyekeme.

Dioni 7:42

Pa ekipeke mo Baibolo bukana꞉ la꞉la꞉ ekita꞉ Ketisota꞉ Deipidi tapake hali hata꞉ta꞉ hande Deipiti hao hayeke daoni pa꞉ta꞉ Beteleha꞉ma꞉ daoni pa꞉ta꞉ mendilieke la la꞉la꞉me lemekeme.