Ma꞉tiu 10:22 - Panake Pi La: Ula: Buka pita: Kine Pieke Buka

²² Ikana꞉ma꞉ ya e pokaaseme haliweki hata꞉ ya biki miniki haleme ekina꞉ta꞉ wanda꞉hali paeyaoma꞉ iki hoki wala kialimikie. Kutu pilimipate kone mo haumanu ipulu haena꞉ kone mo paelo pa꞉la꞉ nate opolo epena꞉ yu wia hata꞉ honkopu hao bepolatiki pu halia꞉ someta꞉ da꞉taa haena꞉ lelieke.

Ma꞉tiu 10:22 Mawu Ofanana

Ma꞉tiu 10:39

Ma꞉nda꞉ hali epima꞉ ipika꞉ honkopuma꞉ kone ipika꞉ da꞉ta꞉la꞉eki muluekema꞉ taapo haya꞉ka꞉na꞉ta꞉ kota꞉ ipika꞉ da꞉ta꞉la꞉eki alupalieke. Pate ya e amba꞉la pokaaluekema꞉ ipika꞉ da꞉ta꞉la꞉eki amba꞉la hone na wia꞉ka꞉na꞉ta꞉ kota꞉ koto somena꞉ da꞉ta꞉la꞉ ekita꞉ pa u halieke.

Ma꞉tiu 24:13

Kutu polo haena꞉ kone pa mo hone tulaasa꞉ some epima꞉ ota꞉ hone tulaatiki pu haya꞉ka꞉na꞉ta꞉ kota꞉ koto someta꞉ da꞉ta haena꞉ tamba꞉ milieke.

Ma꞉tiu 24:9

Koto haumanu pilia꞉ toma꞉na꞉ta꞉ mandane haliwekima꞉ iki pa꞉ta꞉ ka꞉nda꞉manu ku make lu puluekema꞉ iki da꞉ka꞉pa꞉ mina꞉ bepi pilimikie. Ikita꞉ yaeki haleme ekina꞉ wanda꞉hali wopuma꞉ iki honditi wopu pilimikie.

Ma꞉tiu 5:11

Ikita꞉ ya hoki nane tolu haleme ekina꞉ mandane wanda꞉hali ika꞉ pima꞉ iki yaala꞉ma꞉ homao make iki pa꞉ta꞉ tanda ku make ika꞉ biki hoeyaaluekema꞉ hoke ba꞉sa꞉ pitolo yayapiki pimanu sa꞉mba꞉lao pitolo haena꞉ kone kota꞉

Maka 13:13

Yaka biki menelemeke handaa wanda꞉hali paeyaoma꞉ iki ota꞉ kiaalimikie. Kutu pilimipate hali epima꞉ kima꞉ na homeke paelo pa꞉la꞉ tombona꞉ opolo puaata꞉ deto hala꞉eki milieke leekeme.

Luku 21:17

Yaka biki melemeke handaa wanda꞉hali paeyaoma꞉ iki ota꞉ kiaalimikie.

Luku 21:19

Honkopu hao hapa꞉peke. Pa ekipeke dupiteleme hau manuma꞉ta꞉ ika꞉ kone petelimikie leekeme.

Luku 6:22

Ikita꞉ mo Wanda꞉halina꞉ Eiyeke tolu halemeke handaa mandane wanda꞉halima꞉ iki pa꞉ta꞉ yaala꞉ma꞉ homao make tanda ku make ika꞉ biki hoeyaaluekema꞉ hoke ba꞉sa꞉ pitolo yayapiki pimanu sa꞉mba꞉lao pitolo haena꞉ kone

Luku 8:15

Kutupa mo epeke kenkena꞉ lopa꞉la꞉ wae ale manuta꞉ pi opua homu pu haleme wanda꞉hali ikana꞉ma꞉ honkopu hao epeke tupa꞉ minaata꞉ ika꞉ kiliki aneke a꞉eluekema꞉ pa putia pelimikie leekeme.

Dioni 17:14

Naka꞉ pita꞉ I̱ma꞉ iki pa꞉ta꞉ amba꞉ la haloa꞉me. Koto polo ekina꞉ do kenke wanda꞉halima꞉ta꞉ iki pa꞉ta꞉ honditi pu halememe. I̱ta꞉ do kenkena꞉eki na halo tupa꞉ koto haliweki make do kenkena꞉eki na haleme ekina꞉ pitelememe.

Dioni 7:7

Kenke wanda꞉hali paeyaoma꞉ iki pa꞉ta꞉ ota꞉ ki hone wia꞉peke na ya꞉la꞉pate I̱ma꞉ ika꞉ piteleme haumanu hoke ekie laa lo halo ekina꞉ I̱ pa꞉ta꞉ ki hone witelememe.

Aposolo 9:16

I̱ma꞉ yaka hauna꞉ tanda pa꞉la꞉eki mina꞉ la waluekema꞉ pue leekeme.

Loma꞉ 2:7

Mandane wanda꞉halima꞉ta꞉ epeke haumanu pu hatiki peaata꞉ ika꞉ biki epeke wina꞉ lolo pa꞉la꞉eki make Koda꞉ma꞉ ika꞉ pi lawalo pa꞉la꞉eki make homa꞉peke na yeke da꞉ta hao halo pa꞉la꞉eki make weiyu halememe. Kutu piki wanda꞉hali pa꞉ta꞉ Koda꞉ma꞉ da꞉ta hao halo pa꞉la꞉eki halieke.

2 Kotindi 4:11

Yesuna꞉ ekina꞉ nika꞉ hatia puluma꞉ ale pa꞉ta꞉ manuta꞉ homa꞉la꞉eki teke pa꞉ta꞉ hao haloma꞉me. Pa ekipeke ipika꞉ deto hala꞉ ekita꞉ nika꞉ do kenke loke pa꞉ta꞉ handena꞉yeke pitoloma꞉me.

Ka꞉leisia 6:9

Kutu pea꞉peke ya꞉la꞉ ekina꞉ta꞉ mo epeke haumanu pu haluekema꞉ kima꞉ na homo hamana꞉e. Mo hau a꞉nda꞉ na mina꞉pa꞉laoma꞉ka꞉na꞉ta꞉ kota꞉ koto hauna꞉ kiliki tala꞉peke nateta꞉ opolo ipilieke.

Hibulu 3:14

Mo hande nika꞉ titina꞉ hone ti laoma꞉ ekita꞉ na mina꞉pa꞉lake homolo kia꞉naluekema꞉ honkopu hao hata꞉ miniki hao hamana꞉e. Koto hau a꞉nda꞉ puma꞉ka꞉na꞉ta꞉ kota꞉ nikita꞉ ota꞉ Ketiso ame̱le̱ apa꞉tao tunaa haloma꞉me.

Hibulu 6:11

Koda꞉ma꞉ ota꞉ pina꞉e hone wilimieki iki pa꞉ta꞉ ota꞉ pina꞉ kima꞉ na homeke honkopu hao hata꞉ mo hande epeke haumanu pa pea꞉tiki pu hamena꞉ niki hone wopu pa꞉la꞉me.

Dia꞉mesi 1:12

Hali epima꞉ mo la handa꞉la꞉ ekimanu epena꞉ kone da̱o̱la haya꞉ka꞉na꞉ta꞉ ta꞉na꞉ma꞉ homilieke. Do ekina꞉yeke loa꞉me. Mo halima꞉ta꞉ mo la handa꞉la꞉ ekimanu paeyao bepolaeya꞉ka꞉na꞉ta꞉ Koda꞉ma꞉ ipiki pa꞉ta꞉ yenki halolo hata꞉ta꞉ deto hala꞉eki kone halieke. Koto yenkita꞉ Koda꞉ma꞉ amba꞉ pi la꞉ witolo hata꞉ I̱ pa꞉ta꞉ pukima꞉ homa꞉la꞉ wanda꞉hali pa꞉ta꞉ deto hala꞉eki halueke laa pi la꞉ ula꞉me.

1 Dioni 3:13

Koto ekina꞉ yaka kame tonuo. Do kenke wanda꞉halima꞉ iki honditi pia꞉ka꞉na꞉ta꞉ na penkilipa꞉tia pomia꞉pa꞉peke.

Peneme Yaeyekeeki 2:10

Mo mulu peleme tanda manuna꞉ paala꞉ma꞉ na homa꞉pa꞉peke. Opia꞉pe. Mo Sadanima꞉ta꞉ iki la handolo hata꞉ iki ma꞉nda꞉ hondo dipula mea lopaalieke. Kutupa ika꞉ ka꞉nda꞉ma꞉ homelemeeki manuta꞉ kiki yaapo natena꞉ pua paelieke. Homa꞉la꞉eki epena꞉ kone I̱ pa꞉ta꞉ hone tulaa pelia hapa꞉peke. Kutu pimika꞉na꞉ta꞉ ika꞉ a꞉nda꞉ pea bepolaaseme ekina꞉ ta꞉na꞉ma꞉ homolo peleme yenkita꞉ da꞉ta꞉la꞉eki kulueke.

Peneme Yaeyekeeki 2:17

Haleke haemeka꞉na꞉ta꞉ kota꞉ mo Sipitidima꞉ siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me. Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ kota꞉ I̱ma꞉ ipiki pa꞉ta꞉ mo a꞉mbao ula꞉ mandane ma꞉na halueke. Kutupa mo hake piki toopina꞉ panake biki laala꞉eki make halueke. Mo bikita꞉ ma꞉nda꞉ma꞉ make hone na ula꞉pate mo milia꞉ somema꞉ homeke hone wilieke.

Peneme Yaeyekeeki 2:26

Ma꞉nda꞉ epi amedama꞉ a꞉nda꞉ pea bepolaaso hata꞉ yaka hone pa꞉la꞉eki pa putia pua mo honikina꞉ paeyaeya꞉ka꞉na꞉ta꞉ kota꞉ yaka Apa꞉ma꞉ I̱ma꞉ handeteke hanoyeke ka꞉la꞉ ekita꞉ iki pa꞉ta꞉ kulueke. I̱ma꞉ta꞉ iki pa꞉ta꞉ mo kenke honiki paeyao pa꞉ta꞉ haleme tapake paeyao handeteke hamena꞉ lolueke.

Peneme Yaeyekeeki 2:3

Ikita꞉ homu pea yu wia halememe. Kutupa ikita꞉ yaka ekina꞉ kone tanda nalo hata꞉ na kiaalememe.

Peneme Yaeyekeeki 2:7

Haleke haemeka꞉na꞉ta꞉ kota꞉ mo Sipitidima꞉ mo siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me. Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ kota꞉ I̱ma꞉ mo Koda꞉na꞉ e pa꞉ta꞉ opa꞉la꞉ da꞉ta꞉la꞉ tina꞉ kiliki nena꞉ waleke halueke.

Peneme Yaeyekeeki 3:21

Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ I̱ ame̱le̱ mo yaka kini seana꞉ lopulao pitulupeke. I̱ma꞉ta꞉ bepolaota꞉ ameta꞉ yaka Apa꞉na꞉ kini seana꞉ lopulao pilupa꞉ tupa꞉ loa꞉me lea꞉me.