Luku 7:47 - Panake Pi La: Ula: Buka pita: Kine Pieke Buka

⁴⁷ I̱ma꞉ neke pa꞉ta꞉ alome. Ipika꞉ pukima꞉ homa꞉la꞉eki tieke I̱ pa꞉ta꞉ peneme yaala꞉ ekima꞉ta꞉ ipika꞉ wopu pa꞉la꞉ hoke hauta꞉ do paeta꞉la꞉ handa꞉e laa wala꞉la꞉me. Koto pa꞉la꞉pate ma꞉nda꞉ma꞉ ipika꞉ hoke hau hosikale siki kone Koda꞉ma꞉ paeyaowaya꞉ka꞉na꞉ta꞉ kota꞉ ipikana꞉ma꞉ Koda꞉ pa꞉ta꞉ta꞉ puki hosikale siki halieke leekeme.

Luku 7:47 Mawu Ofanana

Ma꞉tiu 10:37

Ma꞉nda꞉ hali epima꞉ I̱ pa꞉ta꞉ puki wilia꞉pate pa ipika꞉ pukima꞉ homa꞉la꞉ ekita꞉ ipika꞉ apa꞉ ama꞉ pa꞉ta꞉ titina꞉ amba꞉la wia꞉ka꞉na꞉ta꞉ kota꞉ koto someta꞉ ya disaipolo hali haena꞉ lapeketa꞉ ana꞉ na pa꞉la꞉me. Hali epima꞉ I̱ pa꞉ta꞉ puki wilia꞉pate kone pa ipika꞉ pukima꞉ homa꞉la꞉ ekita꞉ titina꞉ amba꞉la ipika꞉ wekiwandiki pa꞉ta꞉ u haya꞉ka꞉na꞉ta꞉ kota꞉ koto someta꞉ ya disaipolo hali haena꞉ lapeketa꞉ ana꞉ na pa꞉la꞉me.

Luku 7:39

Mo hande Pa꞉tisi halima꞉ kotoeki handaata꞉ ipika꞉ honema꞉ kone alota꞉ Do halita꞉ Koda꞉na꞉ potopede hali ya꞉ka꞉na꞉ yoluta꞉ ipikana꞉ma꞉ ipikita꞉ do wanda꞉ma꞉ wataasa꞉me laa peneme handolo pia꞉me. Ipikana꞉ma꞉ koto wanda꞉na꞉ pa꞉la꞉ hoke hauta꞉ hone ulu pia꞉me laa hone wiekeme.

Luku 7:46

Nakana꞉ma꞉ta꞉ mo olipi oetata꞉ ya youna꞉ na kitaepate do wanda꞉ma꞉ta꞉ ota꞉ epeke totopo piki oeta yaka ankena꞉ kitawaya꞉me.

Luku 7:48

Koto laa Yesuma꞉ mo wanda꞉ pa꞉ta꞉ alota꞉ Naka꞉ pele hoke hau paeyaota꞉ paela꞉me leekeme.

Aposolo 5:31

Koda꞉ma꞉ Yesu paa mea tiaota꞉ ipikita꞉ Titina꞉ Pula꞉ Hali make Da꞉taasa꞉ Hali make ipika꞉ popeke kiki nane haena꞉ laata꞉ Isulai wanda꞉halima꞉ hone ma꞉nda꞉ la꞉ka꞉la mina wiaata꞉ ika꞉ hoke hau peleme ekimanu pa tumbaena꞉yeke piekeme.

Loma꞉ 5:20

Hande Lo Pi manuta꞉ wanda꞉halima꞉ hao hoeyaaseme ekimanu daeyaena꞉yeke Koda꞉ma꞉ wetepena꞉ Mosesi pa꞉ta꞉ la haleekeme. Kutu piekepate hoke haumanu daeya꞉tia peekepate Koda꞉ma꞉ pa hameke a꞉ta꞉ma꞉ homa꞉la꞉eki tiekema꞉ daeya꞉tia pulu hata꞉ lu ankulala꞉me.

2 Kotindi 5:14

Ketisona꞉ pukima꞉ homa꞉la꞉ ekima꞉ta꞉ niki handeteke hala꞉me. Pa ekipeke nikana꞉ma꞉ hone witolota꞉ hali homekema꞉ta꞉ paeyaona꞉ homaeyekeme. Koto hauma꞉ta꞉ paeyaoma꞉ ipika꞉ homa꞉la꞉eki putu pelememe.

Ka꞉leisia 5:6

Niki Yesu Ketiso pa꞉ta꞉ tunao haoma꞉ka꞉na꞉ta꞉ sekemesaisi hau pita꞉la꞉eki make sekemesaisi hau na pita꞉la꞉eki make koto hau telipina꞉ta꞉ pa pa alema꞉ handa꞉la꞉me. Pate hone tulaaso hata꞉ pukima꞉ homa꞉ alualu pu haemeka꞉na꞉ta꞉ kota꞉ koto hauta꞉ ota꞉ekie.

Epesese 6:24

Kutupa Tekehali Yesu Ketiso pa꞉ta꞉ hoto paeyao pukima꞉ homo haleme wanda꞉hali pa꞉ta꞉ Koda꞉ma꞉ ipika꞉ pa a꞉ta꞉ma꞉ homa꞉la꞉eki kia꞉ka꞉na꞉ta꞉ epelieke.

Pilipai 1:9

I̱ma꞉ iki pa꞉ta꞉ dupiki yeni peao halome. Mo yeni peao halo ekita꞉ ikana꞉ma꞉ ota꞉ epeke titina꞉ hau ma̱leke lia꞉peke ya꞉la꞉ ika꞉ pukima꞉ homa꞉la꞉eki make ika꞉ ota꞉eki homeke hone wita꞉la꞉eki make ika꞉ honema꞉ teli pita꞉la꞉eki make mandakena꞉ daeyolo daeyolo ombu haena꞉ I̱ma꞉ do yeni peaasome. Koto haumanu iki tukiki pa꞉ta꞉ daeya꞉ka꞉na꞉ta꞉ mo Ketiso ipilie natena꞉ ikita꞉ haumanu na pu hoeyao aleta꞉ na piki wanda꞉hali halimikie.

1 Timodi 1:14

Nika꞉ Tekehalima꞉ ipika꞉ a꞉ta꞉ma꞉ homa tamba꞉ mina꞉la꞉eki I̱ pa꞉ta꞉ wopu kua꞉niaeyekeme. Kutupa make mo nika꞉ Ketiso Yesu ame̱le̱ molome hone tulaasa꞉eki pita꞉ pukima꞉ homa꞉la꞉eki yaapo I̱ pa꞉ta꞉ make kia꞉me.

1 Dioni 1:7

Pate mo ipikita꞉ pa̱a̱ pa꞉la꞉eki pa꞉ta꞉ hala꞉ tupa꞉ niki make mo pa̱a̱ pa꞉la꞉eki pa꞉ta꞉ hao poluma꞉ka꞉na꞉ta꞉ kota꞉ nikita꞉ mandakena꞉ hone homeke u alualu poloma꞉me. Kutupa ipika꞉ Eiyeke Yesuna꞉ wema꞉ta꞉ nika꞉ hokeeki paeyao wamo peaasa꞉me.

1 Dioni 3:18

Yaka wekiwandikio. Nika꞉ pukima꞉ homoloma꞉ ekita꞉ kakema꞉ homeke o pima꞉ homeke lapeke na ya꞉la꞉me. Dia꞉me. Koto pukima꞉ homa꞉la꞉ ekima꞉ta꞉ pa mo ota꞉eki peneme yaena꞉ nika꞉ kikima꞉ pitolo hata꞉ homekee.

1 Dioni 4:19

Koda꞉ma꞉ta꞉ niki amba꞉la pukima꞉ homeeke handaa nikana꞉ma꞉ make pukima꞉ homo haloma꞉me.

1 Dioni 5:3

Nika꞉ Koda꞉ pa꞉ta꞉ pukima꞉ homoloma꞉ ekima꞉ta꞉ kota꞉ ipika꞉ pi ula꞉eki opua pitoloma꞉eki konee. Kutupa ipika꞉ mana꞉ pi manuma꞉ta꞉ niki ka꞉nda꞉ na peaasa꞉me.