Luku 6:48 - Panake Pi La: Ula: Buka pita: Kine Pieke Buka

⁴⁸ Ipikita꞉ hali ma꞉nda꞉ ipika꞉ da a꞉eluekema꞉ta꞉ yu amba꞉la aowa꞉tia pua toopi handa꞉ witolota꞉ pinkimanu koto toopi manda nokopo hala꞉ hali tupa꞉e. Ikali tieke ta ipulu hata꞉ hande da a꞉pa wataa hande hande piekepate hande data꞉ na lombeekeme. Pa ekipeke mo data꞉ ota꞉ epeke tupa꞉ a꞉eyeke handaa piekeme.

Luku 6:48 Mawu Ofanana

Luku 6:47

Ma꞉nda꞉ epima꞉ I̱ teke pa꞉ta꞉ a꞉pa yaka pi opua pimika꞉na꞉ta꞉ I̱ma꞉ta꞉ ikita꞉ dupiki halie laa manda꞉ meanoe.

Luku 6:49

Koto pa꞉la꞉pate wanda꞉hali ma꞉nda꞉ epima꞉ yaka pi opuaata꞉ na pimika꞉na꞉ta꞉ ipikita꞉ mo kenke toopi na handa꞉ wiki hata꞉ kone pa hameke pinki nokopo hala꞉ hali tupa꞉e. Mo hande ikali tieke ta a꞉pa mo hande da wataa hande hande pieke pa꞉ta꞉ kone lombeekeme. Hande da lombolo hata꞉ta꞉ ota꞉ hoke tupa꞉ anekema꞉ lombeekeme leekeme.

Dioni 16:33

Do la kitolo pita꞉ ikana꞉ma꞉ I̱ yaapo ta꞉ma꞉ni pea hata꞉ puki lopa꞉niao hamina꞉yeke la loa꞉me. Kenke wanda꞉halima꞉ iki pa꞉ta꞉ tanda kulu pelemepate honkopu hao hapa꞉peke. Do kenkena꞉ pita꞉la꞉ hau manuta꞉ I̱ma꞉ amba꞉ bepolao ulume leekeme.

Aposolo 14:22

Ketiso wanda꞉hali honkopu haena꞉ alo hata꞉ pi walolo alota꞉ Pi wotu miniki hao hapa꞉pekealeo laata꞉ Nikita꞉ ka꞉nda꞉ma꞉ homa꞉la꞉eki wotu meata꞉ Koda꞉ ipika꞉ Kilu Tombuao Hala꞉ ekina꞉ honda꞉ pambulumeke lepekeme.

Epesese 2:20

Ikita꞉ Koda꞉ma꞉ a꞉eta꞉la꞉ da tupa꞉ halememe. Ipikana꞉ma꞉ koto da a꞉etolota꞉ niki aposolo haliweki make potopede haliweki make mea apa꞉tao pinkimanu tupa꞉ noka꞉pa꞉la꞉me. Kutu pa꞉la꞉pate Yesu Ketisota꞉ ota꞉ titina꞉ noka꞉pa꞉la꞉ pinki hala꞉me.

2 Timodi 2:19

Koda꞉ma꞉ nokopeeke taka꞉lake pinkita꞉ da̱o̱la꞉pa pa꞉la꞉me. Koto pinkina꞉ pi yaapo wape pea ula꞉ ekita꞉ dupa. Tekehalima꞉ ipika꞉ wanda꞉halita꞉ ipika꞉ amba꞉ hando ulume laa wape pea ula꞉me. Kutupa pi ma꞉nda꞉ make dupa. Ma꞉nda꞉ hali epima꞉ I̱ta꞉ mo Tekehalina꞉eki halome lea꞉ka꞉na꞉ta꞉ kota꞉ mo hokeeki paeyao ota꞉ mina꞉pa꞉lao hoki walaa pua꞉peke ya꞉la꞉me pi yaapo wape pa꞉la꞉me.

2 Pida 1:10

Koto ekina꞉ yaka kame titio. Mo Koda꞉ma꞉ iki wi laa ma̱leke lita꞉la꞉ ekita꞉ ota꞉ pa u haena꞉ ikana꞉ma꞉ honkopu wopu hao pea꞉pa꞉peke. Kutu pimika꞉na꞉ta꞉ ika꞉ hone tulaleme ekita꞉ ota꞉ na mina꞉pa꞉lalimikie.

1 Dioni 2:28

Ota꞉e. Yaka wekiwandikio. Ipiki yaapo ta꞉ma꞉ni pea hapee. Pa ekipeke ipiki opolo epea꞉ka꞉na꞉ta꞉ nikita꞉ honkopu haasa꞉ ekima꞉ tumbulu pa꞉la꞉ tupa꞉ loa꞉me. Kutupa koto mo ipilia꞉ natena꞉ta꞉ ipiki handolo hata꞉ yaala꞉ma꞉ na homolo polome tupa꞉ loa꞉me.

Diudi 1:24

Koda꞉ma꞉ta꞉ iki lopaama꞉na꞉yeke ana꞉na꞉ handeteke hala꞉me. Kutupa mo ipika꞉ pa̱a̱ pu hala꞉ alena꞉ pua hamena꞉ yeke ipikana꞉ma꞉ iki ana꞉na꞉ hatuku pua꞉peke ya꞉la꞉me. Koto pa꞉ta꞉ta꞉ ikita꞉ ata꞉ka꞉ ma꞉nda꞉ na piki ta꞉na꞉ pita꞉la꞉ ekina꞉ tumbulu bao halimikie.