Luku 16:25 - Panake Pi La: Ula: Buka pita: Kine Pieke Buka

²⁵ Koto leekepate Eipoloha꞉ma꞉ma꞉ alota꞉ Ya wekio. Hone niminae. Neketa꞉ hande kenkena꞉ hae natena꞉ta꞉ kota꞉ epeke alemanu wotu wia haepate La꞉satesita꞉ ota꞉ hoke alemanu homeke mia꞉me. Kutu piekepate ameta꞉ ipikita꞉ ta꞉na꞉ma꞉ homo haena꞉ta꞉ neketa꞉ tanda naleme.

Luku 16:25 Mawu Ofanana

Ma꞉tiu 27:63

Hande ya pi lo haya꞉ somema꞉ pa hande haya꞉ dina꞉ ipikana꞉ma꞉ alota꞉ Hoto tepo natena꞉ wiaata꞉ I̱ta꞉ paa mea tialieke leekeeki niminaasoma꞉me.

Maka 9:45

Naka꞉ ankema꞉ hoke hau puelena꞉ lea꞉ka꞉na꞉ta꞉ naka꞉ anke tunkulu baapeke leekeme. Anke homeke hata꞉ hao hala꞉eki mika꞉na꞉ta꞉ epelieke leekeme. Anke yaapo hata꞉ ti to hala꞉ alena꞉ peka꞉na꞉ta꞉ hoelieke.

Luku 16:20

Kutupa mo hamoko halina꞉ pota꞉ kake pa꞉ta꞉ mandane haliwekima꞉ta꞉ mo natehali hayeke hali homeke La꞉satesi mea pua wia꞉tiki pu haemekeme. Mo halita꞉ tete tete pambeekeme.

Luku 16:23

Hande hamoko halita꞉ oni ti to hala꞉ ale pa꞉ta꞉ puaata꞉ tanda tieke minolo hata꞉ handa꞉liaeyekepate Eipoloha꞉ma꞉ La꞉satesi yaapo lopula alu pea pitipikieki papate haepekeeki handeekeme.

Luku 16:26

Kotoeki manuta꞉ koto ya꞉la꞉pate ma꞉nda꞉ta꞉ nika꞉ haloma꞉eki tukiki pa꞉ta꞉ hombo tieke ula꞉ ekima꞉ do diki halopa꞉ nane haloma꞉ wanda꞉hali ma꞉nda꞉ta꞉ ta neke hale nane ipuluekema꞉ taapelemepate a꞉pa꞉peke na ya꞉lieke. Kutupa neke hale nane haleme wanda꞉hali ma꞉nda꞉ta꞉ doane ipuluekema꞉ taapea꞉ka꞉na꞉ta꞉ a꞉pa꞉peke na ya꞉lieke leekeme.

Luku 6:24

Koto pa꞉la꞉pate aiyo ame do hamoko haaseme wanda꞉halio. Iki pa꞉ta꞉ta꞉ ka꞉nda꞉ tieke ipula꞉me. Ika꞉ epeke tupa꞉ hao pa꞉limi ekita꞉ ame homeke minelememe.

Dioni 16:33

Do la kitolo pita꞉ ikana꞉ma꞉ I̱ yaapo ta꞉ma꞉ni pea hata꞉ puki lopa꞉niao hamina꞉yeke la loa꞉me. Kenke wanda꞉halima꞉ iki pa꞉ta꞉ tanda kulu pelemepate honkopu hao hapa꞉peke. Do kenkena꞉ pita꞉la꞉ hau manuta꞉ I̱ma꞉ amba꞉ bepolao ulume leekeme.

Aposolo 14:22

Ketiso wanda꞉hali honkopu haena꞉ alo hata꞉ pi walolo alota꞉ Pi wotu miniki hao hapa꞉pekealeo laata꞉ Nikita꞉ ka꞉nda꞉ma꞉ homa꞉la꞉eki wotu meata꞉ Koda꞉ ipika꞉ Kilu Tombuao Hala꞉ ekina꞉ honda꞉ pambulumeke lepekeme.

Loma꞉ 8:7

Koto ekina꞉ hali epita꞉ ipika꞉ lokena꞉ hone pa꞉la꞉eki manuma꞉ ipika꞉ hone wita꞉la꞉eki handeteke hatiki pia꞉ka꞉na꞉ta꞉ kota꞉ ipikita꞉ Koda꞉na꞉ a꞉nda꞉ tunkuliki hali halieke. Ipikana꞉ma꞉ta꞉ Koda꞉na꞉ Lo Pimanu na opu hala꞉ ekima꞉ pita꞉la꞉pate ipikana꞉ma꞉ ota꞉ opua꞉peke na ya꞉la꞉me.

Pilipai 3:19

Koto wanda꞉halima꞉ta꞉ ika꞉ lokena꞉ hone pa꞉la꞉ ekimanu teliolo hata꞉ panda꞉ puniao haleme ekina꞉ ikita꞉ ti to hala꞉ pa꞉ta꞉ pua hao halimikie. Mo ika꞉ yaaloma꞉ homa꞉pa꞉peke ya꞉la꞉ hau pu halemeeki pa꞉ta꞉ hakoko lu halememe. Kutupa ikana꞉ma꞉ pa do kenkena꞉ hau pu haleme wanda꞉halina꞉ hau leke pu halememe.

Hibulu 11:25

Ipikana꞉ma꞉ mo hoke haumanu puluekema꞉ hosikima꞉ ta꞉na꞉ma꞉ homa pea꞉peke yeekeme. Pate kutu piteme tupa꞉ta꞉ mo Koda꞉na꞉ wanda꞉hali ame̱le̱ hata꞉ ka꞉nda꞉ muluekema꞉ ma̱leke liekeme.

1 Dioni 2:15

Do kenkena꞉ hau o do kenkena꞉ ula꞉ alemanu pa꞉ta꞉ pukima꞉ na homa꞉peke. Ikana꞉ma꞉ do kenkena꞉ ula꞉ alemanu pa꞉ta꞉ pukima꞉ homemeka꞉na꞉ta꞉ kota꞉ Koda꞉ pa꞉ta꞉ pukima꞉ na homelememe.

Peneme Yaeyekeeki 7:14

I̱ma꞉ alota꞉ Someo. I̱ hone na ulupate nakana꞉ma꞉ta꞉ hone wilime loa꞉me. Ipikana꞉ma꞉ I̱ pa꞉ta꞉ alota꞉ Ikita꞉ mo hande ota꞉ hoke tanda pa꞉ta꞉ yama꞉ kone epeke tupa꞉ epeleme wanda꞉halie lea꞉me. Ikana꞉ma꞉ta꞉ ika꞉ aka꞉ manuta꞉ mo Sipisipi Ma꞉na꞉ Ikikina꞉ wema꞉ tanda꞉pa hake peao pelememe.