Dioni 4:10 - Panake Pi La: Ula: Buka pita: Kine Pieke Buka

¹⁰ Yesuma꞉ ipika꞉ pi hombo peaaso alota꞉ Nakana꞉ma꞉ta꞉ Koda꞉ma꞉ kita꞉la꞉ ale make neke pa꞉ta꞉ Ikali ma꞉nda꞉ nono kie laa honke ala꞉ halina꞉ biki make hone wika꞉na꞉ yoluta꞉ kota꞉ naka꞉ honke aleeki ipikana꞉ma꞉ opua da꞉ta꞉la꞉ ikali kulu pia꞉me leekeme.

Dioni 4:10 Mawu Ofanana

Luku 11:13

Ikita꞉ hoke haliweki halemepate kone ika꞉ weki wandiki pa꞉ta꞉ta꞉ epeke epeke alemanu halo halememe. Koto hau ota꞉ lombei peaaso hata꞉ta꞉ oli ya nane hala꞉ Apa꞉ma꞉ta꞉ mo Holi Sipitidi honke aleme wanda꞉hali pa꞉ta꞉ta꞉ ota꞉ halieke laa leekeme.

Dioni 16:3

Yaka Apa꞉ diki na handeleme ekina꞉ koto haumanu pilimikie.

Dioni 17:3

Deto hala꞉ ekita꞉ dupae. Neke homeke ota꞉ Koda꞉ haleeki make nakana꞉ma꞉ tapaale hali Yesu Ketiso hala꞉eki make telipina꞉ handa꞉la꞉ekie.

Dioni 3:16

Do ekina꞉yeke loa꞉me. Koda꞉ma꞉ kenke wanda꞉hali pa꞉ta꞉ pukima꞉ wotu homolo hata꞉ ipika꞉ Weki homeke kone kiekeme. Kutupa hali epima꞉ ipika꞉ Weki pa꞉ta꞉ hone tulao haya꞉ka꞉na꞉ta꞉ kota꞉ koto hali na homeke deto hala꞉eki mina꞉yeke kiekeme.

Dioni 4:14

Kutu piliepate hali epima꞉ I̱ma꞉ halolo ikali naa haya꞉ka꞉na꞉ta꞉ koto halita꞉ ikali nena꞉ paa na pilieke. I̱ma꞉ do alo ekita꞉ do ekina꞉ yeke loa꞉me. I̱ma꞉ halolo ikalita꞉ mo hali tukiki pa꞉ta꞉ pita꞉ opa꞉la꞉ ikali kone pitilieke. Kutupa hande ikalima꞉ta꞉ opolo hata꞉ mo halita꞉ da꞉tao haena꞉ lelieke leekeme.

Dioni 6:35

Yesuma꞉ mo wanda꞉hali pa꞉ta꞉ alota꞉ Da꞉ta꞉la꞉ palaowata꞉ I̱ konee laata꞉ Hali epima꞉ I̱ pa꞉ta꞉ epea꞉ka꞉na꞉ta꞉ tea꞉ma꞉ paa na homilieke. Kutupa hali epima꞉ I̱ pa꞉ta꞉ hone tulaeya꞉ka꞉na꞉ta꞉ ikali na꞉na꞉ paa na pilieke leekeme.

Dioni 6:51

Oli hepeni nane hao hola꞉pa꞉niao a꞉pa꞉la꞉ da꞉ta꞉la꞉ palaowata꞉ I̱e leekeme. Hali epima꞉ do palaowa nea꞉ka꞉na꞉ta꞉ da꞉ta hao halieke. Kutupa mo hali pa꞉ta꞉ I̱ma꞉ halo polo palaowata꞉ yaka loke mindiki kone halueke. Kenke wanda꞉hali paeyaoma꞉ da꞉ta꞉la꞉eki mina꞉yeke yaka loke mindiki halueke leekeme.

Aposolo 9:11

Kutupa Tekehalima꞉ alota꞉ Tiao. Oni pota꞉ bikita꞉ Tikitikipiki pota꞉ yola꞉ mea pua Diudasina꞉ da pa꞉ta꞉ pua Tasa꞉si hali Solota꞉ hando pa꞉ta꞉ pila꞉pe laa lota꞉ pia꞉pekee. Ipikita꞉ yeni koto pitolo pila꞉ handa꞉e leekeme.

Loma꞉ 8:32

Koda꞉ma꞉ ota꞉ ipika꞉ Eiyeke sa꞉sa꞉ na piki kone niki paeyaona꞉eki peaaso homena꞉ kiekeme. Ipika꞉ Eiyeke niki ka꞉la꞉ ekina꞉ koto tupa꞉ ala꞉ta꞉ ala꞉ta꞉ paeyao make ipikana꞉ma꞉ kiki tindipao na kiliepe. Dia꞉me. Ota꞉ kilieke.

1 Kotindi 1:30

Koda꞉ma꞉ iki mea Yesu Ketiso yaapo ta꞉ma꞉ni peala꞉me. Kutupa ipikana꞉ma꞉ Ketisota꞉ nika꞉ hone wopu wita꞉la꞉eki haena꞉ la꞉la꞉me. Kutupa make Ketisoma꞉ nikita꞉ Koda꞉ yaapo tikitiki yao hamono laata꞉ nikita꞉ yakopiki wanda꞉hali hamono la꞉la꞉me. Kutupa ipikana꞉ma꞉ make niki pa ka꞉la꞉pa꞉ tapaala꞉me.

1 Kotindi 10:4

mo Sipitidima꞉ haleeke ikali make nemekeme. Hande Koda꞉na꞉ Sipitidima꞉ waleeke toopi pa꞉ta꞉ yama꞉ epeeke ikali nemekeme. Kutupa mo wanda꞉hali ame̱le̱ pomieke toopita꞉ Ketiso kone hayekeme.

2 Kotindi 9:15

Niki paeyaoma꞉ Koda꞉ ipika꞉ ota꞉ au lapeke na yeke pa kita꞉la꞉ ekina꞉ ipiki pa꞉ta꞉ keiyae lomana꞉e.

Epesese 2:8

Ikana꞉ma꞉ hone tulaaso hamina꞉ Koda꞉ta꞉ ipikana꞉ma꞉ pa hameke a꞉ta꞉ma꞉ homolo hata꞉ iki mea da꞉taala꞉me. Ikana꞉ma꞉ ika꞉ piteleme ekina꞉ dia꞉me. Koda꞉ma꞉ iki pa꞉ta꞉ pa kita꞉la꞉ ekina꞉ loa꞉me.

Hibulu 6:4

Mandane wanda꞉halima꞉ta꞉ mo hande amba꞉ ika꞉ hone tulaemekeeki mina꞉pa꞉laemeka꞉na꞉ta꞉ pa ekipa ika꞉ puki la꞉ka꞉la hone ma꞉nda꞉ tulaena꞉ handa꞉ mea epomana꞉pe. Ikita꞉ Koda꞉na꞉ pa̱a̱ pa꞉la꞉eki tukiki pa꞉ta꞉ amba꞉ haemeke handa make mo hepeni nanema꞉ pa hameke hala꞉la꞉ hau ikana꞉ma꞉ amba꞉ pea handemeke handa make mo Holi Sipitidima꞉ telipea yekeeki make mimiki handaata꞉

1 Dioni 5:20

Nika꞉ hone uluma꞉ ekita꞉ mo Koda꞉na꞉ Eiyeketa꞉ niki hone lenkipa wita꞉la꞉eki kulu a꞉pa꞉la꞉me. Pa ekipeke nikana꞉ma꞉ mo ota꞉ Koda꞉ hone ulu poloma꞉ tupa꞉ pa꞉la꞉me. Ipiki ame̱le̱ hone homeke witolo hata꞉ pa ipika꞉ Eiyeke Yesu Ketiso kone hone homeke wia haloma꞉me. Ipikita꞉ mo ota꞉ Koda꞉e. Kutupa ipikita꞉ deto hala꞉ ekina꞉ tekee.

Peneme Yaeyekeeki 21:6

Kutupa ombu alota꞉ Ameta꞉ pu paela꞉me. I̱ta꞉ titina꞉ make sale nane makee. Kini pitolo make paeyaaso makee. Ma꞉nda꞉ epita꞉ ikali na꞉na꞉ma꞉ homea꞉ka꞉na꞉ta꞉ I̱ma꞉ mo opa꞉la꞉ da꞉taasa꞉ ikalita꞉ na hambeke pa nena꞉ waleke halueke.

Peneme Yaeyekeeki 22:17

Mo Sipitidi pita꞉ mo hali panake pula꞉ wanda꞉ yaapoma꞉ alota꞉ Epoe ala꞉me. Do pi opilimi tapake paeyaoma꞉ make Epoe lapa꞉peke ya꞉lieke. Ikali na꞉na꞉ma꞉ homele some epita꞉ do da꞉taapeke ya꞉la꞉ ikalita꞉ pa hameke kita꞉la꞉ekie laa mea꞉peke ya꞉la꞉me. Dota꞉ ma꞉nda꞉ epi hone pa꞉la꞉ somena꞉ loa꞉me lea꞉me.

Peneme Yaeyekeeki 7:17

Pa ekipeke mo kini sea tukikina꞉ hala꞉ Sipisipi Ma꞉na꞉ Ikikita꞉ ika꞉ handeteke hala꞉ hali halieke. Kutupa ikita꞉ mo da꞉ta꞉la꞉eki kita꞉la꞉ tunkulu pa pitumu pitumu pa꞉la꞉ ikalimanu pa꞉ta꞉ hatuku pelieke. Kutupa Koda꞉ma꞉ ika꞉ leke pa꞉ta꞉ e̱ pankekemanu paeyao honu baalieke.