Dia꞉mesi 3:13 - Panake Pi La: Ula: Buka pita: Kine Pieke Buka

¹³ Iki pa꞉ta꞉ hali epi amedama꞉ hone wopu wia pita꞉la꞉ ekimanu hando halemepe. Kutu piki halima꞉ta꞉ ipika꞉ epeke hala꞉eki peneme yaaluekema꞉ hone wopu wia homu pea hata꞉ ipikana꞉ma꞉ epeke hau pu halieke.

Dia꞉mesi 3:13 Mawu Ofanana

Ma꞉tiu 11:29

I̱ma꞉ iki pa꞉ta꞉ kitolo tita꞉ mea ika꞉ peiyokona꞉ tia hata꞉ta꞉ ya hau honda꞉ mea pia꞉pa꞉peke. Pa ekipeke. I̱ta꞉ kimelema꞉ hata꞉ ya pukima꞉ homu pea halome. Koto ekima꞉ta꞉ ikana꞉ma꞉ ika꞉ pukina꞉ lopaasa꞉ ekita꞉ ana꞉na꞉ milimikie.

Ma꞉tiu 21:5

Mo Saioni da teke tieke pa꞉ta꞉ haleme wanda꞉hali pa꞉ta꞉ta꞉ dupa lapeke. Ika꞉ kini tieketa꞉ iki pa꞉ta꞉ taa ipula꞉ handa꞉pe. Ipikita꞉ homu piki hali hata꞉ mo donki ma꞉na꞉na꞉ hoki manda pila꞉me. kutupa mo donki hali ma꞉na꞉ ikiki manda pila꞉me lapa꞉peke laa leekeme.

Ma꞉tiu 5:5

Homu pea hao haleme wanda꞉halima꞉ta꞉ ta꞉na꞉ma꞉ homo halememe. Koda꞉ma꞉ pi la꞉ ula꞉ ekita꞉ ikana꞉ma꞉ milimikie.

Ma꞉tiu 7:24

Kutaata꞉ wanda꞉hali epima꞉ do ya pimanu opuaata꞉ koto alo ekimanu ota꞉ pu haya꞉ka꞉na꞉ta꞉ kota꞉ ipikita꞉ mo hande hone wopu wia toopi manda da a꞉eyeke hali tupa꞉ hala꞉me.

1 Kotindi 6:5

Do alo pita꞉ iki yaala꞉ma꞉ homaaluekema꞉ loa꞉me. Iki pa꞉ta꞉ta꞉ epeke hone wita꞉la꞉ hali homeke ma꞉nda꞉ na hala꞉pe. Kutu piki halima꞉ta꞉ mo Ketiso hameke yaapona꞉ pi yokaalu pitelepeeki epeaapeke na ya꞉la꞉pe.

2 Kotindi 10:1

I̱ta꞉ Poloma꞉ ya kone iki pa꞉ta꞉ honke alome. I̱ta꞉ hande iki ame̱le̱ halo dina꞉ta꞉ homu pea dete polopate iki mina꞉pa꞉lao papate halo dina꞉ta꞉ tanda pola꞉me lo hala꞉ma꞉ somema꞉ loa꞉me. Ketisona꞉ homu toloma꞉ lita꞉la꞉eki pita꞉ a꞉ta꞉ma꞉ homolo hata꞉ puki hala꞉la꞉ ekima꞉ta꞉ I̱ma꞉ iki honke alota꞉

2 Kotindi 8:24

Ika꞉ pukima꞉ homa꞉la꞉ ekita꞉ mo tapake pa꞉ta꞉ wala꞉pa꞉peke. Pa ekipeke mo siosi manuma꞉ hone witolota꞉ mo nikana꞉ma꞉ ika꞉ pi laoma꞉ ekita꞉ ota꞉ ya꞉ka꞉ta꞉me laa hone wina꞉ loa꞉me.

Ka꞉leisia 5:23

kimelema꞉ hala꞉ hau make naka꞉ kone naka꞉ loke hone yaapo lu tombuao hala꞉ hau make ipikana꞉ma꞉ta꞉ koto hau paeyao peawaasa꞉me. Dupiki haumanu sa꞉sa꞉ puluekema꞉ Lo Pi ma꞉nda꞉ ota꞉ na ula꞉me.

Ka꞉leisia 6:1

Ya kametonuo. Ma꞉nda꞉ma꞉ hoke hau pitolo haena꞉ handemeka꞉na꞉ta꞉ kota꞉ iki epita꞉ mo Holi Sipitidima꞉ tumbiki some hombo ikana꞉ma꞉ mo some mea tiao haena꞉ alota꞉ ota꞉ yopu siki pia꞉pa꞉peke. Kuta make mo hande ipiki mea lopaeya꞉ hauma꞉ iki make yola꞉ mea lopaama꞉na꞉ wopu handeteke hata꞉ pia꞉pa꞉peke.

Ka꞉leisia 6:4

Ika꞉ piteleme hau manuta꞉ ika꞉ ika꞉ kone ika꞉ honema꞉ telipa handa꞉pa꞉peke. Homeke halima꞉ ipika꞉ pita꞉la꞉ ekita꞉ ota꞉ hau pia꞉ka꞉na꞉ta꞉ kota꞉ ipika꞉ ota꞉ hauna꞉ ta꞉na꞉ma꞉ homa꞉peke ya꞉la꞉me. Ipikana꞉ma꞉ kutu pia꞉ka꞉na꞉ta꞉ kota꞉ ma꞉nda꞉ma꞉ pita꞉la꞉ hauna꞉ta꞉ hoela꞉ma꞉ a꞉pa꞉la꞉ma꞉ laa na hando telipu hapeke yelieke.

Epesese 4:2

Homu pea yopu hata꞉ta꞉ hoto paeyao handeteke hatiki pea꞉pa꞉peke. Ika꞉ kone tamba꞉ mu alu alu pilimi ekima꞉ta꞉ ika꞉ pukima꞉ homelemeeki peneme yao wala꞉pa꞉peke.

Pilipai 1:27

Ketisona꞉ Pi Seliapoma꞉ puemena꞉ wala꞉la꞉ tupa꞉ pu haleme hauta꞉ ota꞉ tumiki haue. Kutu pilimipate I̱ epoa꞉ka꞉na꞉ make o pa ika꞉ pilimi hauna꞉ pi lalimieki opua꞉ka꞉na꞉ make kota꞉ ikita꞉ taka꞉lao haemeka꞉ta꞉me hone ulueke. Kutupa mo wanda꞉halima꞉ Ketisona꞉ Pi Seliapo pa꞉ta꞉ hone tulaena꞉ ikana꞉ma꞉ ota꞉ homeke hone wia hata꞉ tamba꞉ mualualu pu haemeka꞉ta꞉me hone ulueke.

Kolosi 3:12

Ikita꞉ Koda꞉na꞉ wanda꞉halie. Iki pa꞉ta꞉ pukima꞉ homolo hata꞉ ipika꞉eki hamina꞉ ma̱leke lila꞉me. Koto ekina꞉ta꞉ ikana꞉ma꞉ta꞉ dupiki hau manuta꞉ dau leke yama꞉pa꞉peke. Pukima꞉ a꞉ta꞉ma꞉ homa꞉la꞉eki make yankeke pa꞉ta꞉ a꞉ta꞉ma꞉ homolo tamba꞉ mina꞉la꞉eki make kimelema꞉ homa꞉la꞉eki make homu pea hala꞉eki make homu pea yu wia hala꞉eki paeyaoma꞉ loa꞉me.

1 Timodi 4:12

Wanda꞉halima꞉ neke wekihali hale ekina꞉ handolo hata꞉ ipikita꞉ pa wekie laama꞉na꞉ nakana꞉ma꞉ ota꞉ Ketiso hau moka꞉la꞉ tiaapeke. Koto puluekema꞉ta꞉ naka꞉ pilipi hauma꞉ make naka꞉ lelipi pima꞉ make naka꞉ pukima꞉ homilipi ekima꞉ make naka꞉ hone tulalipi ekima꞉ make naka꞉ tikitiki piki hauma꞉ make koto hau paeyaota꞉ mo pi mineleme wanda꞉halima꞉ ota꞉ handena꞉ lapeke.

1 Timodi 6:11

Nakana꞉ma꞉ Koda꞉na꞉ hali hata꞉ta꞉ koto hau manuta꞉ mone hata꞉ pina꞉ kiao papate leke hapeke. Kutu puluekema꞉ta꞉ kota꞉ nakana꞉ma꞉ mo tikitiki piki hau make Koda꞉na꞉ hau leke pita꞉la꞉ hau make hone tulaasa꞉ hau make pukima꞉ homa꞉la꞉ hau make ki hone na wiki pita꞉la꞉ hau make kimele piki hau pita꞉la꞉ hau make koto hau paeyao ota꞉ muluekee hone u paleke pu hapeke.

2 Timodi 2:25

Ipikana꞉ma꞉ mo pi tunkuleleme wanda꞉hali tikitiki yaasota꞉ kimelema꞉ hauma꞉ta꞉ yopu pu halieke. Koto hau a꞉nda꞉ pu haya꞉ka꞉na꞉ta꞉ kota꞉ ikita꞉ Koda꞉ma꞉ iki pa꞉ta꞉ waleke wiaya꞉ka꞉na꞉ta꞉ ika꞉ pukimanu topo pea mo ota꞉ pina꞉ hone ti laemeka꞉na꞉ta꞉

Taitasi 3:2

Ikana꞉ma꞉ ma꞉nda꞉ pa꞉ta꞉ hoke pimanu na leketa꞉ a꞉nda꞉ pelia ta꞉ma꞉ni pea hata꞉ hoto paeyaota꞉ paeyao pa꞉ta꞉ yopu a꞉ta꞉ma꞉ homolo hata꞉ hapa꞉peke lapeke.

Hibulu 13:5

Mani pa꞉ta꞉ pukima꞉ homa꞉la꞉ hauma꞉ ika꞉ puki na handeteke haena꞉ lapa꞉peke. Koto hau na pikita꞉ pa mo ika꞉ wia halemeeki manuta꞉ ana꞉ pa꞉la꞉me hone wia꞉pa꞉peke. Kutu pulu poloma꞉ ekina꞉ Koda꞉ma꞉ alota꞉ I̱ma꞉ iki hoki na walo make ota꞉ na mina꞉pa꞉lalueke la꞉la꞉me.

Dia꞉mesi 1:21

Koto ekina꞉ keke loluekema꞉ hoke hone wita꞉la꞉ haumanu paeyao make daeyatia pulu hata꞉ hoke hau pita꞉la꞉ ekimanu paeyao make ota꞉ mina꞉pa꞉laota꞉ kutupa Koda꞉ pa꞉ta꞉ homu pea hata꞉ neke mea da꞉taapeke ya꞉la꞉ pi alemanu ipikana꞉ma꞉ ika꞉ puki pa꞉ta꞉ noka꞉paeya꞉ka꞉na꞉ta꞉ ota꞉ mea mendia꞉pa꞉peke.

Dia꞉mesi 2:18

Kutu piliepate hali ma꞉nda꞉ma꞉ dupa lelieke. Nakana꞉ma꞉ naka꞉ hone tulao hale ekina꞉ hone witelepate I̱ma꞉ta꞉ ya hau pitolo ekina꞉ hone witolome laa lelieke. I̱ma꞉ta꞉ hombo peaaso hata꞉ ipiki pa꞉ta꞉ dupa lolueke. Yaka hau pitolo ekima꞉ ya hone tulaalo ekita꞉ waluepate nakana꞉ma꞉ ota꞉ hau na piki naka꞉ hone tulao hale ekita꞉ ekipa walipikipe laa lolueke.

Dia꞉mesi 3:1

Ya kametitio. Iki pa꞉ta꞉ haliweki wopu wala꞉la꞉ hali haluekema꞉ hone na wia꞉pa꞉peke. Do ekina꞉yeke loa꞉me. Koda꞉ma꞉ta꞉ mo pa wanda꞉halina꞉eki pilie tupa꞉ na piki pa mo disa haliweki nikina꞉ hau wotu handilieke.

Dia꞉mesi 3:17

Kutu pita꞉la꞉pateta꞉ oli ya nanema꞉ ipula꞉ hone epekeeki dupae. Titina꞉ amba꞉la kipabaake hone wita꞉la꞉ekie. Kutupa make puki lopa꞉niao pila꞉eki make yopu hala꞉eki make homu pea hala꞉eki make a꞉ta꞉ma꞉ wopu homolo hata꞉ epeke haumanu pita꞉la꞉eki make paeyao ya nanema꞉ ipula꞉pateta꞉ honditi pita꞉la꞉eki make yayapiki hau pita꞉la꞉eki make apa꞉tao na ipula꞉me.

1 Pida 1:15

Koto hau na pikita꞉ iki wi lea꞉ Koda꞉ yako piki hali hala꞉ tupa꞉ iki make ika꞉ hau paeyao tonka꞉na꞉ yako pea hapa꞉peke.

1 Pida 2:12

Ikana꞉ma꞉ pi na ma꞉la꞉ wanda꞉hali taapuna꞉ ota꞉ epeke hau pu hapa꞉peke. Kutu pimikina꞉ta꞉ hande pi na ma꞉la꞉ wanda꞉halima꞉ iki biki hoeyaaluekema꞉ taapilimipate ika꞉ epeke piteleme ekimanu pa꞉ta꞉ handilimikie. Koto ekina꞉ koto wanda꞉halima꞉ta꞉ hande la꞉ ula꞉ nate epea꞉ka꞉na꞉ta꞉ Koda꞉na꞉ biki a꞉meiyalimikie.

1 Pida 2:9

Koto pa꞉la꞉pate ikita꞉ Koda꞉na꞉ ma̱leke lila꞉ tapake halememe. Ikita꞉ mo Kini halina꞉ yeni peao haleme wanda꞉halie. Ikita꞉ mo yakopiki tapakee. Koda꞉na꞉ wanda꞉hali homeke halememe. Ikita꞉ mo timba꞉la꞉ pambeke pa꞉ta꞉ haapa꞉na꞉ ipika꞉ pa̱a̱ pita꞉la꞉eki ota꞉ seliapo pa꞉ta꞉ epoemena꞉ wi lea꞉ Koda꞉ma꞉ ipika꞉ ota꞉ epeke pita꞉la꞉ ekimanu la halamena꞉ iki ma̱leke lila꞉me.

1 Pida 3:4

Koto pa꞉la꞉pate ika꞉ loke tukiki pa꞉ta꞉ hala꞉ ota꞉ wanda꞉ do koto wanda꞉ta꞉ ota꞉ yole epeke haena꞉ lapa꞉peke. Koto yole pea haasa꞉ ekita꞉ hoto paeyao epeke tupa꞉ hao hapa꞉peke ya꞉la꞉me. Mo kimele piki hau make homu piki hau make koto hau yole yaapota꞉ Koda꞉ma꞉ handata꞉ ota꞉ epeke hau tieke hone u hala꞉me.