1 Timodi 2:8 - Panake Pi La: Ula: Buka pita: Kine Pieke Buka

⁸ I̱ma꞉ Siosi paeyao pa꞉ta꞉ halima꞉ yeni pina꞉ hone pa꞉la꞉me. Hali epima꞉ ma꞉nda꞉ pa꞉ta꞉ mineke pankolo o kake neli pita꞉la꞉ hau na piki ota꞉ yako piki hone u paleke hala꞉ hali manuma꞉ mo siosina꞉ mombilimi pa꞉ta꞉ kiki a꞉meiyao yeni pina꞉e.

1 Timodi 2:8 Mawu Ofanana

Ma꞉tiu 21:21

Yesuma꞉ hombo peaaso alota꞉ I̱ma꞉ iki pa꞉ta꞉ ota꞉ ota꞉ pi alome. Ikana꞉ma꞉ hone tulaaso hata꞉ hone ma꞉nda꞉ na wimika꞉na꞉ta꞉ kota꞉ I̱ma꞉ mo nose ti pa꞉ta꞉ pua꞉ tupa꞉ kone ikana꞉ma꞉ make ana꞉na꞉ pea꞉peke yelieke. Kota꞉ koto hau homeke dia꞉ ya꞉la꞉pate ikana꞉ma꞉ ika꞉ kone do pote pa꞉ta꞉ alo hata꞉ Oni ikali pa꞉ta꞉ pua lopee lemeka꞉na꞉ta꞉ kota꞉ mo potema꞉ ota꞉ pilieke.

Ma꞉tiu 5:44

Pate ame I̱ma꞉ iki pa꞉ta꞉ la kitolo ekita꞉ dupa. Ika꞉ a꞉nda꞉ tunkuliki haliweki pa꞉ta꞉ pukima꞉ homo make mo iki tanda kiteme wanda꞉hali epeaena꞉ Koda꞉ pa꞉ta꞉ yeni peao hapa꞉peke.

Ma꞉tiu 6:12

Mandane wanda꞉halima꞉ niki pa꞉ta꞉ hoke hau pimi ekimanu nikana꞉ma꞉ pa paeyaaso hamono nika꞉ hoke hau puma꞉ ekimanu make nakana꞉ma꞉ koto tupa꞉ pa paeyawapeke.

Luku 23:34

Yesuma꞉ alota꞉ Apa꞉o. Do wanda꞉halima꞉ piteleme hauta꞉ iki hone na witolo pitelemema꞉ nakana꞉ma꞉ pa paeyawapeke leekeme. Kutupa mo dolo miniki haliwekima꞉ta꞉ Yesuna꞉ daumanu telipaaluekema꞉ kase tupa꞉ telepo laemekeme.

Luku 24:50

Kutupa Yesuma꞉ mo wanda꞉hali hatuku mo daoni tieke mina꞉pa꞉lao mo Bedani puaata꞉ ipika꞉ kiki mina꞉liao mo wanda꞉hali epeaeyekeme.

Dioni 4:21

Yesuma꞉ ipiki pa꞉ta꞉ alota꞉ Wanda꞉o. I̱ma꞉ do aloeki opua꞉peke. Nate ma꞉nda꞉ ipilieke laa koto nate epea꞉ka꞉na꞉ta꞉ kota꞉ do pote pa꞉ta꞉ hata꞉ make oli Diutuseleme da pa꞉ta꞉ hata꞉ make wanda꞉halima꞉ta꞉ hande Apa꞉ pa꞉ta꞉ yeni na pilimikie laata꞉

Aposolo 10:2

Hande halita꞉ Koda꞉ pa꞉ta꞉ hone wotu u hao ipika꞉ weteke weki wandikima꞉ Koda꞉ pa꞉ta꞉ paala꞉ma꞉ wotu homa꞉tiki pu haemekeme. Kutupa ipika꞉ kiki tindipao mani dia꞉yeke wanda꞉hali pa꞉ta꞉ halo haota꞉ Koda꞉ pa꞉ta꞉ yeni pia꞉tiki pu hayekeme.

Aposolo 10:31

Mo halima꞉ alota꞉ Koniliesio. Naka꞉ yeni pu haleeki make naka꞉ mani halo haleeki make Koda꞉ma꞉ hone wita꞉la꞉me.

Aposolo 10:4

Koniliesima꞉ mo enisolo pa꞉ta꞉ paala꞉ tieke homa handake witolo hata꞉ alota꞉ Tekehalio. Aleke ka꞉ta꞉pe leekeme. Kutupa ipiki pa꞉ta꞉ alota꞉ Naka꞉ yeni pu haleeki make naka꞉ mani halo haleeki make oli hepeni da nane pua Koda꞉ pa꞉ta꞉ naka꞉ pi laasa꞉me leekeme.

Aposolo 21:5

Koto lemepate nikita꞉ koto da pa꞉ta꞉ iki ame̱le̱ haoma꞉ di paeyeketa꞉ iki mina꞉pa꞉lao poma꞉me. Koto haliweki paeyaoma꞉ ika꞉ weki wanda꞉ paeyao ame̱le̱ make daoni nane niki hatuku tapaalo epememe. Kutupa niki paeyaoma꞉ koto dawala ikali tea꞉na꞉ tumiki yotuao pita꞉ yeni puma꞉me.

Aposolo 7:60

Kutupa pa tumiki yotuao pita꞉ anekema꞉ e̱ alo hata꞉ alota꞉ Tekehalio. Do haliwekima꞉ hoke hau piteleme ekita꞉ pa na wina꞉ leke nakana꞉ma꞉ paeyaapeke leekeme. Kotoeki lo paeyaota꞉ homeekeme.

1 Kotindi 1:2

Iki Kotindi daoni pa꞉ta꞉ haleme Koda꞉na꞉ siosi wanda꞉hali pa꞉ta꞉ wape polo pi doe. Koda꞉ma꞉ ikita꞉ ipika꞉ yakopiki wanda꞉hali hamina꞉ wi la꞉la꞉me. Iki mo Yesu Ketiso yaapo ta꞉ma꞉ni pea hata꞉ Koda꞉na꞉eki haleme wanda꞉hali pa꞉ta꞉ loa꞉me. Kutupa mo kenke paeyao pa꞉ta꞉ hata꞉ nika꞉ Tekehali make ika꞉ Tekehali Yesu Ketisona꞉ biki wi aleme wanda꞉hali make iki paeyao pa꞉ta꞉ wape polo pi doe.

1 Kotindi 7:7

Pate iki paeyao I̱ halo tupa꞉ hamina꞉yeke hone pa꞉la꞉pate pa Koda꞉ma꞉ ipika꞉ telipaasa꞉eki manuta꞉ ta꞉ta꞉ ta꞉ta꞉ pikieki telipao hala꞉me.

2 Kotindi 2:14

Kutu pua꞉pate Koda꞉ pa꞉ta꞉ keiyae lomana꞉e. Pa ekipeke Ketiso pa꞉ta꞉ apa꞉tao haloma꞉ ekima꞉ta꞉ Koda꞉ma꞉ nikita꞉ Ketisona꞉ bepolaala꞉ ekima꞉ta꞉ dipula wanda꞉hali leke sama꞉ titina꞉ hatuku pu hala꞉me. Mo Ketiso hone wita꞉la꞉ ekita꞉ Koda꞉ma꞉ niki pa꞉ta꞉ yama꞉ e pokolo hata꞉ mo hande totopopiki ale putu pa꞉la꞉ tupa꞉ kenke honiki paeyao pa꞉ta꞉ putu pa꞉la꞉me.

Pilipai 1:12

Ya Ketiso yankeke tonuo I̱ma꞉ ya hone pa꞉la꞉ ekita꞉ iki paeyaoma꞉ mo hande I̱ pa꞉ta꞉ a꞉pa pia꞉ ekimanu hone uemena꞉e. Koto hande hau manuma꞉ta꞉ mo Koda꞉na꞉ Pi Seliapo sa꞉sa꞉ na pita꞉la꞉pate ota꞉ kende tupa꞉ wina꞉ ala꞉me.

1 Desalonaika 1:8

Hande Tekehalina꞉ pita꞉ iki pa꞉ta꞉ kini pea mo Ma꞉sedonia Akaya yaapo nane homeke pena꞉ na piekeme. Ikana꞉ma꞉ Koda꞉ pa꞉ta꞉ hone tulaasememe la꞉la꞉ ekita꞉ da paeyao pa꞉ta꞉manu pa꞉la꞉me. Koto pa꞉la꞉ ekina꞉ nikana꞉ma꞉ mo wanda꞉hali pa꞉ta꞉ pi ma꞉nda꞉ na lolumeke.

1 Timodi 5:14

Mo a꞉nda꞉ piteleme wanda꞉halima꞉ niki pa꞉ta꞉ hoke pi loluekema꞉ waleke wiaama꞉na꞉ mo Ketiso hala꞉ moputali kosa꞉piki wanda꞉wekita꞉ pa hali ma꞉nda꞉na꞉ da pua wekiwandiki mendia ika꞉ da handeteke haena꞉e hone witolome.

Taitasi 3:8

Koda꞉ pa꞉ta꞉ hone tulaaseme wanda꞉halima꞉ta꞉ mo ika꞉ epeke piteme hau manuma꞉ mo mandane wanda꞉hali tamba꞉ muluekema꞉ hone witolo hata꞉ waleke hala꞉tiki pina꞉ma꞉ nakana꞉ma꞉ do wapena꞉ alo pimanu iki pa꞉ta꞉ ota꞉ wopu la꞉ moneao hapeke.

Hibulu 10:22

Koto pa꞉la꞉ ekima꞉ta꞉ nikana꞉ma꞉ nika꞉ puki pa꞉ta꞉ ota꞉ hau homeke miniki halomeke handa make Koda꞉ pa꞉ta꞉ ota꞉ hone tulaomeke handa make Ketisona꞉ wema꞉ mo nika꞉ hoke hone tekena꞉ tande laaleke halomeke handa make mo kila wiki ikalima꞉ nika꞉ loke tanda꞉paleke handa make koto haloma꞉ ekina꞉ta꞉ ota꞉ Koda꞉ teke pa꞉ta꞉ a꞉pa hamana꞉e.

Dia꞉mesi 4:8

Ikana꞉ma꞉ Koda꞉ teke pa꞉ta꞉ a꞉pa haemeka꞉na꞉ta꞉ ipiki make iki teke pa꞉ta꞉ a꞉pa halieke. Hoke hau peleme wanda꞉halio ika꞉ kiki tanda꞉pa꞉pa꞉peke. Hone yaapo wilimi wanda꞉halio hone hokeeki ma꞉nda꞉ yoka꞉ mea bao hapa꞉peke.

1 Pida 3:7

Haliki tonu iki make haliki hata꞉ta꞉ ika꞉ wanda꞉ta꞉ iki tupa꞉ honkopu na halememe hone wia꞉pa꞉peke. Koto ekina꞉ta꞉ ikana꞉ma꞉ iki pa꞉ta꞉ epeke tupa꞉ hone witolo hata꞉ handeteke hapa꞉peke. Kota꞉ kotota꞉ mo wanda꞉weki iki make iki ame̱le̱ mandakena꞉ Koda꞉na꞉ pa hameke kita꞉la꞉ da꞉ta꞉la꞉ ekita꞉ milimikie. Ala꞉ta꞉ ma꞉nda꞉ma꞉ ika꞉ yeni pu haleme ekimanu sa꞉sa꞉ na pina꞉ koto hau pu hapa꞉peke.