1 Timodi 1:5 - Panake Pi La: Ula: Buka pita: Kine Pieke Buka

⁵ Mo iki pa꞉ta꞉ na lapepee lapeke alo ekina꞉ teketa꞉ kota꞉ mo wanda꞉hali ika꞉ hone teke yako pea make ika꞉ puki lopao make ika꞉ Yesu pa꞉ta꞉ ota꞉ hone tulao halimi ekima꞉ make koto haumanu pilimi ekima꞉ ika꞉ ika꞉ kone pukima꞉ homa꞉ alualu pea haena꞉yeke loa꞉me.

1 Timodi 1:5 Mawu Ofanana

Ma꞉tiu 12:35

Epeke halima꞉ta꞉ ipika꞉ puki pa꞉ta꞉ wilia꞉ hone epeke manuta꞉ ipika꞉ pilia꞉ hauma꞉ peneme yao walieke. Koto tupa꞉ kone hoke halima꞉ ipika꞉ puki pa꞉ta꞉ wilia꞉ hoke hone manuta꞉ ipika꞉ pilia꞉ hauma꞉ peneme yao walieke.

Ma꞉tiu 5:8

Ika꞉ puki pa꞉ta꞉ ala꞉ta꞉ ma꞉nda꞉ na talena꞉ leke wamo pea haleme wanda꞉halima꞉ta꞉ ta꞉na꞉ma꞉ homo halememe. Koto wanda꞉halima꞉ta꞉ Koda꞉ handilimikie.

Aposolo 15:9

Kutu pieke ekima꞉ ipikana꞉ma꞉ta꞉ niki Diu wanda꞉hali make iki Diendaili wanda꞉hali make ta꞉ta꞉ ta꞉ta꞉ pea na haloma꞉eki waleekeme. Ika꞉ hone tulaemeke ekina꞉ ipikana꞉ma꞉ ika꞉ hoke haumanu pa paeyaeyekeme.

Aposolo 23:1

Kutupa Poloma꞉ mo ka̱le̱sete haliweki wotu handake witolo hata꞉ alota꞉ Kametitio. Hokeeki na piki Koda꞉ pa꞉ta꞉ epeke tupa꞉ hatiki pea ame make hata꞉ pua꞉me leekeme.

Aposolo 24:16

Kutu pulu pa꞉la꞉ ekina꞉ I̱ma꞉ta꞉ nate paeyao Koda꞉na꞉ leke minekena꞉ hata꞉ make wanda꞉halina꞉ leke minekena꞉ hata꞉ make yaka pu halo hau pa꞉ta꞉ hokeeki ma꞉nda꞉ taapa꞉paapa꞉na꞉ hone wotu wia hao halome.

Loma꞉ 10:4

Mo hande Lo Pimanu wieke dita꞉ Ketisoma꞉ paeyaala꞉ ekina꞉ ameta꞉ hone tulaaseme wanda꞉halita꞉ Koda꞉ma꞉ ipiki yaapo tikitiki yao haena꞉ ala꞉me.

Loma꞉ 12:9

Wanda꞉hali pa꞉ta꞉ pukima꞉ homemeka꞉na꞉ta꞉ kota꞉ ota꞉ pukima꞉ homa꞉pa꞉peke. Ikana꞉ma꞉ hokeeki handaata꞉ linka꞉ la꞉pa lopa hapa꞉peke. Epeke ekita꞉ mea mina hapa꞉peke.

Loma꞉ 14:15

Nakana꞉ma꞉ ne ma꞉nda꞉ nale ekima꞉ta꞉ naka꞉ Ketiso yankeke ma꞉nda꞉ hala꞉mba꞉liao mea lopaeka꞉na꞉ta꞉ kota꞉ nakana꞉ma꞉ ipiki pa꞉ta꞉ pukima꞉ homa꞉la꞉eki pitolo na piteleme. Ketisota꞉ mo hali pa꞉ta꞉ homeekepate kone nakana꞉ma꞉ ne ma꞉nda꞉ nale ekima꞉ mo hali na hoeyaena꞉ lapeke.

Loma꞉ 9:1

I̱ma꞉ alo ekita꞉ ota꞉ pi alome. I̱ta꞉ Ketisona꞉eki ota꞉ hata꞉ yayapiki pi na alome. Holi Sipitidima꞉ yaka hone pa꞉ta꞉ handeteke haena꞉ I̱ma꞉ta꞉ yayapiki pi aleme laa ya hone pa꞉ta꞉ kone na ala꞉me.

1 Kotindi 13:1

Da ta꞉ta꞉ ta꞉ta꞉ pimanu make mo enisolo titina꞉ pi make alo hali hata꞉ta꞉ pukima꞉ homa꞉la꞉ hau na pitolo hata꞉ la꞉tiki pu haowa꞉ka꞉na꞉ta꞉ kota꞉ yaka pi aloeki manuta꞉ mo beto pa lita꞉la꞉ ekima꞉ handekeeki o pa ti ka꞉ka꞉pa꞉ ka꞉ka꞉pa꞉ laasa꞉ ekima꞉ handekeeki kone alome.

2 Kotindi 1:12

Nika꞉ honema꞉ ota꞉ hau pelememe laa peneme yaasekena꞉ ta꞉na꞉ma꞉ homoloma꞉ ekita꞉ dupae. Nika꞉ pitoloma꞉ hau paeyao pa꞉ta꞉ta꞉ Koda꞉ma꞉ kita꞉la꞉ yakopiki hau make tikitiki piki hau make pitoloma꞉me. Dupiki hau manuta꞉ do kenkena꞉ hone u lenkena꞉ peaasa꞉eki pa꞉ta꞉ na a꞉pa꞉la꞉me. Pate mo Koda꞉na꞉ a꞉ta꞉ma꞉ homa tamba꞉ mina꞉la꞉ ekima꞉ homeke puma꞉me Dupiki haumanu puma꞉ ekita꞉ mo wanda꞉hali paeyao pa꞉ta꞉ puma꞉pate pa iki pa꞉ta꞉ homeke hone wopu witolo hata꞉ puma꞉me.

Ka꞉leisia 5:22

Koto pa꞉la꞉pate mo Holi Sipitidima꞉ta꞉ epeke haumanu dupa peawaasa꞉me. Pukima꞉ homa꞉la꞉ hau make puki tukiki nane ota꞉ ta꞉na꞉ma꞉ homa꞉la꞉ hau make puki lopaasa꞉ hau make homu pea yu wia hala꞉ hau make a꞉ta꞉ma꞉ homolo epeke pita꞉la꞉ ekima꞉ ma꞉nda꞉ tamba꞉ mina꞉la꞉ hau make hone tulao hata꞉ e poka꞉la꞉ hau make

Ka꞉leisia 5:6

Niki Yesu Ketiso pa꞉ta꞉ tunao haoma꞉ka꞉na꞉ta꞉ sekemesaisi hau pita꞉la꞉eki make sekemesaisi hau na pita꞉la꞉eki make koto hau telipina꞉ta꞉ pa pa alema꞉ handa꞉la꞉me. Pate hone tulaaso hata꞉ pukima꞉ homa꞉ alualu pu haemeka꞉na꞉ta꞉ kota꞉ koto hauta꞉ ota꞉ekie.

1 Timodi 1:18

Ya weki Timodio. I̱ma꞉ amba꞉ neke hone witolo hata꞉ la꞉ wia꞉ pita꞉ koto la꞉ wia꞉ tupa꞉ kone ame nakana꞉ma꞉ pea꞉peke alome. Koto la꞉ wia꞉ pi manuta꞉ naka꞉ a꞉nda꞉ pita꞉la꞉ ale leke miniki hata꞉ a꞉nda꞉ epeke tupa꞉ pea꞉peke.

1 Timodi 1:19

Kutupa naka꞉ hone tulaleeki wopu miniki hata꞉ naka꞉ hone tekemanu ha̱i̱ peaapa꞉na꞉ wopu handeteke hapeke. Mandane haliwekima꞉ta꞉ ika꞉ hone tekemanu pendulu baemeke handaata꞉ ika꞉ hone tulaaseme ekita꞉ mo hande sisima kawasota꞉ toopina꞉ tulaaso yambolo hoeta꞉la꞉ tupa꞉ ika꞉ hone tulaasemeeki make koto tupa꞉ kone ota꞉ hoeyaasememe.

1 Timodi 3:9

Kutupa hokeeki ika꞉ hone teke pa꞉ta꞉ na u pelia haena꞉ alo hata꞉ta꞉ mo wala꞉ tiaeyeke ota꞉ pimanu wotu miniki hao halimikie.

2 Timodi 1:3

Ya apa꞉na꞉ atekena꞉ atekema꞉ Koda꞉ pa꞉ta꞉ hone tulao hao haemeke tupa꞉ I̱ make ya hone tekema꞉ ala꞉ta꞉ ma꞉nda꞉ na ta̱le̱na꞉ leke koto tupa꞉ kone hone tulao halome. I̱ma꞉ timba make natena꞉ make neke hone na yonka꞉lake Koda꞉ pa꞉ta꞉ yeni pitolo keiyae pi lo halome.

2 Timodi 1:5

Mo naka꞉ ota꞉ hone tulale ekita꞉ I̱ma꞉ niminao halome. Naka꞉ aeya꞉ Loisi pita꞉ naka꞉ ama꞉ Yunisi yaapoma꞉ make do mandake hone tulaepe ekita꞉ ya honema꞉ta꞉ neke pa꞉ta꞉ make taa ula꞉me.

2 Timodi 2:22

Nakana꞉ma꞉ mo wekihali hata꞉ mo wekiwandikima꞉ ika꞉ lokena꞉ hoke hone u alualu pita꞉la꞉ haumanu wendia꞉peke. Nakana꞉ma꞉ mo iki tamba꞉ mina꞉ ika꞉ yako piki pukima꞉ ika꞉ Tekehali o laa wi lo haleme wanda꞉hali ame̱le̱ hata꞉ mo tikitiki piki hau make hone tulaasa꞉eki make pukima꞉ homa꞉la꞉eki make a꞉nda꞉ peliaasa꞉eki make muluekema꞉ hone ha paleke pua꞉peke.

Taitasi 1:15

Yako piki hau pu hala꞉ somema꞉ paeyaota꞉ pa yako pikieki homeke hone u hala꞉pate pa mo pi na miki ha̱i̱piki hone u hala꞉ somema꞉ paeyaota꞉ yako pikieki dia꞉me hone u hala꞉me. Pa ekipeke ipika꞉ hone wita꞉la꞉ ekimanu make ipika꞉ puki make ha̱i̱ pitolo pita꞉la꞉me.

Hibulu 10:22

Koto pa꞉la꞉ ekima꞉ta꞉ nikana꞉ma꞉ nika꞉ puki pa꞉ta꞉ ota꞉ hau homeke miniki halomeke handa make Koda꞉ pa꞉ta꞉ ota꞉ hone tulaomeke handa make Ketisona꞉ wema꞉ mo nika꞉ hoke hone tekena꞉ tande laaleke halomeke handa make mo kila wiki ikalima꞉ nika꞉ loke tanda꞉paleke handa make koto haloma꞉ ekina꞉ta꞉ ota꞉ Koda꞉ teke pa꞉ta꞉ a꞉pa hamana꞉e.

Hibulu 13:18

Koda꞉ma꞉ niki tamba꞉ mina꞉ yeni na mina꞉pa꞉lake wopu peao hapa꞉peke. Nikana꞉ma꞉ hoto paeyao ota꞉ tikitiki piki hau puluekema꞉ taapo haloma꞉me. Koto ekina꞉ nika꞉ hone teketa꞉ Koda꞉na꞉ leke popelekena꞉ ota꞉ tikitiki pa꞉la꞉me hone witoloma꞉me.

Hibulu 9:14

kota꞉ mo Ketisona꞉ wema꞉ta꞉ koto titina꞉ hau ota꞉ lombei peao hau tieke peaapeke ya꞉la꞉me laa hone wipee. Ipikana꞉ma꞉ta꞉ mo na paelo pa꞉la꞉ Sipitidi pa꞉ta꞉ yama꞉ ala꞉ta꞉ ma꞉nda꞉ na ta̱lekeeki ipiki kone Koda꞉ pa꞉ta꞉ haleekeme. Nikana꞉ma꞉ mo da꞉ta hao hala꞉ Koda꞉na꞉ e ana꞉na꞉ pokomono ipika꞉ wema꞉ nika꞉ hone teke pa꞉ta꞉ ula꞉ popeke na piki haumanu tandepo halieke.

Dia꞉mesi 4:8

Ikana꞉ma꞉ Koda꞉ teke pa꞉ta꞉ a꞉pa haemeka꞉na꞉ta꞉ ipiki make iki teke pa꞉ta꞉ a꞉pa halieke. Hoke hau peleme wanda꞉halio ika꞉ kiki tanda꞉pa꞉pa꞉peke. Hone yaapo wilimi wanda꞉halio hone hokeeki ma꞉nda꞉ yoka꞉ mea bao hapa꞉peke.

1 Pida 1:22

Koda꞉na꞉ ota꞉ pi opua pu haleme ekima꞉ta꞉ ika꞉ temoko yako pina꞉ lelememe. Ame ika꞉ Ketiso yankeke ota꞉ pukima꞉ homa halememe. Koto pelemepate ika꞉ puki paeyaoma꞉ pukima꞉ ota꞉ homa꞉ alualu pu hapa꞉peke.

1 Pida 3:16

Koto pa꞉la꞉pate ikana꞉ma꞉ hombo peaemeka꞉na꞉ta꞉ epeke hone witolo hata꞉ homu pikima꞉ lapa꞉peke. Ika꞉ hone teke tikitiki yao hala꞉ tupa꞉ kone haena꞉ lo hapa꞉peke. Koto pimika꞉na꞉ta꞉ iki mo Ketisona꞉ hoki nane telia꞉la꞉ wanda꞉hali hata꞉ epeke hau pu halemeeki handata꞉ mo mandane wanda꞉halima꞉ do hauta꞉ hokeekie lemeka꞉na꞉ta꞉ wetepena꞉ koto leme ekina꞉ yaala꞉ma꞉ homena꞉ yeke ika꞉ hone teke tikitiki yao haena꞉ lapa꞉peke.

1 Pida 3:21

Koto ikalita꞉ mo hande wetepena꞉ bapitaisi hau epolo piekeeki manda mieke ikalie. Do ame pu haleme bapitaisi hauma꞉ta꞉ pa ika꞉ lokena꞉ ha̱i̱ tanda꞉ pelemeeki dia꞉ya꞉la꞉pate ika꞉ epeke hone tekema꞉ Koda꞉ pa꞉ta꞉ pi la꞉ witolo hamena꞉ mo ikalima꞉ iki petolo hala꞉me. Do bapitaisi hauta꞉ mo Yesu Ketisona꞉ paa tiaeyeke ekima꞉ iki petolo hala꞉me.

1 Pida 4:8

Pukima꞉ homa꞉la꞉ ekima꞉ta꞉ hoke hau eleke eleke a꞉mbao haleke handa ika꞉ titina꞉ hauta꞉ pukima꞉ ota꞉ wopu homa꞉ alualu pu hapa꞉peke.

2 Pida 1:7

Kutupa ika꞉ Koda꞉na꞉ hau leke piteleme hau pa꞉ta꞉ta꞉ kame pa꞉ta꞉ ta꞉na꞉ma꞉ homelemeeki apa꞉taapa꞉peke. Kutupa kame pa꞉ta꞉ ta꞉na꞉ma꞉ homeleme hau pa꞉ta꞉ta꞉ ma꞉nda꞉ pa꞉ta꞉ pukima꞉ homelemeeki apa꞉taapa꞉peke.

1 Dioni 3:10

Mo Koda꞉na꞉ wekiwandiki pita꞉ mo Hoke Temokona꞉ wekiwandiki yaapo ata꞉ka꞉ tieke pa꞉la꞉ ekita꞉ dupae. Ma꞉nda꞉ epima꞉ mo ota꞉ hau na pu o ipika꞉ yankeke pukima꞉ na homo pia꞉ka꞉na꞉ta꞉ ipikita꞉ Koda꞉na꞉ weki na hala꞉me.

1 Dioni 3:23

Kutupa ipikana꞉ma꞉ mo niki pa꞉ta꞉ pipee ala꞉ ekita꞉ dupa. Nikana꞉ma꞉ ipika꞉ Eiyeke Yesu Ketiso pa꞉ta꞉ hone tulao hata꞉ make pa mo hande Yesuma꞉ leeke tupa꞉ kone niki ame̱le̱ pukima꞉ homa꞉ alualu pu hapa꞉peke.

1 Dioni 3:3

Pea꞉ epima꞉ Ketiso pa꞉ta꞉ dupiki hone puao haya꞉ka꞉na꞉ta꞉ kota꞉ koto somema꞉ mo Ketisota꞉ ala꞉ta꞉ ma꞉nda꞉ na ta̱lolo hata꞉ pa yako peaa hala꞉ tupa꞉ ipiki make ha̱i̱ peaama꞉na꞉ pa yako peatiki pu hala꞉me.