Yohane 5:24 - Sura Malelaha

²⁴ Tou mpuu lolitaNgku ide: hema-hema au mampehadingi lolitaNgku hai mepoinalai i Pue Ala au motuduNa, molambihe katuwo maroa au bara mokahopoa. Barahe ina rahuku anti dosanda. Tekabahamohe hangko i kapate, hai molambihe katuwo.

Yohane 5:24 Mawu Ofanana

Matiu 25:46

Napahopo Yesu lolitaNa, Nauli, “Ope-ope tauna au kadake iti ina ratendehe i lalu naraka hai rahuku hawe i hae-haena, hai tauna au manoto ina molambihe katuwo maroa au bara mokahopoa.”

Markus 16:16

Hema-hema au mepoinalai Iriko hai rariu, ina tehoremahe hangko i huku dosanda. Agaiana hema au bara mepoinalai batena rahuku.

Yohane 11:26

Hai ope-ope tauna au molambi katuwo hangko i pepoinalainda Iriko, barahe ina mate hawe i hae-haena. Ba Nupoinalai au Kuuli ide?”

Yohane 12:44

Mololitami Yesu masisimbuku, Nauli, “Tauna au mepoinalaihe Iriko, bara Iko pea au rapoinalai, mepoinalai womohe Pue Ala au motuduNa.

Yohane 20:31

Agaiana apa au kuuki ide, kuuki bona nipoinalai kaYesunami Datu Topehompo, Anana Pue Ala, hai bona molambikau katuwo maroa au bara mokahopoa hangko i pepoinalaimi Iria.

Yohane 3:16

Anti kamahilena ahina Pue Ala i ope-ope tauna i dunia, ido hai Nakirami AnaNa au HaduduaNa bona hema pea au mepoinalai Iria, bara rahuku, agaiana molambi katuwo maroa au bara mokahopoa.

Yohane 3:18

Tauna au mepoinalai i Anana Pue Ala, barahe ina rahuku. Agaiana tauna au bara mepoinalai, manotomi kanahukunda Pue Ala, lawi barahe mepoinalai i Anana Pue Ala au Haduduana.

Yohane 3:36

Tauna au mepoinalai i Anana Pue Ala iti, molambihe katuwo maroa au bara mokahopoa. Agaiana tauna au bara mengkoru i Anana Pue Ala, barahe molambi katuwo iti. Molambirihe pehukuna Pue Ala au bara mokahopoa.

Yohane 4:36

Tauna au mopahawehe Ngkorana Pue Ala peisa rapandiri nodo tauna au mantuda hai au mepare. Ide-ide masilolongami saronda topepare iti, hai mepongkamohe mogulu wuana. Anti pobagonda, bosa tauna molambi katuwo maroa au bara mokahopoa. Hai kahopoana ina matana-tanahe hihimbela hai tauna au mantuda.

Yohane 6:40

Idemi peundeana UmaNgku: bona ope-ope tauna au moitaNa hai au mepoinalai Iriko AnaNa, ina molambihe katuwo maroa au bara mokahopoa, hai ina Kupopearohe i alo pebotusi.”

Yohane 6:47

Tou lolitaNgku ide: hema au mepoinalai Iriko, molambihe katuwo maroa au bara mokahopoa.

Yohane 6:50

Agaiana idemi paande au tou-tou, au mendaulu mai hangko i suruga. Hema pea au moande paande ide, barahe ina mate.

Yohane 6:51

Ikomi paande au mendaulu mai hangko i suruga, paande au mepatuwo! Tauna au moande paande ide molambihe katuwo au bara mokahopoa. Paande au mepatuwo ide, lempona wataNgku au Kukira bona manusia molambi katuwo.”

Yohane 6:58

Itimi paande au mendaulu hangko i suruga. Paande iti bara nodo manna au raande toiorumi hangkoia. Naurihe maande manna iti, batenda mate. Agaiana tauna au moande paande ide, ina tuwohe hawe i hae-haena.”

Yohane 8:51

Tou mpuu lolitaNgku ide: hema au mampeulai lolitaNgku, barahe ina mate i hae-haena.”

Roma 8:1

Mewali, ide-ide barapi ara pehuku irikita au mohintuwumoke hai Kerisitu Yesu.

1 Tesalonika 5:9

Napileike Pue Ala bona barake rahuku, agaiana Napileike bona molambike katuwo maroa i lalu kaNahoremanta Amputa Yesu Kerisitu.

1 Peturu 1:21

Anti kahaweNa, ido hai mepoinalaikau i Pue Ala au mopatuwo hule Yesu hangko i kapate hai mowei katuwo mahile Iria, alana mepoinalaikau hai meharungakau i Pue Ala.

1 Peturu 1:5

Hai anti pepoinalaimi, Nakampaikau Pue Ala hai kuasaNa hangko i ope-ope dake bona molambikau katehorema au ina Napatongawa i kahopoa dunia.

1 Yohane 3:14

Ane mampokaahike halalunta, taisa katekabahanta hangko i kapate hai molambike katuwo maroa au bara mokahopoa. Agaiana tauna au barahe mampokaahi halalunda, bara manihe tekabaha hangko i kapate.

1 Yohane 5:1

Ope-ope tauna au mampoinalai Yesu iami Datu Topehompo, ihirami au napoana Pue Ala. Hai hema au mampokaahi Pue Ala Umanta, batena mampokaahi wori ope-ope tauna au napoana Pue Ala.