Yakobu 1:12 - Sura Malelaha

¹² Morasihe tauna au mantaha i lalu kapari hai pampetandaka. Lawi ane pepoinalainda mantaha i pampetandaka iti, ina molambihe katuwo au bara mokahopoa au nadandimi Pue Ala i tauna au maahi Iria.

Yakobu 1:12 Mawu Ofanana

Matiu 10:22

Ina rakahihikau ope-ope tauna anti peulami Iriko. Agaiana tauna au meula liliu Iriko duuna i kahopoana ina tehoremahe.

Matiu 25:34

Hai Iko Datu, Kuuliangaahe au ntanda i koanaNgku, ‘Maimokau au nawati UmaNgku! Mesuamokau i lalu poparentaKu. Paidaami Kupasilolonga amiamokau hungka i pewalina dunia hangkoia.

Lukasi 6:22

Morasikau au rakahihi, au barakau rapohintuwua, rakakabosai hai rasalai tauna anti peulami Iriko Ana Manusia.

Roma 5:4

Hai ane mantahake, peisake monangi pekelo, hai Pue Ala ina mampokatana babehianta. Hai ane taisa babehianta moula peundeana Pue Ala, batena kamaroho-rohoa peharunganta i Pue Ala.

Roma 8:28

Taisami ide-ide Pue Ala mobago wori i paka-pakana bona mopaara roa ngkatuwo i ope-ope tauna au mampokaahi Pue Ala, iami i tauna au Nakakio hintoto hai tunggaiaNa.

1 Korintu 2:9

Agaiana ara teuki i lalu Sura Malelaha node: “I tauna au mampokaahi Pue Ala, Napasilolongaamohe au maroa mpuu, au bara mani raita ba rahadi tauna, hai au bara mani hambela mesupa i pekiri manusia.”

1 Korintu 8:3

Agaiana tauna au tou-tou mampokaahi Pue Ala, naisa Pue Ala lalunda.

1 Korintu 9:25

Tauna au momberiri iti, hangangaa mokampai watanda, molati liliuhe hai mampeulaihe atura pelangka. Hangangaa mokuasaihe watana i paka-pakana bona molambihe parasee. Parasee iti, iami bunga au ina malau pea. Agaiana ikita, hangangaa mantahake i hinangkana kapari lawi mampeinaoke molambi parasee au bara mokahopoa.

2 Timotiu 2:15

Agaiana oio Timotiu, mopahaweko paturo au tou i kanoto-notoana. Nupakaroho mpuu pampopolumaomu bago iti; ineeko maea. Ane nubabehi nodo, Pue Ala ina mampokatana bagomu hai Naimbako topobagoNa au maroa.

2 Timotiu 4:8

Mewali ide-ide, tepasilolongami paraseengku i suruga anti penangingku, lawi kupeulaimi peundeana Pue. Paraseengku iti ina naweina Pue, Topebotusi au manoto i alo pebotusi. Hai bara iko pea au ina molambi parasee iti. Agaiana ina rawei worihe ope-ope tauna au hangko i lalunda mampegia kahaweNa hule Pue.

Ibarani 10:32

Nikatuinao, halalu, noumba katuwomi hangkoia i pepongkami mepoinalai i Pue Yesu. I tempo iti, narumpakau ngkaia kapari anti peulami i Pue. Agaiana nauri nodo, barakau mousuli; mia-mia maroho liliu pepoinalaimi.

Ibarani 11:17

Anti pepoinalaina Burahima, i tempona napetandaka Pue Ala, ia lao mohuhu Isaki anana mewali popenombana. Hangkoia Pue Ala mololita iria, Nauli, “Batena pea pemuleana Isaki au ina raimba pemuleamu moula apa au Kudandiako.” Agaiana nauri nodo, bula laluna Burahima mohuhu anana au haduduana mewali popenombana.

Ibarani 12:5

Hai inee naliu inaomi paturona Pue Ala irikamu anaNa, au manguli, “Anangku, nipailalu maroa paturona Pue, hai inee koi inaomi ane Nakambaroakau.

Ibarani 6:15

Burahima mepoinalai liliu i Pue Ala duuna molambi apa au Nadandia Pue Ala.

Yakobu 2:5

Halalungku au kupokaahi! Nipehadingi maroa: tauna au meahi-ahi tuwonda i dunia ide napileihe Pue Ala bona mewalihe pebuku i pepoinalainda. Ina molambi sosoranda i lalu poparentaNa moula dandina Pue Ala i tauna au maahi Iria.

Yakobu 5:11

Tauna au mantaha i lalu kapari, ihirami au rauli morasi. Niisami tuntukana Ayubi au mantaha i lalu kapari. Hai kahopoana, ia nawati Pue Ala. Lawi Pue Ala maroa laluna hai maahi ntepuu.

1 Peturu 3:14

Agaiana ane rapana molambikau kapari hangko i babehiami au manoto, morasikau! Mewali, ane arahe tauna au mampopalangakau, ineehe nipokalanga hai inee karao inaomi.

1 Peturu 4:13

Aginari nipokatana, lawi molambimokau kirami i lalu kapari au morumpa Kerisitu. Ido hai halalu, ane hawe tempona Kerisitu mopatongawa peawana tuwoNa i ope-ope tauna, ina matana mpuukau.

1 Peturu 4:14

Morasikau, halalu, ane rakakabosaikau anti peulami i Kerisitu, lawi Inao Malelaha au meawa au hangko i Pue Ala maida liliu i lalumi.

1 Peturu 5:10

Hai ane liumi kapari au hampalai iti, Pue Ala ina mopahandai apa au makura irikamu. Lempona, Ia ina mopakaroho pepoinalaimi, mopamanoto tuwomi hai mopatetida lalumi. Lawi Pue Ala iami pongkana ope-ope ahi. Ia mokakiokau mewali anaNa bona anti pohintuwumi hai Kerisitu, ina molambikau kirami i lalu kamahilena tuwoNa au bara mokahopoa.

1 Peturu 5:4

bona ane hawe Toporewunta au meawa tuwoNa, ina Naweikau hambua songko datu au mengkila-ngkila liliu hawe i hae-haena.

1 Yohane 4:19

Mampokaahike Pue Ala hai halalunta, lawi Pue Ala iorumi mampokaahike.

Pampetudungia 2:10

Bona niisa: Datu Tokadake ina motarunggu hanggaa hangko irikamu, hai ina nakelokau bona mousulikau hangko i pepoinalaimi. Ina rapopeahi-ahikau hampulo alona kamahaena. Agaiana inee nipokalanga pepopeahi-ahi iti. Hangangaa mantahakau i lalu pepoinalaimi kehapirikau rapapate. Ane nodo nibabehi, ina Kuweikau katuwo maroa au bara mokahopoa, hurungina penangimi.

Pampetudungia 3:19

Ope-ope tauna au Kupokaahi, Kupaturo hai Kukambaroa bona moulahe paturoNgku. Ido hai Kuuli, nibaliki lalumi, hai menosokau!

Pampetudungia 3:21

Hema au menangi, ina Kupopohuda hihimbela hai Iko i kadera kadatuaNgku, nodo Iko au menangimoNa, hai mohudaNa moparenta hihimbela hai UmaNgku i kadera kadatuaNa.