Roma 6:2 - Sura Malelaha

² Inee tapehangu nodo halalu! Bara hintoto ane mobabehi liliuke dosa, lawi matemoke hihimbela hai Kerisitu bona dosa barapi makuasa irikita.

Roma 6:2 Mawu Ofanana

Lukasi 20:16

Batena topokadipura bondena iti maihe napapate, hai bondena ina naweihe tauna ntanina.” Karahadina tauna bosa ngkora pandiri iti, mololitamohe i Yesu, rauli, “Inee mpuu hawe mewali nodo! Ikita to Yahudi, barake ina nahuku Pue Ala nodo topokadipura bonde i lalu ngkora pandiriMu iti!”

Roma 5:11

Hai bara pea iti, matana mpuu lalunta mampokatana roana Pue Ala au tahumba anti kanapahuruntami Amputa Yesu Kerisitu. Lawi hangko i Yesu Kerisitu, maroami pohintuwuta hai Pue Ala.

Roma 6:15

Mewali noumba halalu! Ane nahoremamoke Pue Ala bara anti pampeulainta Aturana Musa, agaiana anti kabulana pea laluna Pue Ala, ba peisamoke mobabehi dosa? Inee nodo halalu.

Roma 7:4

Nodo wori ikita, halalu: Hangkoia tetaka manike i Aturana Musa. Agaiana ane matemoke hihimbela hai Kerisitu, tebolehimi pohintuwuta hai atura iti. Hai ide-ide, mohintuwumoke hai tohaduana, iami Kerisitu au tuwo hule hangko i kapate. Anti pohintuwuta hai Kerisitu, mobundumoke i Pue Ala.

Roma 7:6

Agaiana ide-ide, tekabahamoke hangko i Aturana Musa au motakake hangkoia lawi matemoke hihimbela hai Kerisitu. Mewali, barapoke moula rara au hae; moula atura-atura au teuki. Ide-ide moulamoke rara au wou; mengkoruke i Pue Ala anti kuasana Inao Malelaha.

Galatia 2:19

Lawi hangko i Aturana Musa, kuisa kamasalangku. Hintoto mpuuna rahuku mate. Bara mpuu ara rarangku mewali manoto i peitana Pue Ala i lalu pampeulaingku Aturana Musa. Ido hai kukabahami pampeulaingku Aturana Musa bona mampeulaina peundeana Pue Ala. I peitana Pue Ala, matemona hihimbela hai Kerisitu, lawi Ia matemi mopahuruna.

Galatia 6:14

Agaiana iko, bara kuunde rapomahile i raoa hangko i kapatena Pue Yesu Kerisitu i kau mombehape. Lawi ope-ope au peisa raita i dunia ide hai au raimba mahile holona barapi ara bunduna iriko. Hai tauna i dunia ide, bara ara au tedii lalunda i apa au kupomahile.

Kolose 2:20

Ikita au mepoinalai i Kerisitu himbela pea matemoke hai Kerisitu, lawi anti pohintuwuta hai Ia, tekabahamoke hangko i ada hai atura-atura iti. Barapoke mampeulai ada hai atura iti bona mewalike manoto i peitana Pue Ala. Mewali, ane matemoke hihimbela hai Kerisitu, ineemokau mengkoru i atura au ngkaia pakana iti, nodo tauna au bara mani moisa Kerisitu.

Kolose 3:3

Lawi ikita matemoke hihimbela hai Ia. Hai mohumbake katuwo au wou hangko i Kerisitu, au maida hihimbela hai Pue Ala i suruga. Kerisitu au moweike katuwo au wou. Ide-ide, bara mani taita, agaiana ane hawe hule deade, Ia ina motudungiake kuasaNa hai peawana tuwoNa. Hai ikita halalu, ina rapomahile worike hihimbela hai Ia.

1 Peturu 1:14

Napoanamokau Pue Ala, ido hai hangangaa nipeulai hawaNa. Ineekau moula peundeami haduduami nodo hangkoia i tempomi mani tuwo i lalu kamakaindi.

1 Peturu 2:24

Yesu haduduana mohalea huku dosanta i karapapateNa i kau mombehape bona tekabahake hangko i kuasa dosa hai tuwoke moula peundeana Pue Ala. KapateNa iti moanti katuwo maroa irikita.

1 Yohane 3:9

Ope-ope tauna au napoana Pue Ala, barapohe mobabehi dosa, lawi poantina Pue Ala arami i lalunda. Barapohe mobabehi dosa, lawi napoanamohe Pue Ala.