Pilipi 2:16 - Sura Malelaha

¹⁶ i lalu pobambarimi Ngkora Marasa au mopaara katuwo maroa. Mewali halalu, ane nodo liliu babehiami, ina matana lalungku i kahawena hule Kerisitu, lawi babehiami iti ina mopakanoto kadana mbero-mbero pobagongku i olomi; ara mpuu wuana.

Pilipi 2:16 Mawu Ofanana

Matiu 10:27

Apa au Kuuliangaakau au bara rahadi tauna ntanina, hangangaa nipololita i ope-ope tauna. Apa au Kukaneniakau i talingami, nipasimbuku kanipahawena i talinganda tauna bosa.

Lukasi 12:8

“Pehadingi maroa lolitaNgku: hema au mopangaku i lindonda tauna bosa peulana Iriko, Ana Manusia, ia ina Kupangaku wori i lindonda malaekana Pue Ala.

Yohane 6:63

Inaonami Pue Ala au mowei katuwo. Kamaroho manusia bara mobundu. Lolita au Kupahaweakau mesuwu hangko i Inaona Pue Ala hai katuwo.

Yohane 6:68

Mehana Simo Peturu, nauli, “Ane kipalehiKo Pue, i hemamongkai lao? Oio pea au mohowara lolita au mopaara katuwo maroa hawe i hae-haena.

Suro 13:26

“Halalungku pemuleana Burahima, hai ikamu wori au barakau to Yahudi au menombakau i Pue Ala: irikita rapahawe bambari au mopakanoto rara bona peisake tekabaha hangko i huku dosanta.

1 Korintu 1:8

Ia ina mopakaroho pepoinalaimi duuna i kahopoa dunia bona ane Nakahaweikau Amputa Yesu Kerisitu i kahaweNa hule, barapi ara kamasalami.

1 Korintu 9:26

Tauna au momberiri melangka, barahe melangka mbero, ara mpuu au ratunggai. Tauna au motinju, bara peunde-undeanda pea mejangguru. Nodo wori iko, peisana rapandiri nodo tauna au melangka ba au motinju, lawi barana mobago mbero-mbero. Apa au kubabehi, kubabehi bona molambina parasee.

Galatia 2:2

Laona i Yerusale lawi Napatongawami Pue Ala iriko hangangaa laona. Kahawengku i Yerusale, kupombelambiamohe penatua hai mogombongkai. Kupahaweamohe kana i pobambaringku Ngkora Marasa i tauna au barahe to Yahudi. Kupahaweahe lawi kupokalanga: paturongku ina rasalai duuna barapi ara bunduna pobagongku mopaturo tauna kana i Ngkora Marasa, maroa au roomi kupobago, maroa au tangana mani kupobago.

Galatia 4:11

Au kupokalanga, bara ina mobundu kamawowengku mopahawe Ngkora Marasa irikamu.

Pilipi 1:10

Halalu, kuperapi nodo bona niisa rara mopilei apa au maroa ntepuu hai bona malelaha tuwomi duuna barapi ara kamasalami i alo kahawena hule Kerisitu.

Pilipi 1:6

Pue Ala au mobago i lalumi, hai maroa mpuu bago au Napepongka i lalu katuwomi. Hai kupoinalai Pue Ala ina mopaliliu bago iti duuna hopo apa au Natunggai i lalu katuwomi i alo kahawena hule Kerisitu Yesu.

1 Tesalonika 2:19

Kipeinao mpuu mosondakikau, lawi ane hawemi Amputa Pue Yesu hai moguluke i lindoNa, ikamumi au mewali wua pobagongki au kipokatana. I tempo iti ina mahile ntepuu kamatanana lalungki anti kaikamuna.

1 Tesalonika 3:5

Ido hai kutudu Timotiu lao irikamu bona kuisa noumba pepoinalaimi, lawi barapi kubuku motaha kamabilangku. Hai kupokalanga, nakelokau pae Datu Tokadake duuna napakanawokau hai barapi mobundu pobagongki mobambari Ngkora Marasa irikamu.

Ibarani 4:12

Lawi Ngkorana Pue Ala iami lolita au tuwo hai au makuasa. Meliu kamataruna hangko i piho au momata mpotimali. Piho peisa mebelai hawe i leho-leho buu hai ati buu. Nodo wori NgkoraNa Pue Ala metohu hawe i lalunta. Ngkora iti napake Pue Ala moparesa pekirinta hai tunggaiana lalunta.

1 Peturu 1:23

Lawi molambimokau katuwo au wou, hai katuwo au wou iti bara hangko i manusia au peisa mate. Katuwo iti naweikau Pue Ala au bara ara kahopoana. Molambikau katuwo au wou lawi mepoinalaimokau i Ngkorana Pue Ala au tuwo hai au bara mokahopoa.

1 Yohane 1:1

Sura ide mampololita kana i Ngkora au mopaara katuwo. Ngkora iti, arami hangko i nguru-nguruna, kihadimi, kiita matami, kisabikimi hai kipetobomi.

Pampetudungia 22:17

Inao Malelaha hai towawine au rataunaa Ana Dimba manguli, “MaimoKo!” Hai ope-ope tauna au mohadi lolita ide, hangangaa manguli worihe, “MaimoKo!” Hema au mangkadou, maimokau! Ane niunde, maimokau maenu owai au mopaara katuwo. Hai bara niholo!