Pampetudungia 17:8 - Sura Malelaha

⁸ Hangkoia tuwo, hai ide-ide barapi ara, agaiana ina mesuwu hule hangko i kabe ngkapate au bara tehoka kakaladuna. Hai roo indo, ina rahuku mate. Tauna au maida i dunia au bara teuki hanganda i lalu Sura Ngkatuwo hangko damani dunia rapopewali, ina tingkarahe moita binata iti. Lawi hangkoia tuwo, ide-ide barapi ara, agaiana hambela tempo ina hawe hule.

Pampetudungia 17:8 Mawu Ofanana

Matiu 25:34

Hai Iko Datu, Kuuliangaahe au ntanda i koanaNgku, ‘Maimokau au nawati UmaNgku! Mesuamokau i lalu poparentaKu. Paidaami Kupasilolonga amiamokau hungka i pewalina dunia hangkoia.

Lukasi 10:20

Agaiana nauri nodo, inee nipokatana pengkorunda seta irikamu. Aginari nipokatana kateukinami hangami i lalu suruga.”

Lukasi 8:31

Seta iti merapihe i Yesu bona ineehe Napopeloho lao i karahukuanda seta.

Yohane 17:24

Uma, peundeaKu bona ihira au NuweimoNa ina maida hihimbela hai Iko i paidaaNgku bona moitahe peawaNgku. PeawaNgku iti NuweimoNa, lawi NupokakaiaNa hangko damani dunia ide rapopewali.

Suro 15:18

Nodomi pangulina Pue au mopakanoto tunggaiaNa hangkoia.”

Epesu 1:4

Hangko damani dunia rapopewali, Napileimoke Pue Ala mohintuwu hai Kerisitu bona mewalike taunaNa au malelaha au bara ara kamasalanta i peitaNa.

Titu 1:2

Ido hai taharunga kaina molambita katuwo maroa au bara mokahopoa, nodo au nadandiake Pue Ala hangko damani dunia ide Napopewali. Hai Pue Ala bara modongko.

1 Peturu 1:20

Hangko damani dunia rapopewali, Yesumi au napakanoto Pue Ala mewali Topehompo. Ide-ide, i tempona hungkumi kahopoa dunia, Ia hawemi bona mohuru dosami.

Pampetudungia 11:7

Ane hopomi bagonda mopahawe Ngkorana Pue, ina hawe hambaa binata au kadake au moewahe. Ia ina monangihe hai mopapatehe. (Binata au kadake iti iami binata au ina mesuwu hangko i kabe ngkapate au bara tehoka kakaladuna.)

Pampetudungia 17:11

Hai binata au tuwo hangkoia hai au barapi ara ide-ide, iami hadua hangko i datu au pitu inona ina mai hule bona moparenta; ia ina hawe mewali datu kaualu. Agaiana kahopoana datu iti batena rahuku hawe i hae-haena.

Pampetudungia 17:2

Datu-datu i dunia mobabehihe babehia au merikai hai ia, hai ope-ope tauna au maida i dunia napaenuhe hai paenuna au melangui iti, lempona ia nawawahahe mampeulai babehiana au merikai.”

Pampetudungia 20:10

Roo nodo, Datu Tokadake iti, au mopakanawo tauna, ratende i lalu tahi api au lolaa hai au mawaa. I tahi api itimi hangkoia ratendehe binata au kadake hai nabi au mepawuli. Inditi, rapopeahi-ahi liliuhe hawe i hae-haena.

Pampetudungia 20:12

Hai kuitahe tomate au rapatuwo hulemohe, maroa au koi ba au mahile tuwonda, meangkahe i lindo kadera kadatua iti. Tauna au mate maliso i tahi hai ope-ope tauna au ara i paidaa tomate, meangkamohe ope-ope i lindo kadera kadatua iti. Hai rabungkahimi sura, inditi teuki ope-ope babehianda. Mewali, ope-ope tomate au rapatuwo hulemohe ina rahukuhe hintoto hai apa au teuki i lalu sura iti, karahukunda moula babehianda. Hai rabungkahi worimi sura au hambuana, hangana Sura Ngkatuwo.

Pampetudungia 3:10

Anti kanipeulaina hawaNgku au manguli hangangaa mantahakau, ido hai ina Kupeparaikau hangko i kapari au ina morumpa humalele dunia. Ope-ope tauna au maida i dunia, ina rapetandakahe i tempo kapari iti.

Pampetudungia 3:5

Hema au menangi, ina Kubaduiahe hampi au bula. Hanganda bara ina Kugewo hangko i Sura Ngkatuwo, sura poukia hanga tauna au molambi katuwo maroa au bara mokahopoa. Hai i lindona UmaNgku hai malaekaNa, ina Kupangaku kaihirana taunaNgku.