Matiu 14:6 - Sura Malelaha

⁶ Hangko inditi, i tempona Herode mopaara susa mokatuinao alo karapoanakana, anana Herodias au towawine motaro i lindonda torare. Matana mpuu Herode mampeita potarona.

Matiu 14:6 Mawu Ofanana

Matiu 14:3

Idemi tuntukana kamatena Yohane Toperiu. Datu Herode moala Herodias napotambia. Herodias iti iami towawinena halaluna au rahanga Pilipu. Bosa belana Yohane mokambaroa Herode hangko i babehiana iti, nauliangaa, “Barako peisa mampotambia towawine iti! Babehiamu iti moliungi Aturana Musa!” Ido hai Herode motudu surodadona mohaka Yohane, rahilu hai rapopesua i lalu tarunggu.

Matiu 14:7

Anti kamatanana, modandimi hai mosumpa i anantowawine iti, nauliangaa, “Apa pea au nuperapi, ina kuweiko!”

Matiu 22:24

Kahawenda toSaduki iti, mohaokihe kanawoana Yesu, rauliangaa, “Guru, nabi Musa mepaturo node: ane hadua tobalilo mate agaiana bara mani ara anana, halaluna hangangaa mampotambia bembana bona tauna iti ara pea pemuleana.

Markus 6:14

I tempo iti, Datu Herode Antipas mohadi apa au nababehi Yesu, lawi tebambarimi hangaNa iumba-umba pea. Ara au manguli, “Yesu iami Yohane Toperiu au tuwo hule hangko i kapate! Ido hai ara kuasaNa mobabehi tanda kuasa au metingkarai.”

Markus 6:17

Nodemi tuntukana kapatena Yohane Toperiu. Datu Herode moala Herodias napotambia. Herodias iti iami towawinena halaluna au rahanga Pilipu. Bosa belana Yohane mokambaroa Herode hangko i babehiana iti, nauliangaa, “Barako peisa mampotambia towawinena halalumu! Babehiamu iti moliungi Aturana Musa.” Ido hai Herode motudu surodadona lao mohaka Yohane, rataka hai rapopesua i lalu tarunggu.

Markus 6:19

I tempo iti, koi inaona Herodias i Yohane, ido hai napeinao napapate. Agaiana tunggaiana iti bara tepabukei,

Markus 8:15

Yesu mopahawe lolita ide irihira, Nauli, “Maroa-roakau, hai mainga-ingakau i raginda toParisi hai ragina Datu Herode!”

Lukasi 13:31

I tempo iti, arahe bahangkia toParisi au mai i Yesu, rauliangaa, “PadumoKo hangko inde, hai laomoKo i boea ntanina, lawi ara tunggaiana Datu Herode mopapateKo.”

Lukasi 23:11

Roo indo, Herode hai surodadona mampopowadi-wadi hai mopapakoihe Yesu. Rabadui badu datu, hai raanti hule lao i Pilatu.

Lukasi 23:7

Rahanai, “Io, Ia to Galilea.” Kanahadina Pilatu pehananda, natudumi tauna moanti Yesu lao i Datu Herode, lawi Herode datu au moparenta i tampo Galilea. Tempo iti, Herode ara wori i Yerusale.

Lukasi 3:1

Hampulomi hai lima parena Kaisar Tiberius moparenta i wanua Roma, Pontiu Pilatu mewali gubernur i tampo Yudea, hai Herode Antipas au moparenta i Galilea. Pilipu, halaluna Herode, moparenta i Iturea hai i Trakonitis, hai Lisanias moparenta i Abilene.

Lukasi 3:19

Ia mokambaroa Herode Antipas, gubernur i tampo Galilea, lawi Herode moala Herodias, towawinena wutuna bona napotambia. Bara iti pea au nakambaroangaa Yohane, lawi ngkaia mani babehiana Herode au kadake.

Lukasi 8:3

Ara wori Yohana towawinena Kusa, topobago i lalu souna Datu Herode. Meula wori Susana hai bosa towawine ntanina. Ope-opehe motulungi Pue Yesu hai topeguruNa hangko i doinda haduduanda.

Suro 12:1

I tempo iti, Datu Herode Agripa mepongka mampopeahi-ahi bahangkia tauna au mepoinalai i Pue Yesu.

Suro 4:27

O Pue, tepabukei mpuumi lolitana Daudi iti. Lawi tou-tou mpuu mewalimi i lalu wanua ide, Datu Herode hai Pontiu Pilatu hintuwuhe hihimbela hai to Yahudi hai tauna au barahe to Yahudi. I lalu kahintuwunda iti, mampeinaohe moewa Yesu, AnaMu au Malelaha au Nupileimi mewali Datu Topehompo.