Lukasi 8:13 - Sura Malelaha

¹³ Tinuda au manawo i tampo au mowatu-watu, lempona mohadihe Ngkorana Pue Ala, tou-tou matana lalunda. Mepoinalaimohe, agaiana pepoinalainda iti bara maroho, nodo tuda-tuda au bara mouaka. Ido hai ane molambihe kapari anti pepoinalainda i Ngkorana Pue Ala, mousulihe hai barapohe mepoinalai.

Lukasi 8:13 Mawu Ofanana

Markus 6:20

lawi Herode motuduhe surodadona mokampai Yohane i lalu tarunggu. Herode bara bai mopapate Yohane lawi naisa kaiana tauna au manoto laluna hai malelaha tuwona. Ane mohadi lolitana Yohane, wuli mpuu laluna, agaiana matana wori laluna mohadi.

Lukasi 8:12

Iba pakana paidaa au nakanawoi tinuda iti, rapopandiri lalu tauna. Tinuda au manawo i rara, lempona mohadi mpuuhe Ngkorana Pue Ala, agaiana Datu Tokadake mopawuli lalunda, duuna barahe mepoinalai, hai barahe tekabaha hangko i huku dosanda

Lukasi 8:14

Tinuda au manawo i lalu dui, lempona mohaditohe Ngkorana Pue Ala, agaiana mopailalu liliu peahe katuwonda i lalu dunia ide, hai mampeinao peahe morampu peawa dunia. Lalunda nabukehi paka-pakana dake. Ope-ope iti mopaara pea kadana tinda lalunda, alana barapohe mepoinalai hai bara mobundu Ngkorana Pue Ala i lalu katuwonda.

Yohane 15:2

Ope-ope daa au tuwo Iriko au bara mowua, Nakadiri. Hai ope-ope daa au tuwo Iriko au mowua, Napakabaa hai Nakadipura bona tetambai powuana.

Yohane 15:6

Hema au bara mohintuwu liliu hai Iko batenda ratende, nodo karatendena daa au rabohoki duuna mewali bangi. Daa iti, ragulu hai rahuwe.

Yohane 5:35

Yohane iti nodo hulo au mewangka sangka pea hai moanti baa irikamu au nipokatana mpuu, agaiana kamatanami iti sangka pea.

1 Korintu 13:2

Ane rapana, molambina kapande mopahawe lolita hangko i Pue Ala hai molambina ope-ope kapande hangko i Pue Ala au bara raisa rangangku, hai ane maroho pepoinalaingku pane kubuku mopalimba bulu, agaiana bara maahi lalungku, bara mpuu ara bunduna katuwongku.

1 Korintu 15:2

Tehoremakau hangko i huku dosami, asala mepoinalai liliukau i Ngkora Marasa au kupahaweakau. Ane bara, mbero-mbero pea pepoinalaimi iti.

Galatia 3:1

Halalu to Galatia, ntuli mpuukau. Hemarikau au mopakanawo, alana barapi nipeulai paturo au tou? Manoto mpuu paturongku hangkoia irikamu au mopakanotoakau tunggaiana Yesu Kerisitu mate i kau mombehape.

Galatia 3:4

Mewali hangangaa mantahakau i lalu pepoinalaimi, lawi ane bara nodo, barapi mobundu ope-ope pewatina Pue Ala au nidokomi.

Epesu 3:17

Kuharunga anti pepoinalaimi, Kerisitu ina maida i lalumi. Mekakaena bona nodo tuda-tuda ina mouakakau, hai moarokau tuwomi i ahiNa.

Kolose 1:23

ane mepoinalai liliukau, mantahakau, hai barakau mampogiangaa tauna mopakanawokau. Mewali halalu, hangangaa nipakaroho peulami i paturo au nihadimi. Ineekau mokabaha peharungami i apa au nadandiamokau Pue Ala i lalu Ngkora Marasa. Ngkora Marasa iti rabambarimi i humalele dunia. Hai iko wori, mewalina hawina Pue au mopahawe Ngkora Marasa iti.

Kolose 2:7

Mewali, hangangaa nipakaroho hai nipatetida lalumi Iria. Nipakaroho pepoinalaimi, nodo au rapaturoamokau. Hai niuli liliu ngkaia kamaroana i Pue Ala.

1 Tesalonika 3:5

Ido hai kutudu Timotiu lao irikamu bona kuisa noumba pepoinalaimi, lawi barapi kubuku motaha kamabilangku. Hai kupokalanga, nakelokau pae Datu Tokadake duuna napakanawokau hai barapi mobundu pobagongki mobambari Ngkora Marasa irikamu.

1 Timotiu 1:19

Mantahako i lalu pepoinalaimu, hai mobabehi liliuko babehia au maroa hangko i kabulana lalumu. Ara bahangkia tauna au mosapuaka ope-ope paturo ide, alana marugi pepoinalainda.

Ibarani 10:39

Agaiana ikita ide, halalu, barake tauna au mousuli hangko i pepoinalainta, hai au ina rahuku. Ikita ide, tauna au mepoinalai hai au molambi katuwo maroa.

Yakobu 2:26

Mewali, ane ara hadua tauna au barapi moinao, lempona matemi. Nodo wori, pepoinalainta i Pue, ane bara tongawa i babehianta, lempona matemi pepoinalainta, barapi ara pobunduana.

2 Peturu 2:20

Meahi-ahi mpuuhe tauna iti. Nguru-nguruna moisamohe Amputa Yesu Kerisitu, ido hai tekabahahe hangko i babehia au kadake i dunia ide, agaiana roo indo mesule hulehe i babehianda au kadake duuna moulahe babehia iti. Kahopoana rumihi mpuu kamaruginda hangko i nguru-nguruna.

2 Peturu 2:22

Ara ngkora pandiri au manguli node: “Dike moande hule bolana, hai boe au radoi mentumba hule i reta.” Lolita ide mokanai tauna iti inona, lawi tauna iti mesule hulehe i babehianda au kadake au rapalehimi hangkoia.

1 Yohane 2:19

Tauna au mampoiwalihe Kerisitu iti arahe i olonta hangkoia, agaiana katouana barahe ranganta. Ido hai padumohe mopatani hangko irikita. Ane rapana tou-tou rangantahe, kemia-miahe taporanga. Agaiana megaakimohe hangko irikita, ido hai manoto kadanda mpuu huba hadua au himbela hai ikita.

Yudasi 1:12

I pogulu-guluami, guru au mepakanawo iti maandehe hihimbela hai ikamu nodo rangami, agaiana mepakaea mpuu babehianda. Ane moguluhe hihimbela hai ikamu, mehioro mpuuhe hai mampekiri peahe watanda. Ihira nodo gawu au nawui himburu agaiana bara mopaara uda. Ihira nodo kau au bara maroa: ane hawe tempo powua, bara ara wuana. Ido hai rawuka peami alana bangi.