Kolose 3:16 - Sura Malelaha

¹⁶ Hangangaa nipailalu liliu Ngkorana Kerisitu. Mombepakaroho mpolalumokau hai mombepaturokau moula sukana kanotona lalumi. Mampolingakau nani petoia, hai nani pepomahile, hai nani ntanina au naweikau Inao Malelaha. Hangko i lalumi mpuu, monanikau manguli ngkaia kamaroana i Pue Ala.

Kolose 3:16 Mawu Ofanana

Matiu 26:30

Roo indo, monanihe hampaka nani petoia. Karoonda monani, padumohe hangko i wanua lao i Bulu Saitun.

Lukasi 2:51

Roo indo, lao sambelamohe i Nasare, hai Yesu mampeulai ope-ope hawanda. Ope-ope au mewali iti batena napailalu inaNa.

Yohane 15:7

Ane mohintuwu liliukau hai Iko hai lolitaNgku nipailalu liliu, niperapimi i Pue Ala ba apa peundeami, batena Naweikau.

Roma 10:17

Mewali, hangangaa mohadihe hampai bambari maroa, hangko peisarihe mepoinalai. Hai bambari maroa iti iami bambari kana i Kerisitu.

Roma 15:14

Halalungku ope-ope! Kuisa mpuu kangkaiana babehiami au maroa. Niisami paturo hangko i Ngkorana Pue, hai niisa mombepakaroho mpolalu hadua hai hadua.

1 Korintu 14:15

Mewali, apa au maroa kubabehi? Mekakaena i lalu basa au hangko i Inao Malelaha, hai mekakae worina i lalu basa au raisa ranganta. Monanina motoia Pue Ala i lalu basa au hangko i Inao Malelaha, hai monani worina motoia Pue Ala i lalu basa au raisa ranganta.

1 Korintu 14:26

Mewali halalu, apa lempona ope-ope iti? Ane maminggukau, hadua-hadua tauna ara kamapandenda: arahe au monani, arahe au mepaturo, arahe au mopahawe lolita hangko i Pue Ala, arahe au mololita i lalu basa au hangko i Inao Malelaha, arahe au mopalimba lempona lolitanda iti bona raisa ope-ope tauna. Agaiana hinangkana iti hangangaa nibabehi bona mopakarohokau lalunda rangami.

Epesu 1:17

Mekakaena i Pue Ala au meawa, Umana Amputa Yesu Kerisitu. Kuperapi Iria bona Naweikau Inao Malelaha au mopamanoto lalumi, duuna moisa ntepuukau Pue Ala.

Epesu 5:17

Mewali, ineekau ntuli, nipekiri maroa babehia apa au naunde Pue.

Epesu 5:19

ina mombepakaroho mpolalukau hai mamponanikau nani petoia, nani mpenomba hai nani rohani. Ina monanikau matana-tana motoia Pue hangko i lalumi, hai

Epesu 5:26

Ope-ope iti Nababehi bona Napatanike mewali taunaNa, Nabahoike hangko i dosanta hai owai hai NgkoraNa,

Kolose 1:28

Mewali, mobambaringkai i ope-ope tauna kana i Kerisitu. Kiweihe lolita hai kipaturohe, hai kininihe ope-ope moula kapande au nakiraiangkai Pue, bona kiantihe ope-ope Iria hai bara ara kamakuranda, lawi mohintuwumohe hai Kerisitu.

Kolose 1:9

Mewali, halalu, i kakihadina bambari kana i pepoinalaimi, kipekakaea liliukau. Mekakaengkai i Pue Ala, kiperapi bona hai Inao Malelaha Napamanoto lalumi hai Napopaisaakau ope-ope peundeaNa,

Kolose 4:6

Ane molololitakau hai ihira, nipamaalusu lolitami bona moantikau katuwo maroa irihira. Hai nipekiri maroa apa au nipahaweahe bona niisa mohanai pampekunenda.

1 Tesalonika 1:8

Lawi hangko irikamu, Ngkorana Pue tebambari i humalele Makedonia hai Akaya. I raoa hangko indo, pepoinalaimi i Pue Ala rapololita iumba-umba pea. Mewali, ampu boea i ope-ope boea au kikalaongi moisa noumba kanidokongki. Ikami barapongkai paraluu mopahawe ba apa-apa, lawi tauna iti mohadimohe bambari au manguli kanikabahanami menomba i anitu, katebalikina lalumi hai pengkorumi i Pue Ala au manoto hai au tuwo.

1 Tesalonika 4:18

Mewali halalu, hangko i bambari ide, hangangaa mombepalindoke hadua hai hadua.

2 Tesalonika 3:15

Ngkalinari ineehe niimba iwalimi. Agaiana nipaturohe nodo halalumi.

1 Timotiu 6:17

I tauna au pebuku, nupaturohe bona ineehe mampemahile hai ineehe meharunga i anu-anu dunia, lawi anu-anu dunia batena pea marugi. Agina mepoinalaihe i Pue Ala au moweike ope-ope pewati au bara ara hokana. Iami au tapokatana.

2 Timotiu 3:15

Hai hangko koi-koi peamoko, nuisami apa au teuki i lalu Sura Malelaha. Sura Malelaha iti au peisa mopakanoto lalunta duuna mepoinalaike i Kerisitu Yesu hai tehoremake hangko i huku dosanta.

Yakobu 1:5

Ane arakau au bara moisa rara mokadipura tuwomi, agina niperapi kanoto lalu hangko i Pue Ala, hai batena Naweikau. Lawi apa au Nakira, Nakiraiahe ope-ope tauna hangko i kabulana laluNa, barahe Nawei ngkahunda-hunda.

Yakobu 3:17

Agaiana tauna au molambihe kanoto lalu hangko i Pue Ala, node babehianda: malelaha lalunda, raunde mohintuwu hai ranganda, maalusu poantinda, matunduhe hai motulungi peamohe tauna. Maroa babehianda, barahe mampopontani tauna hai poantinda moula kabulana lalunda.

Yakobu 5:13

Ane ara i olomi au molambi kapari, agina mekakae. Ane ara au matana, hangangaa monani motoia Pue Ala.

1 Yohane 2:14

Kuukiakau anangku, lawi moisamokau Umanta. Kuukiakau uma-uma, lawi moisamokau Ia au ara hangko i nguru-nguruna. Kuukiakau anantomoane hai anantowawine, lawi marohomi pepoinalaimi, mopailalumokau Ngkorana Pue Ala, hai monangimokau Datu Tokadake.

1 Yohane 2:24

Mewali, halalu, bambari au nihadi hangko i nguru-nguruna, iti au hangangaa nipailalu liliu. Ane mopailalukau bambari iti, ina mohintuwukau hai Pue Ala Umanta hai Yesu AnaNa.

1 Yohane 2:27

Agaiana halalu, modokomokau Inao Malelaha hangko i Kerisitu, hai Inao iti ara liliu i lalumi. Barapokau paraluu rapaguru tauna ntanina, lawi Inao Malelaha iti au mopagurukau i hinangkana. Ope-ope paturoNa tou, bara dongko. Mewali, mohintuwu liliumokau hai Kerisitu moula apa au Napaturoakau.

2 Yohane 1:2

Kipokaahikau lawi mampoinalaike paturo au tou, hai paturo au tou iti takingki hawe i hae-haena.

Pampetudungia 14:3

Mamponanimohe hampaka nani au wou i lindo kadera kadatuana Pue Ala hai i lindonda pinatuwo au iba hai totosae au motolelikihe pohudaa kadatua iti. Naninda bara huba hadua au peisa mampegurui, batena pea ihira au hangatu iba pulona hai iba sabunda iti au moisa. Ihira iti tehoremamohe hangko i dunia, lawi dosanda nahompomi Ana Dimba.

Pampetudungia 15:3

Mamponanimohe nanina nabi Musa, hawina Pue Ala hangkoia, hai nani pebilanda i Ana Dimba. Node naninda: “O Pue Ala, mahile hai maroa ntepuu babehiaMu, Melumbu kuasaMu hangko i hinangkana! Ope-ope au Nubabehi, manoto hai tou. Oiomi datunda ope-ope tauna i dunia.

Pampetudungia 19:10

Molingkudumona motumpa i lindona malaeka iti menombana iria, agaiana nauliangaana, “Inee! Ineeko menomba iriko. Batena pea Pue Ala au hintoto nupenombai. Lawi ide iko, hawina pea worina Pue Ala himbela hai oio hai ope-ope halalumu au mopangaku kaYesuna au rapenombai. Lawi tunggaiana ope-ope lolitangku ide bona mosabiki kaYesuna Datu Topehompo.”

Pampetudungia 5:9

Monani-nanimohe hambua nani au wou, rauli: “Oiomi au hintoto modoko sura iti hai mobungkahi penena lawi rapapatemoKo; Hai waheMu au mabubu i kapateMu, Nupopoholomohe tauna i humalele dunia, i ope-ope kadatua, i ope-ope pemulea hai i hinangka basa. Hai Nuhuhuhe i Pue Ala.