Ibarani 5:12 - Sura Malelaha

¹² Katouana kemewalimokau guru i Ngkorana Pue lawi mahaemokau meula i Pue Yesu. Agaiana mampopepaguru manikau i tauna ntanina, lawi bara manikau moisa patoa paturona Pue Ala. Mogalori paturo au mamura, bara mani nipeulai maroa, apa mani paturo au mapari! Nodo manikau analei au bara mani rabuku moande paande au matua, mentomi mani peahe.

Ibarani 5:12 Mawu Ofanana

Matiu 17:17

Nauli Yesu i tauna bosa hai i topeguruNa, “Noumbarikau dide? Moapari pane bara mani maroho pepoinalaimi? Nisapuaka mani peundeana Pue Ala! Hangkia maniri kamahaena ina hihimbelaNa hai ikamu? Hangkia maniri kamahaena hangangaa Kusabarai peewami? Anti mai anangkoi iti!”

Markus 9:19

Nauli Yesu irihira, “Noumbarikau dide? Moapari pane bara mani maroho pepoinalaimi? Hangkia mani kamahaena ina hihimbelaNa hai ikamu? Hangkia mani kamahaena hangangaa Kusabarai peewami? Anti mai anangkoi iti!”

Suro 7:38

Musa iti au mokampaihe to Yahudi au bosa i pada wungi. Ia hihimbela hai toiorunta hangkoia, hai ia wori au mohadi lolitana malaeka i Bulu Sinai. Iami au modoko Ngkora Ngkatuwo hangko i Pue Ala bona rapahaweake duuna ide-ide.

Roma 3:2

Ngkaia mpuu rasi irikita to Yahudi, hai mahile pobunduana! Kaisa-isa, i toYahudimi Pue Ala mopahawe NgkoraNa.

1 Korintu 14:19

Agaiana i lalu paminggu, agina mololitana i lalu basa au raisa ranganta bona lolitangku raisa lempona, hai aginami hantepo rontepo pea lolitangku mopaguru ranganta, panena mololita kangkalanga i lalu basa au hangko i Inao Malelaha au bara raisa ranganta.

1 Korintu 14:20

Halalu! Ineekau nodo pekiri anangkoi, hangangaa manoto lalumi nodo hadua tosae. Agaiana i babehiami, ikamu hangangaa nodokau hadua analei au bara mani naisa mobabehi apa au kadake.

Galatia 4:3

Nodo wori ikita halalu: hangko damanike moisa Pue Ala, nodoke anangkoi iti, lawi mengkoruke i ada hai hinangka kuasa dunia ide.

Pilipi 3:1

Mewali halalu, hangangaa matanakau, lawi mohintuwumokau hai Pue. Bara kupomapari mohuleki apa au kuuki hangkoia, lawi kupeinao bona mepoinalai liliukau i paturo au tou.

Kolose 3:16

Hangangaa nipailalu liliu Ngkorana Kerisitu. Mombepakaroho mpolalumokau hai mombepaturokau moula sukana kanotona lalumi. Mampolingakau nani petoia, hai nani pepomahile, hai nani ntanina au naweikau Inao Malelaha. Hangko i lalumi mpuu, monanikau manguli ngkaia kamaroana i Pue Ala.

Ibarani 10:32

Nikatuinao, halalu, noumba katuwomi hangkoia i pepongkami mepoinalai i Pue Yesu. I tempo iti, narumpakau ngkaia kapari anti peulami i Pue. Agaiana nauri nodo, barakau mousuli; mia-mia maroho liliu pepoinalaimi.

Ibarani 5:11

Halalu, katouana, ngkaia mani au kupeinao kuuliangaakau kana i Yesu hai Melkisedek, agaiana mapari mopakanotoakau ope-ope iti, lawi mengkantulikau. Bara niunde mohadi paturongku.

Ibarani 5:13

Mewali hema au mentomi mani, analei mani. Lempona, bara mani manoto lalunda mampopontani apa au tou hai apa au sala.

Ibarani 6:1

Mewali, halalu, barapokau kipagurua patoa paturo kana i Kerisitu. Agaiana hangangaa kipahaweamokau paturo kaliliuana bona manoto lalumi hai pekirimi. Ineeke mesule-sule i paturo au nguru-nguruna. Tauna au hangko mewali to Sarani hangangaa rapaturo bona menosohe hangko i babehianda au kadake hai mepoinalaihe i Pue Ala.

1 Peturu 2:2

Nodo hadua analei au hangko mesupa mampeinao peami mentomi irinana, ikamu wori hangangaa mohaoki liliu peamokau paandena tanoanami, iami Ngkorana Pue Ala. Hangangaa nipailalu Ngkorana Pue bona kamaroho-rohoa lalumi hai kamanoto-notoari pekirimi alana molambikau katehorema.

1 Peturu 4:11

Hema au motuntu, hangangaa mopahawe apa au nadokomi hangko i Pue Ala. Hema au motulungi rangana, hangangaa metulungi hangko i karoho au nalambi hangko i Pue Ala. Hangangaa nibabehi nodo bona i hinangkana au mewali, Pue Ala rapomahile i lalu hangana Yesu Kerisitu, lawi Pue Ala au makuasa hai hintoto rapomahile hawe i hae-haena! Amin.