Ibarani 2:4 - Sura Malelaha

⁴ Hai Pue Ala mopakaroho ntepuu posabinda, lawi Naweihe kuasa mobabehi ngkaia pakana tanda kuasa hai tanda au metingkarai. Hai Nawei worihe kapande au montani-ntani hangko i Inao Malelaha moula peundeaNa.

Ibarani 2:4 Mawu Ofanana

Markus 16:20

Hangko inditi, laomohe topeguruNa mopahawe Ngkora Marasa iumba-umba pea. Naporangaihe Pue i lalu bagonda, hai Napakaroho pobambarinda Ngkora Marasa hai tanda kuasa au metingkarai bona tongawa katouna Bambari au raanti.]

Markus 6:14

I tempo iti, Datu Herode Antipas mohadi apa au nababehi Yesu, lawi tebambarimi hangaNa iumba-umba pea. Ara au manguli, “Yesu iami Yohane Toperiu au tuwo hule hangko i kapate! Ido hai ara kuasaNa mobabehi tanda kuasa au metingkarai.”

Yohane 15:26

Ina mai Inao Malelaha, lempona Inao au mesuwu hangko i Pue Ala hai au moninikau i paturo au tou. Ia Topetulungi au ina Kutudu mai irikamu au hangko i UmaNgku. Ane mai, Ia ina mosabi kana Iriko.

Yohane 4:48

Nauli Yesu i tauna iti, “Ikamu au maida i tampo ide, ane kebarakau moita tanda kuasa, barakau ina mepoinalai!”

Suro 14:3

Maidamohe Paulu hai Baranaba bahangkia kamahaena i wanua iti. Barahe langa mopahawe bambari kana i Pue. Pue moweihe kuasa mobabehi tanda au metingkarai bona manoto i ope-ope tauna katouna Ngkora Marasa au raanti. Ngkora Marasa iti mampololita kabulana laluna Pue Ala au mowei katuwo maroa i manusia.

Suro 4:10

Mewali bona niisa, hai bona raisa wori ope-ope halalunta to Yahudi, tauna ide maoha hai nabuku meangka inde anti kuasana Yesu Kerisitu to Nasare. Yesu iti nipaku i kau mombehape, agaiana Pue Ala mopatuwo hule.

Suro 5:32

Ikamimi sabina hinangkana iti, ikami hai Inao Malelaha, au nawei Pue Ala i ope-ope tauna au mengkoru i hawaNa.”

Epesu 1:5

Anti kamaahina laluNa irikita, Napakanoto amimi kaNaangkata mewali anaNa. Naangkamoke mewali anaNa anti kanahoremanta Yesu Kerisitu, lawi itimi au Natunggai hai au Napokatana.

Epesu 1:9

Moula peundeaNa, Napopaisaamoke tunggaiaNa au tewuniangi mani. TunggaiaNa iti iami bona hinangkana, maroa au i suruga ba i dunia, ina Napahintuwuhe hai Kerisitu au mewali tadulako i hinangkana. Hai tunggaiaNa iti batena Napopewali melempo i Kerisitu ane hawemi tempona.

Epesu 4:7

Nauri himbelake, agaiana karawatinta bara himbela, lawi ikita ope-ope raweike kapande hadua-hadua mampopolumao bagona Pue hintoto hai apa au naweike Kerisitu.

Ibarani 6:4

Lawi tauna au raoaka mousuli hangko i pepoinalainda, barapohe peisa ranini hule bona menosohe hangko i dosanda. Lawi hangkoia, maidahe i lalu kamabaa, matana lalunda modoko pewatina Pue Ala, hai lalunda nakuasai Inao Malelaha;