Epesu 4:5 - Sura Malelaha

⁵ Hadua pea Amputa, hambua pea pepoinalainta, hai rariuke i lalu hanga au himbela.

Epesu 4:5 Mawu Ofanana

Matiu 28:19

Mewali, laomokau i humalele dunia, nipopewalihe ope-ope tauna topeulaNgku, niriuhe i lalu hangana Uma hai Ana hai Inao Malelaha

Suro 10:36

Manoto niisa mpuumi bambari au napahawe Pue Ala irikami to Yahudi. Bambari iti mopahawe kana i rara au mopamaroa pohintuwuna Pue Ala hai manusia melempo i Yesu Kerisitu. Yesu iti iami Ampunda ope-ope tauna.

Suro 2:36

Hangko inditi, napahopomi Peturu lolitana, nauli, “Mewali, ido hai ikamu to Yahudi, hangangaa nipakanoto i lalumi apa au kuuli ide: Yesu au nipaku i kau mombehape, Iami au napilei Pue Ala mewali Amputa hai Datu Topehompo.”

Roma 3:30

Lawi Pue Ala hadua pea, hai Iami au mopamanoto to Yahudi anti pepoinalainda, hai mopamanoto worihe tauna au bara to Yahudi anti pepoinalainda.

1 Korintu 1:13

Maroa pae ane ikamu au meula i Kerisitu mosisala nodo? Ba iko au mate rapaku i kau mohuru dosami? Ba rariukau bona mewalikau topegurungku? Bara!

1 Korintu 12:13

Nodo wori ikita. Ikita ope-ope mewali nodo hambua wata, lawi rariuke ope-ope hai Inao Malelaha au hadua pea. Ikita ope-ope molambi Inao Malelaha au himbela, maroa to Yahudi ba au bara to Yahudi, maroa au hawi tuwonda ba au bara hawi.

1 Korintu 12:5

Ngkaia pakana bago au tapobago i Pue, agaiana Pue au tapobagoa, hadua pea.

1 Korintu 8:6

Agaiana irikita, hadua pea Pue Ala, iami Umanta au mampopewali hinangkana au ara; Ia pea pongkana katuwonta. Hai hadua wori Amputa, Yesu Kerisitu, Iami au napopatoa Pue Ala mampopewali hinangkana au ara. Iami au moweike katuwo.

2 Korintu 11:4

Arahe guru agama i olomi au mopaturokau kana i Yesu, agaiana paturonda bara himbela hai apa au kipaturoakau. Ane paturonda bara himbela hai paturongki, moapari hai niunde mampehadingi lolitanda? Niunde pae modoko inao ntanina au mosisala hai Inao Malelaha au nidokomi? Niunde pae modoko bambari au mosisala hai Ngkora Marasa au nipoinalaimi? Halalu, inee nodo.

Galatia 5:6

Ane mohintuwuke hai Kerisitu Yesu, bara ara bunduna ratileke ba barake ratile; batena pea mepoinalaike i Yesu. Hai ane maahike i ranganta, pepoinalainta iti ina tongawa.

Epesu 4:13

duuna hambela tempo ina mewalike hampepekiri i lalu pepoinalainta, hai ina moisa ntepuuke Anana Pue Ala. Ina kanoto-notoake, duuna mewalike nodo Kerisitu au bara ara kamakuraNa.

Pilipi 2:11

hai mopangaku: “Yesu Kerisitu iami Pue,” alana Pue Ala Umanta rapomahile.

Pilipi 3:8

Hai bara pea ido, ide-ide kuisami: hinangkana iti bara ara bunduna iriko, lawi ara au melumbu kamaroana, iami pohintuwuku hai Kerisitu Yesu Ampuku. Ido hai kukabahami ope-ope au ntanina, kuimba pea pupu bona meulana i Kerisitu,

Titu 1:1

Sura ide hangko iriko, Paulu, hawina Pue Ala hai surona Yesu Kerisitu. Naangkana Pue Ala mewali suroNa, hai Natuduna mopakaroho pepoinalainda tauna au Napilei. Natudu worina mopaguruahe paturo au tou, lawi ane tapeulai paturo au tou iti, ina mengkoruke i Pue Ala.

Titu 1:4

Sura ide kupakatu irio Titu, au kupoanamoko, lawi hampepepoinalaike. Mekakaena i Pue Ala Umanta hai i Kerisitu Yesu Datu Topehoremanta bona Nawatiko, hai Naweiko roa ngkatuwo.

Ibarani 13:7

Hangangaa nikatuinao liliuhe tadulakomi au mopahaweamokau Ngkorana Pue Ala. Nipeita noumba tuwonda hawe i kapatenda, hai nipeulai pepoinalainda.

Ibarani 6:6

Mewali ane roo indo, raoaka mousuli hangko i pepoinalainda, barapohe peisa ranini hule bona menosohe hangko i dosanda. Anti posapuakanda Pue Yesu, himbela peahe mopaku hule Anana Pue Ala hai rakakabosai i lindonda tauna bosa.

Yakobu 2:18

Manoto ara au ina manguli node, “Hadua tauna meharunga i pepoinalaina, hai tohaduana meharunga i babehiana au maroa.” Agaiana kuuli: ane bara maroa babehiamu, bara ina raita pepoinalaimu iti. Hangko i babehiangku au maroa, ina kupopaitaa woriko pepoinalaingku i Pue.

1 Peturu 3:21

KaNahoremanda hangko i owai au molaboa dunia peisa rapopandiri ada mperiu to Sarani ide-ide, lawi ada iti moanti katuwo maroa irikamu. Ane tababehi ada mperiu iti, bara peake mobahoi watanta. Agaiana ara tunggaiata au melumbu hangko inditi. Ada mperiu iti taimba hambua pamperapita i Pue Ala bona Nabahoike hangko i dosanta. Hai anti katuwona hule Yesu Kerisitu, Naampungi mpuumoke hangko i dosanta.

2 Peturu 1:1

Sura ide hangko iriko, Simo Peturu hawina hai surona Yesu Kerisitu, kupakatuakau halalu au mepoinalai i Yesu Kerisitu. Yesu Kerisitu iami Pue Ala au mohoremake hangko i huku dosanta. Anti kamanotona Pue Ala, Napopewalimokau taunaNa au mepoinalai Iria, himbela hai ikami suroNa.

Yudasi 1:20

Agaiana ikamu halalungku au kupokaahi! Hangangaa mombepakaroho mpolalukau bona maroho pepoinalaimi, lawi paturo au tapoinalai iti malelaha. Hai Mekakae liliukau moula peninina Inao Malelaha.

Yudasi 1:3

Halalu au kupokaahi! Nguru-nguruna au kekuukiakau i sura ide iami kana i katehorema au tahumba sambela hangko i Pue Ala. Agaiana ide-ide, tediimi lalungku mobaliki tunggaiaku au nguru-nguruna. Ide-ide kuukiakau sura ide bona nipakaroho pepoinalaimi i paturo au tou hai bona niewa liliuhe tauna au moanti paturo au sala. Lawi Pue Ala mopahawe paturo au tou irikita ope-ope au mewali kiraNa bona iti au tapoinalai, hai paturo iti bara peisa rabaliki.