Epesu 3:6 - Sura Malelaha

⁶ Tunggaia iti iami: tauna au barahe to Yahudi molambi worihe pewatina Pue Ala hihimbela hai to Yahudi. Napopewalimohe Pue Ala hawata-wata hai to Yahudi bona molambi worihe apa au nadandi Pue Ala i ope-ope anaNa. Iti ralambi anti pohintuwunda hai Kerisitu Yesu, lawi mopoinalaihe Ngkora Marasa.

Epesu 3:6 Mawu Ofanana

1 Korintu 12:12

Ikita au mepoinalai i Kerisitu peisa rapandiri nodo wata tauna. Ane wata tauna hambua pea, agaiana ngkaia ngaana. Nauri ngkaia ngaana, ope-ope ngaa iti mewali pea hambua wata.

1 Korintu 12:27

Ikamu ope-ope wataNamokau Kerisitu, hai hadua-haduakau iami hangkira hangko i wata iti.

Galatia 3:14

Tunggaiana Yesu mate rapaku i kau bona tauna au barahe to Yahudi peisa worihe molambi pewati au nadandi Pue Ala i Burahima. Pewati iti tahumba anti pohintuwuta hai Yesu Kerisitu. Mewali, ane mepoinalaike i Yesu Kerisitu, molambike Inao Malelaha au nadandimi Pue Ala.

Galatia 5:24

Ane mewalimoke taunana Kerisitu Yesu, barapoke nakuasai peundeana lalunta au kadake lawi peundeana lalunta au kadake iti rapakumi i kau mombehape hihimbela hai Kerisitu.

Epesu 3:3

Hangkoia, tunggaiana Pue Ala iti tewuniangi mani. Agaiana ide-ide Napatongawami iriko, hai iti kuukimi i lalu surangku ide nauri sosoe pea.

Epesu 5:30

Ia mokadipurake lawi ikita au mepoinalai Iria mewalimoke hangkira hangko i WataNa.

Epesu 5:7

Mewali, ineehe nipohintuwua tauna au nodo babehianda.

Kolose 2:19

Tauna iti barapohe mohintuwu hai Kerisitu. Kerisitu peisa rapandiri nodo waa hai ikita ope-ope au mepoinalai Iria rapandiri wataNa. Waa mokuasai ope-ope wata. Nodo wori Kerisitu, Ia au moteteke hai au mopahintuwuke bona kamaroho-rohoa peulanta Iria hintoto hai peundeana Pue Ala.

1 Yohane 1:3

Apa au kiita hai kihadimi, iti au kipahaweakau bona ikamu wori mepoinalaikau hai peisakau mohintuwu hai ikami i lalu pohintuwuki hai Pue Ala Umanta hai Yesu Kerisitu AnaNa.

1 Yohane 2:25

Hai idemi dandiNa irikita: katuwo maroa au bara mokahopoa.