2 Timotiu 2:15 - Sura Malelaha

¹⁵ Agaiana oio Timotiu, mopahaweko paturo au tou i kanoto-notoana. Nupakaroho mpuu pampopolumaomu bago iti; ineeko maea. Ane nubabehi nodo, Pue Ala ina mampokatana bagomu hai Naimbako topobagoNa au maroa.

2 Timotiu 2:15 Mawu Ofanana

Matiu 13:52

Hangko inditi, Nauliangaa mbulihe, “Ane nodo, ara mbuli hampaka ngkora pandiriKu: ane ara hadua guru agama to Yahudi au meula Iriko hai au rapaguru paturo kana i poparentana Pue Ala, guru agama iti peisa rapandiri nodo ampu sou au ara anu-anuna au hae hai ara wori anu-anuna au wou.”

Markus 4:33

Hai ngkaia mani ngkora pandiri au napake Yesu mopahawe Ngkorana Pue Ala i tauna bosa. Napaturohe moula karabukuna moisa lempona.

Lukasi 12:42

Nahanai Pue Yesu, “Nipailalu ngkora pandiri ide: Ara hadua hawi au manoto laluna hai au peisa napoinalai ampuna. Ia naangka ampuna motosaengi hawi ntanina hai mourusi paandenda alo-alona.

Suro 2:22

Hai napaliliu mbuli Peturu lolitana, nauli, “Halalungku to Yahudi! Nipehadingi apa au kuuliangaakau ide. Au kutunggai iami Yesu to Nasare. Ia pea au napilei hai napakanoto Pue Ala mewali TopobagoNa au Malelaha. Iti niisa lawi anti kuasana Pue Ala, Pue Yesu mobabehi ngkaia tanda kuasa hai tanda au metingkarai i olomi.

Suro 20:27

lawi barana oha-oha mopahaweakau ope-ope tunggaiana Pue Ala irikita.

Roma 14:18

Ane nodo peulanta i Kerisitu, ikita ina napokatana Pue Ala hai rabilake ranganta.

Roma 16:10

Tabeangku wori i Apeles, au narumpa ngkaia kapari, agaiana meula liliu i Kerisitu. Tabeangku irihira au i souna Aristobulus.

Roma 6:13

Ineemi tahuhu watanta nakuasai dosa, au moantike mobabehi babehia au kadake. Agina tahuhu katuwonta i Pue Ala, lawi tekabahamoke hangko i katuwonta au hangkoia hai molambimoke katuwo au wou. Hangangaa tahuhu watanta i Pue Ala bona watanta ide tapake mobabehi babehia au manoto.

1 Korintu 2:6

Nauri nodo, ane mololitangkai i tauna au marohomi pepoinalainda i Kerisitu, mampololita mpuungkai kapande. Agaiana au kipahawe iti, bara nodo kapande au hangko i dunia ide ba kapandenda tadulako au kamakuasanda ina tuna.

2 Korintu 10:18

Lawi ane mampomahileke watanta haduduanta, barake ina nadoko Pue. Agaiana ane napomahileke Pue, manotomi kaNadokonta.

2 Korintu 3:6

Ia moweingkai kapande mewali topobagoNa au mopaguru tauna i dandiNa au wou. Barahe kipaguru bona mampeulaihe atura-atura au teuki bona mewalihe manoto i peitana Pue Ala. Agaiana kipaguruhe bona molambihe katuwo au wou hangko i Inao Malelaha. Lawi ane mampeinaoke mewali manoto i peitana Pue Ala i kamampeulainta atura au teuki, ina molambike kapate, lawi bara buke katapeulaina. Agaiana ane meulake i Pue Ala anti kuasana Inao Malelaha, molambike katuwo maroa au bara mokahopoa.

2 Korintu 4:2

Kikaraohi hinangka babehia au mepakaea; bara ara au kiwuwuniangi; barangkai mopakanawo tauna, barangkai mobaliki tunggaiana Ngkorana Pue Ala. Kipahawe pea apa au tou i kanoto-notoana bona ope-ope tauna mopangaku katouna bambari au kianti. Napetirongkai Pue Ala!

2 Korintu 5:9

Mewali tapeinao mobabehi apa au maroa, au mopakatana laluna Pue, i tempota mani tuwo i dunia ide ba i tempona hihimbelamoke hai Pue.

Galatia 1:10

Mewali halalu! Ba nipehangu mampopetoiana i manusia anti pololitangku inona? Bara, agaiana mampeinao peana molambi petoia hangko i Pue Ala. Ba niuli node: “Paulu mampeinao pea mopamatana laluna manusia?” Bara kuunde mopamatana laluna manusia, lawi ide iko, hawinana Kerisitu.

Epesu 1:13

Nodo wori ikamu. I kamohadimi bambari au tou mewalimokau taunana Pue Ala. Mampoinalaimokau Ngkora Marasa iti, ido hai Nahoremamokau Pue Ala hangko i huku dosami. Hai Naweimokau Inao Malelaha au Nadandi hangkoia, au mewali pekatandaina Pue Ala i lalumi au mopatongawa pewalimimi taunaNa.

1 Tesalonika 2:4

Bara woringkai mololita bona mopamatana peangkai lalunda tauna, agaiana mopahawengkai apa au mopamatana laluna Pue Ala, lawi Ia au moparesa lalungki hai Napoinalaimongkai mopahawe Ngkora Marasa.

1 Tesalonika 5:14

Halalu, kiperapi bona rangami au lohehe mobago niweihe lolita. Nipalindohe au masusa lalunda. Nipakarohohe au malede pepoinalainda, hai hangangaa sabarakau i ope-ope tauna.

1 Timotiu 4:6

Ane ope-ope paturo ide nupaturoahe halalunta hampepepoinalai, ina mewaliko hawina Kerisitu Yesu au maroa. Hai ina maroho mpuu lalumu anti Ngkorana Pue Ala au tapoinalai hai paturo au maroa au nupeulaimi.

Ibarani 4:11

Mewali halalu, hangangaa tapari-pari molambi pengkarooangaa hihimbela hai Pue Ala bona datike ara au mousuli hangko i pepoinalainta, nodo to Yahudi hangkoia au bara moula hawaNa.

Yakobu 1:12

Morasihe tauna au mantaha i lalu kapari hai pampetandaka. Lawi ane pepoinalainda mantaha i pampetandaka iti, ina molambihe katuwo au bara mokahopoa au nadandimi Pue Ala i tauna au maahi Iria.

Yakobu 1:18

Napopewalimoke anaNa moula peundeaNa haduduaNa melempo i Ngkora Marasa, au bara ara kamasalana, bona hangko i ope-ope au Napopewali, ikitami au Napokatana ntepuu.

2 Peturu 1:10

Mewali halalu, lawi Napileimokau Pue Ala hai Nakakiomokau mewali taunaNa, hangangaa nipari-pari moula Pue Ala bona tongawa kaNapileimi hai kaNakakiomimi. Lawi ane nitambai pepoinalaimi hai babehia au kuuli inona, barakau ina manawo.

2 Peturu 1:15

Ido hai kupari-pari mopaturokau bona ane matemona, ina nikatuinao liliu ope-ope paturongku ide.

2 Peturu 3:14

Mewali halalu au kupokaahi, tangami mampepegia alo iti, nipari-pari meula i Pue bona maroa pohintuwumi hai Ia, hai bona bara ara kamasalami ba kamaeami ane hawekau i lindona Pue Ala.