1 Yohane 2:1 - Sura Malelaha

¹ Anangku, ide kuukiakau bona ineekau mobabehi dosa. Agaiana ane ara au mobabehi dosa, arami hadua au mamperuruike i lindona Pue Ala Umanta, iami Yesu Kerisitu au manoto.

1 Yohane 2:1 Mawu Ofanana

Lukasi 10:22

Roo indo, nauli mbuli Yesu, “Hinangkana naweimoNa UmaNgku. Bara ara hadua au moisa kaIkona Anana Pue Ala, batena pea UmaNgku au moisaNa. Nodo wori, bara ara au moisa UmaNgku, batena pea Iko AnaNa hai hema pea au Kupopaisaa.”

Yohane 13:33

AnaNgku, barapoNa mahae hihimbela hai ikamu. Ina nihaokiNa, agaiana nodo au Kuuliangaamohe tadulakonda to Yahudi hangkoia, nodo wori Kuuliangaakau: i kalaoaNgku barakau peisa hawe.

Yohane 14:16

Ina kuperapi i UmaNgku bona Naweikau hadua Topetulungi au ntanina bona Ia mamporangaikau hawe i hae-haena.

Yohane 14:6

Nauli Yesu, “Ikomi rara, Ikomi au mopahawe paturo au tou, hai Ikomi au moweikau katuwo au bara mokahopoa. Bara ara hadua au peisa hawe i UmaNgku, ane bara mepoinalai Iriko.

Yohane 21:5

Nawotuihe Yesu, nauli, “Halalu, ba arami rasimi?” Rahanai, “Bara huba hambaa.”

Yohane 5:14

Bara mahae hangko inditi, Yesu mampohidupaa tauna iti i Souna Pue Ala, hai Nauliangaa, “Ide-ide maohamoko; ineemoko mobabehi dosa bona datiko narumpa ba apa-apa au meliu kakadakena.”

Yohane 5:36

Agaiana Iko, ara hampaka au mopakanoto kahemaNgku, hai iti meliu hangko i posabina Yohane. Ane niita apa au Kubabehi, itimi au mopakanoto kahemaNgku. Apa au Kupobago ide-ide, iami au nahawaaNa UmaNgku bona Kupobago hawe roo. Bago iti mewali tanda au mopakanoto kaIkona au natudu UmaNgku mai i dunia ide.

Yohane 6:27

Ineekau mobago mohaoki paande au hampalai pea kaopena hai au polo mawai. Agaiana mobagokau mohaoki paande au bara peisa mawai hai au moweikau katuwo maroa au bara mokahopoa. Iko Ana Manusia au ina moweikau paande iti, lawi Ikomi au Napilei Pue Ala hai au Napokatana.”

Yohane 8:11

Nahanai towawine iti, Nauli, “Bara ara, Pue.” Nauli Yesu, “Mewali, bara woriko Kuhuku. Mesulemoko, hai ineemoko mobabehi dosa.”]

Suro 7:52

Toiorumi mampopeahi-ahimohe nabi-nabi hangkoia; ihira mopapatehe tuduana Pue Ala au mobambari kaina hawena hadua Tuduana Pue Ala au Manoto. TuduaNa au Manoto iti ide-ide nisapuaka hai nipapatemi.

Roma 5:10

Hangkoia, tanganta mani mampoiwali Pue Ala, Ia motudumi mai AnaNa mate mohuru dosanta bona hintuwuke hai Ia. Mewali, ide-ide hintuwumoke hai Pue Ala, hai Yesu ara liliu i lalu katuwonta. Ido hai manotomi katekabahanta hangko i karumpuna Pue Ala i alo pebotusi.

Roma 6:15

Mewali noumba halalu! Ane nahoremamoke Pue Ala bara anti pampeulainta Aturana Musa, agaiana anti kabulana pea laluna Pue Ala, ba peisamoke mobabehi dosa? Inee nodo halalu.

Roma 8:34

Barapi ara au ina manguli hangangaa rahukuke. Lawi Yesu Kerisitu au matemi mohuru dosanta, hai au tuwo hulemi, hai au mohuda ntanda i koanana Pue Ala, Iami au mamperuruike.

1 Korintu 15:34

Ido hai kuuliangaakau, nipakanoto lalumi moula paturo au tou, hai nikabahami ope-ope dosami. Lawi ara manikau au bara moisa Pue Ala. Iti kupahawe bona maeakau.

2 Korintu 5:21

Kerisitu, bara madosa, agaiana napahimbela Pue Ala tauna madosa hai Napahaleangi dosanta. Tunggaiana Pue Ala bona ikita au mohintuwu hai Kerisitu raimbamoke manoto i peitaNa.

Galatia 4:19

Halalu, kuimba mpuumokau anangku. Hai ide-ide mapari lalungku mampepekirikau. Kamaparina lalungku ide nodo kamaparina hadua towawine au ina moana. Hai ina mapari liliu lalungku duuna poantimi himbela hai poantina Kerisitu.

Epesu 2:18

I lalu pohintuwuta hai Kerisitu, peisake hungku i Pue Ala Umanta, maroa ikami to Yahudi, maroa ikamu au barakau to Yahudi. Peisake hungku i Pue Ala anti kuasana Inao Malelaha.

Epesu 4:26

Ane rumpukau, inee nipogiangaa karumpumi iti moantikau madosa. Ineekau mowoli karumpumi duuna tampu alo,

1 Timotiu 2:5

Hadua pea Pue Ala, hai hadua pea wori au peisa mopahintuwu Pue Ala hai manusia. Topepahintuwu iti, manusia wori, iami Kerisitu Yesu.

1 Timotiu 3:14

Timotiu, ara mpuu tunggaiaku lao mosondakiko. Nauri nodo, kupakatuako sura ide,

Ibarani 9:24

Lawi paidaa malelaha au napesuangi Kerisitu, bara paidaa au rababehi tauna. Paidaa malelaha iti iami suruga. Hai Kerisitu mesua mpuu i suruga. Ide-ide, arami i lindona Pue Ala mamperuruike.

Yakobu 1:27

Ane mampeinaoke mewali tauna au maroa posaraninta hai au bara ara kamakuranta ba kamasalanta i peitana Pue Ala Umanta, idemi au hangangaa tababehi: motulungike anangkoi au ilu hai tobemba au meahi-ahi tuwonda, hai ineeke moula babehianda tauna au barahe moisa Pue Ala.

Yakobu 3:9

Dilanta peisa tapake motoia Pue Ala Umanta. Agaiana peisa wori tapake mopapakoi ranganta au napopewali Pue Ala moula lenggeNa haduduaNa.

1 Peturu 2:22

Ia bara hambela mobabehi dosa ba modongko.

1 Peturu 3:18

Lawi ara wori hadua au molambi kapari, iami Kerisitu. Ia hambela pea mokira wataNa rapapate bona mohalea dosa manusia. Ia au bara ara salaNa mopahuruke au masala bona moantike i Pue Ala. Ia rapapate, agaiana rapatuwo hule anti kuasana Inao Malelaha.

1 Yohane 3:18

Anangku, inee peake maahi hai lolitanta. Agaiana hangangaa tapatongawa kamaahinta i lalu babehianta, lawi itimi ahi au tou.

1 Yohane 3:5

Hai niisa mpuu halalu, tunggaiana Yesu mai i dunia ide bona mogewo dosa manusia, nauri Ia haduduaNa, bara ara dosaNa.

1 Yohane 3:7

Anangku, inee mpuuhe nipogiangaa tauna mopakanawokau. Tauna au mobabehi peundeana Pue Ala, ihirami au manoto nodo Yesu.

1 Yohane 4:4

Agaiana ikamu anangku, napoanamokau Pue Ala, hai ninangimohe nabi au mepawuli iti, lawi Inao au ara i lalumi melumbu kuasana hangko i inao au ara i lalunda au barahe mepoinalai i Pue.

1 Yohane 5:17

Ope-ope babehia au kadake, batena dosa. Agaiana ara dosa au barake moanti i kapate.

1 Yohane 5:21

Anangku, hangangaa menomba peakau i Pue Ala, ineekau menomba i apa pea au ara i dunia ide. Hangko iriko YOHANE

3 Yohane 1:4

Rumihi mpuu kamatanangku mohadi bambari au manguli anangku moula liliu paturo au tou.