1 Timotiu 6:12 - Sura Malelaha

¹² Nupari-pari bona tuwoko hintoto hai apa au nupoinalai, hai nupakaroho pepoinalaimu au moantiko i katuwo maroa au bara mokahopoa. Lawi itimi tunggaiana Pue Ala mokakioko mewali taunaNa bona molambiko katuwo maroa au bara mokahopoa hai au nupangakumi i lindonda tauna bosa, kamepoinalaimu i Pue Yesu.

1 Timotiu 6:12 Mawu Ofanana

2 Korintu 6:7

Kipakanoto kaikamina topobagona Pue Ala, lawi mopahawengkai paturo au tou. Kipopolumao bagongki hangko i kuasa au kihumba hangko i Pue Ala. Kibabehi liliu apa au manoto. Babehiangki au manoto peisa rapandiri nodo piho hai laba, lawi ane manoto babehiangki, kibuku moewa iwalingki, hai kibuku mantaha.

2 Korintu 9:13

Ane moitamohe petulungimi, ina motoiahe Pue Ala lawi anti kamaroana lalumi tongawami kamarohona pepoinalaimi i Ngkora Marasa kana i Kerisitu hai pengkorumi i hawaNa. Ina motoiahe Pue Ala, lawi bula lalumi motulungi tauna iti hai tauna ntanina.

Pilipi 1:30

Mewali i tempo ide, molambi worimokau kapari nodo kapari au kuhumba i tempoku mani hihimbela hai ikamu, hai niisa, halalu, kapari iti kupolumaongi liliu duuna ide-ide.

Kolose 3:15

Pue Ala mokakiokau hai Napopewalikau hawata-wata anti pohintuwumi hai Kerisitu. Mewali, nipakaroho liliu kahintuwumi au hangko i Kerisitu. Hai niuli liliu ngkaia kamaroana i Pue Ala.

1 Tesalonika 2:12

bona babehiami moula peundeana Pue Ala. Lawi Pue Ala mokakiokau mewali taunaNa i lalu poparentaNa bona molambikau kirami i lalu peawana tuwoNa.

2 Tesalonika 2:14

Nakakiokau Pue Ala i lalu pohadimi Ngkora Marasa au kipahaweakau bona molambikau kirami i peawana tuwona Amputa Yesu Kerisitu.

1 Timotiu 1:18

Timotiu, anangku! Kuperapi bona nupeulai paturongku au kupahaweako ide. Hangangaa nupailalu lolitanda tauna au motadulakoiko i lalu pepoinalaimu, au mopakaroho lalumu hai au mopaturoko. Nupailalu paturonda iti bona maroho pampopolumaomu bago au nukingki nodo hadua surodado au keate mombeala.

1 Timotiu 1:19

Mantahako i lalu pepoinalaimu, hai mobabehi liliuko babehia au maroa hangko i kabulana lalumu. Ara bahangkia tauna au mosapuaka ope-ope paturo ide, alana marugi pepoinalainda.

1 Timotiu 4:14

Ineeko mokabaha bagomu au hangangaa nupopolumao moula kapande au naweiko Inao Malelaha. Kapande iti raweiko i temponda penatua moona taienda hangkoia i tanoanamu mopahawe lolita hangko i Pue Ala kana irio.

1 Timotiu 6:13

Mewali Timotiu, i lindona Pue Ala au mopatuwo hinangkana, hai i lindona Kerisitu Yesu au mopahawe notoNa i Pontiu Pilatu kuuliangaako:

1 Timotiu 6:19

Lawi ane nodo babehianda, himbela peahe hai morampu anu-anu au maroa i lalu suruga, hai batena molambihe katuwo au maroa ntepuu.

2 Timotiu 1:9

Nahoremamoke Pue Ala hangko i dosanta hai Nakakiomoke mewali taunaNa au malelaha. Barake Nahorema hai Nakakio anti kamaroana babehianta. Agaiana iti Nababehi anti kabulana laluNa moula tunggaiaNa. Lawi hangko damani dunia ide rapopewali, arami tunggaiana Pue Ala mopahintuwuke hai Kerisitu Yesu anti kabulana laluNa.

2 Timotiu 2:2

Ope-ope paturo au nuhadimi hangkoia hangko iriko, i lindonda tauna bosa, hangangaa nupaturoa worihe tauna ntanina au peisahe rapoinalai hai au rabuku mopaguru tauna ntanina.

2 Timotiu 4:7

Kupeulai maroami rara au napakanotoana Pue. Kupahopomi bagongku. Pepoinalaingku bara tebali hawe i kahopoana.

Ibarani 13:23

Bona niisa wori: halalunta Timotiu rakabahami hangko i tarunggu. Ane polo hawe inde, kuporanga lao mosondakikau.

Ibarani 3:14

Lawi ikita ide mohintuwu hai Kerisitu, asala apa au tapoinalai hangko i nguru-nguruna takingki liliu hangko i lalunta au bara bata-bata duuna i kahopoana.

Ibarani 6:18

Ane Pue Ala mopahawe dandiNa, bara modongko. Nodo wori ane Ia mohowara sumpaNa, bara modongko. Lolita au rompaka iti bara ara katebaliana. Pue Ala modandi hai mosumpa bona maroho lalunta. Hai ikita ide, mopalehimoke katuwonta hai dosanta hangkoia bona tapegia apa au Nadandiake.

1 Peturu 3:9

Ane ara tauna au mobabehi dake irikamu, inee nihurungi. Ane rakakabosaikau, inee worihe nikakabosai. Agina babehianda au kadake iti nihurungi hai pekakae au mamperapiahe pewati hangko i Pue Ala. Lawi Pue Ala mokakiokau mewali taunaNa bona molambikau pewati hangko Iria.

1 Peturu 5:10

Hai ane liumi kapari au hampalai iti, Pue Ala ina mopahandai apa au makura irikamu. Lempona, Ia ina mopakaroho pepoinalaimi, mopamanoto tuwomi hai mopatetida lalumi. Lawi Pue Ala iami pongkana ope-ope ahi. Ia mokakiokau mewali anaNa bona anti pohintuwumi hai Kerisitu, ina molambikau kirami i lalu kamahilena tuwoNa au bara mokahopoa.

1 Yohane 2:25

Hai idemi dandiNa irikita: katuwo maroa au bara mokahopoa.

Yudasi 1:3

Halalu au kupokaahi! Nguru-nguruna au kekuukiakau i sura ide iami kana i katehorema au tahumba sambela hangko i Pue Ala. Agaiana ide-ide, tediimi lalungku mobaliki tunggaiaku au nguru-nguruna. Ide-ide kuukiakau sura ide bona nipakaroho pepoinalaimi i paturo au tou hai bona niewa liliuhe tauna au moanti paturo au sala. Lawi Pue Ala mopahawe paturo au tou irikita ope-ope au mewali kiraNa bona iti au tapoinalai, hai paturo iti bara peisa rabaliki.

Pampetudungia 3:3

Ido hai Kuuliangaakau: hangangaa nikatuinao paturo au nihadi hai au nidoko hangkoia. Peulaimide apa au rapaturoakau iti, hai menosomokau hangko i dosami. Lawi ane barakau mainga-inga, bara ina niisa impira kahawengku, lawi kahaweNgku iti nodo kahawe topanangka.