1 Timotiu 2:5 - Sura Malelaha

⁵ Hadua pea Pue Ala, hai hadua pea wori au peisa mopahintuwu Pue Ala hai manusia. Topepahintuwu iti, manusia wori, iami Kerisitu Yesu.

1 Timotiu 2:5 Mawu Ofanana

Matiu 1:1

Yesu Kerisitu iami pemuleana Datu Daudi, pemuleana Burahima. Mepongka hangko i Burahima hawe i Daudi, hanganda au mampemuleaka Yesu, idemohe:

Matiu 1:23

“Hadua anantowawine ina mantimi, hai moana hadua tobalilo. Anangkoi iti ina rahanga Imanuel.” Lempona, “Pue Ala mamporangaike.”

Lukasi 14:22

Pesulena, mololita mbuli i ampuna, nauli, ‘Ampu, hawamu kupopolumaomi, agaiana ara mani pohudaa au soa.’

Yohane 1:14

Ngkora iti mewali manusia, hai maida i olonta i dunia ide. Hai ikami, kiitami kamahilena kuasaNa. KuasaNa iti Nalambi hangko i UmaNa, lawi iami AnaNa HaduduaNa. LolitaNa tou mpuu, hai tongawa ope-ope kabulaNa laluNa irikita.

Yohane 17:3

Au Kutunggai hai ‘katuwo maroa au bara mokahopoa’ iami: Moisahe kaOiona Pue Ala au tou, au bara ara karoduaNa, hai moisa worihe Yesu Kerisitu au Nutudu mai i dunia.

Suro 4:12

Hangko inditi, nauli mbulimi Peturu, “Bara ara rara ntani molambi katuwo maroa hangko i Pue Ala, batena pea Yesu. Lawi i humalele dunia ide, bara ara tauna ntanina, batena pea Yesu au natudu mai Pue Ala i manusia, hai Ia pea au Nabuku mohoremake hangko i huku dosanta.”

Roma 1:3

Ngkora Marasa iti mampololita kana i Anana Pue Ala, au rapoanaka himbela hai manusia hangko i pemuleana Datu Daudi.

Roma 10:12

Ngkora iti batena kanahe ope-ope tauna, lawi bara ara posisalana to Yahudi hai tauna ntanina. Hadua pea Ampunda ope-ope tauna iami Pue Ala, hai mahile ahiNa i ope-ope tauna au meraroa Iria.

1 Korintu 8:4

Mewali, kana i paande au rapopenomba i anitu, niuli peisa raande, lawi taisa kadana ara pue ntanina, batena pea Pue Ala. Hai taisa ope-ope lengge anitu au rapenombai, bara ara au tou.

1 Korintu 8:6

Agaiana irikita, hadua pea Pue Ala, iami Umanta au mampopewali hinangkana au ara; Ia pea pongkana katuwonta. Hai hadua wori Amputa, Yesu Kerisitu, Iami au napopatoa Pue Ala mampopewali hinangkana au ara. Iami au moweike katuwo.

Galatia 3:20

Mewali, Aturana Pue rapahawe i manusia melempo i Musa. Agaiana i kanapahawena Pue Ala dandiNa i Burahima, bara ara au mosarungkoroi. Batena pea Pue Ala haduduaNa au mopahawe dandi iti.

Epesu 4:6

Hadua pea Pue Ala au rapouma ope-ope tauna, au makuasa irikita ope-ope, au ara i lalunta hai au mampobago ope-ope melempo irikita.

1 Timotiu 6:13

Mewali Timotiu, i lindona Pue Ala au mopatuwo hinangkana, hai i lindona Kerisitu Yesu au mopahawe notoNa i Pontiu Pilatu kuuliangaako:

Ibarani 12:24

Hawemokau i Yesu, au mewali nente, au mopakaroho dandina Pue Ala au wou au mopahintuwu manusia hai Pue Ala. I tempona Yesu rapapate, mabubumi waheNa. Hai waheNa iti masuli hangko i wahena Habeli hangkoia.

Ibarani 7:25

Ido hai Nabuku mokabahake hangko i huku dosanta hai moweike katuwo maroa au bara ara kamakurana, asala mohungkukike Pue Ala i lalu hangana Yesu. Lawi Ia au tuwo i hae-haena hai mamperurui liliuke i lindona Pue Ala.

Ibarani 8:6

Agaiana pobagona Pue Yesu meliu kamaroana hangko i pobagonda tadulako mpenomba i dunia ide, lawi Yesu mewali nente au mopahawemi podandina Pue Ala au wou, au melumbu kamaroana hangko i podandi au napahawemi Musa. Hai hangko i podandi au wou iti, molambike dandina Pue Ala au meruu kamaroana.

Ibarani 9:15

Anti popenombaNa au bara ara kamakuraNa, Kerisitu mewali Nente au mopahawe podandi au wou, au mopahintuwu manusia hai Pue Ala. Iti Nababehi bona ope-ope tauna au nakakio Pue Ala molambi pewati au bara mokahopoa moula apa au nadandiahe Pue Ala i anaNa. Lawi i tempona mani ara podandi au nguru-nguruna au napahawe Musa, manusia moliungi Aturana Pue Ala. Ido hai Kerisitu mate mohompo peliunginda iti.

1 Yohane 2:1

Anangku, ide kuukiakau bona ineekau mobabehi dosa. Agaiana ane ara au mobabehi dosa, arami hadua au mamperuruike i lindona Pue Ala Umanta, iami Yesu Kerisitu au manoto.

Pampetudungia 1:13

I olo pambolia biti hulo iti, kuita hadua tauna au lenggeNa nodo Ana Manusia. HampiNa mandoe hawe i bitiNa hai pondaNa nawewehi bulawa au nodo pampou.