1 Timotiu 1:15 - Sura Malelaha

¹⁵ Manoto mpuu lolita au manguli: “Kerisitu Yesu mai i dunia bona mohorema tomadosa hangko i huku dosanda.” Tou mpuu lolita iti hai hintoto tapoinalai. Hai hangko i ope-ope tomadosa, ikomi au melumbu dosangku.

1 Timotiu 1:15 Mawu Ofanana

Matiu 1:21

Maria ina moana hadua tobalilo. Anangkoi iti, hangangaa nuhanga ‘Yesu’, lawi Ia au ina mohorema taunaNa hangko i dosanda.”

Matiu 18:10

“Mewali, mainga-inga mpuukau. Inee nipakoi tauna au koi tuwona nodo anangkoi ide, nauri hadua pea. Lawi tou-tou Kuuliangaakau: malaeka au mokampaihe maida liliu i lindona UmaNgku au ara i suruga.

Matiu 18:11

[Lawi tunggaiaKu Iko Ana Manusia mai i dunia bona mohaokiNa tauna au karao hangko i Pue Ala hai mohoremahe hangko i huku dosanda.]

Matiu 20:28

Hangangaa nipeulai poantiKu, Iko Ana Manusia. Lawi tunggaiaKu mai i dunia ide, baraNa mai mewali topohawa. Agaiana kamaiNgku i dunia ide bona mewaliNa hawi, hai bona mohuhuna wataNgku rapapate mohuru salanda tauna bosa.”

Matiu 9:13

BaraNa mai mokakio tauna au manoto babehianda. Kamaingku ide, mokakioNa tomadosa bona menosohe hangko i dosanda. Mewali, nipekiri hampai apa lempona Ngkorana Pue Ala au teuki node: ‘Bara Kuperapi binata au nipopenomba Iriko. Au Kuperapi bona maahikau i hangka rangami.’ ”

Markus 2:17

Nahadi Yesu lolitanda, ido hai Nauliangaahe, “Tauna au bara mahai, bara moparaluu sando. Tomahai pea au moparaluu sando. BaraNa mai mokakio tauna au manoto babehianda. KamaiNgku ide, maiNa mokakio tomadosa bona menosohe hangko i dosanda.”

Lukasi 15:2

Ara worihe toParisi hai guru-guru agama au moitahe. Mohume-humemohe, rauli, “Ae! Ia mohimada hai tomadosa, hai maandehe hihimbela!”

Lukasi 19:10

Ido hai Iko, Ana Manusia, maiNa i dunia ide. Lawi tunggaiaKu bona mohaokiNa tauna au karao hangko i Pue Ala hai mohoremahe hangko i huku dosanda.”

Lukasi 5:32

BaraNa mai mokakio tauna au manoto babehianda. KamaiNgku ide, maiNa mokakio tomadosa bona mampenosoihe dosanda.”

Yohane 1:12

Agaiana hema-hema au modoko hai mepoinalai Iria, ihirami au Napopewalihe anana Pue Ala.

Yohane 1:29

Kahalona, Yohane moitami Yesu mai iria. Nauli i tauna bosa, “Nipeita! Oloumi mai Ana Dimba au napasilolonga Pue Ala. Iami au ina mopahuru watanta, mohuru dosanta.

Yohane 12:47

Tauna au mohadi lolitaNgku agaiana bara napeulai, bara Iko au mohuku. Lawi tunggaiaKu mai i dunia ide, baraNa mai mohuku manusia. Agaiana MaiNa mokabahahe hangko i huku dosanda.

Yohane 3:36

Tauna au mepoinalai i Anana Pue Ala iti, molambihe katuwo maroa au bara mokahopoa. Agaiana tauna au bara mengkoru i Anana Pue Ala, barahe molambi katuwo iti. Molambirihe pehukuna Pue Ala au bara mokahopoa.

Suro 11:1

Ope-ope surona Pue Yesu hai halalu hampepepoinalainda au ntanina au ara i Yudea mohadi kaaranda tauna au barahe to Yahudi au modoko worimohe Ngkorana Pue Ala.

Suro 11:18

Karahadina lolitana, barapohe mosalai Peturu. Hai motoiamohe Pue Ala, rauli, “Ide-ide tongawami irikami, Pue Ala modoko worihe tauna au barahe to Yahudi, hai Naweihe katepaka menoso hangko i dosanda duunda molambi katuwo maroa au bara mokahopoa.”

Suro 3:26

Ido hai Pue Ala mopatuwo hule Yesu AnaNa. Nguru-nguruna Yesu Natudu mai irikita to Yahudi bona Nawatike hai Naninike mampenosoi hinangkana babehianta au kadake.”

Roma 11:14

Hangko i pobagongku ide, kuharunga kaina aranda hangka to Yahudingku moita tauna au barahe to Yahudi mepoinalai i Pue Yesu duuna mahina lalunda hai mampeinao worihe mepoinalai Iria bona tehoremahe hangko i dosanda.

Roma 5:6

Nodemi ahina Pue Ala irikita: i tempo au napakanoto Pue Ala, hangko damani ara rohonta mokaraohi dosanta, i tempo iti Kerisitu mate mopahuruke nauri bara manike mengkoru i Pue Ala.

1 Korintu 15:9

Lawi ide iko, suro au tepakoi tuwongku hangko i ope-ope surona Pue Yesu. Katouana, barana hintoto rauli suro, lawi hangkoia mampopeahi-ahina tauna au mepoinalaihe i Pue Yesu.

Epesu 3:8

Hangko i ope-ope tauna au mepoinalai i Pue Yesu, ikomi au tepaiwoi tuwongku. Nauri nodo, anti kabulana laluna Pue Ala, Napileimona bona mobambarina Ngkora Marasa i tauna au barahe to Yahudi kana i kamahilena pewati au bara tehoka au tahumba hangko i Kerisitu.

1 Timotiu 1:13

Hangkoia mopapakoina Yesu hai mampopeahi-ahihe tauna au mepoinalai Iria. Agaiana nauri nodo, Napokaahi mpuuna, lawi i tempo iti bara manina mepoinalai Iria hai bara mani kuisa lempona apa au kubabehi.

1 Timotiu 1:19

Mantahako i lalu pepoinalaimu, hai mobabehi liliuko babehia au maroa hangko i kabulana lalumu. Ara bahangkia tauna au mosapuaka ope-ope paturo ide, alana marugi pepoinalainda.

1 Timotiu 3:1

Tou mpuu lolita au manguli node: tauna au mampeinaohe mewali penatua, mohaokihe bago au maroa.

1 Timotiu 4:9

Lolita ide tou hai hangangaa tapoinalai mpuu.

1 Timotiu 6:13

Mewali Timotiu, i lindona Pue Ala au mopatuwo hinangkana, hai i lindona Kerisitu Yesu au mopahawe notoNa i Pontiu Pilatu kuuliangaako:

2 Timotiu 2:11

Tou mpuu lolita kana i Yesu au manguli node: Ane mateke hihimbela hai Ia, ina tuwo worike hihimbela hai Ia.

Titu 3:8

Tou mpuu lolitangku inona. Ido hai kuperapi bona paturo ide nupakanotoahe ope-ope tauna au mepoinalai i Pue Ala bona mobabehi liliuhe apa au maroa. Paturo ide iami paturo au maroa, hai au mobundu i ope-ope tauna.

Ibarani 7:25

Ido hai Nabuku mokabahake hangko i huku dosanta hai moweike katuwo maroa au bara ara kamakurana, asala mohungkukike Pue Ala i lalu hangana Yesu. Lawi Ia au tuwo i hae-haena hai mamperurui liliuke i lindona Pue Ala.

1 Yohane 3:5

Hai niisa mpuu halalu, tunggaiana Yesu mai i dunia ide bona mogewo dosa manusia, nauri Ia haduduaNa, bara ara dosaNa.

1 Yohane 3:8

Tauna au mobabehi liliu dosa, napoanahe Datu Tokadake. Lawi Datu Tokadake madosami hangko i nguru-nguruna. Mewali, tunggaiana Anana Pue Ala mai i dunia bona mogero bagona Datu Tokadake iti.

1 Yohane 5:11

Idemi posabina Pue Ala: Ia moweimoke katuwo maroa au bara mokahopoa, hai katuwo iti talambi anti pohintuwuta hai AnaNa.

Pampetudungia 21:5

Roo indo, nauli Hadua au mohuda i kadera kadatua, “Ide-ide hinangkana ina Kuwouki. Nuukimi lolitaNgku ide, lawi batena tou hai ina tepabukei mpuu.”

Pampetudungia 22:6

Roo indo, nauliangaana malaeka iti, “Ope-ope lolita ide tou hai ina tepabukei. Pue Ala au mowei InaoNa i ope-ope nabiNa, Ia au motudu malaekaNa mai mampopaisa i hawiNahe apa au hangangaa holiga mewali.”

Pampetudungia 5:9

Monani-nanimohe hambua nani au wou, rauli: “Oiomi au hintoto modoko sura iti hai mobungkahi penena lawi rapapatemoKo; Hai waheMu au mabubu i kapateMu, Nupopoholomohe tauna i humalele dunia, i ope-ope kadatua, i ope-ope pemulea hai i hinangka basa. Hai Nuhuhuhe i Pue Ala.