1 Peturu 5:9 - Sura Malelaha

⁹ Hangangaa niewa mpuu hangko i pepoinalaimi au maroho. Lawi niisa: halalumi hampepepoinalai i humalele dunia molambi worihe kapari nodo au nihumba.

1 Peturu 5:9 Mawu Ofanana

Lukasi 22:32

Agaiana Kupekakaengaako Simo bona dati maguli pepoinalaimu. Mewali, ane menosoko hai mesuleko Iriko, hangangaa nupakaroho lalunda halalumu.”

Yohane 16:33

Ope-ope ide Kuuliangaamokau bona molambikau katinda lalu hangko i pohintuwumi hai Iko. Tangami mani i dunia ide, batemi rapopeahi-ahi. Agaiana nipakaroho lalumi, lawi kuasa tokadake au ara i lalu i dunia ide Kunangimi.”

Suro 14:22

I ope-ope boea au rapolumaongi, Paulu hai Baranaba mohuweki hai mopakaroho lalunda tauna au mepoinalai i Yesu bona tetida pepoinalainda, rauliangaahe, “Ikita hangangaa molambi ngkaia pakana kapari hangko damanike mesua i lalu poparentana Pue Ala.”

1 Korintu 10:13

Hinangka pekelo au morumpake, pekelo biasa pea au ralambi wori tauna ntanina. Agaiana Pue Ala mokatuinao liliu dandiNa irikita; barake ina Napogiangaa rakelo meliu hangko i rohona lalunta. Ane narumpake pekelo, Pue Ala ina moweike rara monangi pekelo iti bona peisake mantaha i lalu pepoinalainta.

Epesu 4:27

dati ara katepakana Datu Tokadake mokelokau.

Epesu 6:16

Hai hangangaa mepoinalai liliukau i Pue Ala. Pepoinalaimi iti mewali labami. Anti pepoinalaimi, peisakau mohungki hinangka mata pana au napatotoiakau Datu Tokadake.

Kolose 2:5

Lawi nauri karaona hangko irikamu, agaiana aratokau i lalungku. Matana mpuuna mohadi kamarohona pohintuwumi hai pepoinalaimi i Kerisitu.

1 Tesalonika 3:3

Kiuliangaa nodo bona dati ara hadua au mousuli hangko i pepoinalaina anti kapari au morumpakau. Lawi niisato halalu, kapari au morumpake ide moula tunggaiana Pue Ala.

1 Timotiu 6:12

Nupari-pari bona tuwoko hintoto hai apa au nupoinalai, hai nupakaroho pepoinalaimu au moantiko i katuwo maroa au bara mokahopoa. Lawi itimi tunggaiana Pue Ala mokakioko mewali taunaNa bona molambiko katuwo maroa au bara mokahopoa hai au nupangakumi i lindonda tauna bosa, kamepoinalaimu i Pue Yesu.

2 Timotiu 3:12

Taisami: ope-ope tauna au meula i Kerisitu Yesu hai au mengkoru i Pue Ala batena ina rapopeahi-ahi.

2 Timotiu 4:7

Kupeulai maroami rara au napakanotoana Pue. Kupahopomi bagongku. Pepoinalaingku bara tebali hawe i kahopoana.

Ibarani 11:33

Anti pepoinalainda: mampopengkoruhe datu, moparentahe i kanoto-notoana, molambihe apa au nadandi Pue Ala, mokamumuhe nganga singa,

Ibarani 12:8

Ope-ope tauna au napoana Pue Ala, batena Nakambaroa. Mewali, ane rapana barakau nakambaroa Pue Ala, lempona barakau Napoana.

Yakobu 4:7

Ido hai kuweikau lolita: mengkorukau i Pue Ala hai niewa Datu Tokadake hai batena meloho hangko irikamu.

1 Peturu 1:6

Ido hai hangangaa matana liliukau. Ide-ide masusa lalumi lawi ara ngkaia pakana kapari au morumpakau. Agaiana nauri nodo, hangangaa nipamatana lalumi, lawi kaparimi iti hampalai pea.

1 Peturu 2:21

Idomi pongkana pane nakakiokau Pue Ala bona maroa babehiami kehapirikau rapopeahi-ahi. Lawi Kerisitu mohalea kapari anti kaikamuna, hai Ia mewali pandiri irikamu bona nipeulai poantiNa.

1 Peturu 3:14

Agaiana ane rapana molambikau kapari hangko i babehiami au manoto, morasikau! Mewali, ane arahe tauna au mampopalangakau, ineehe nipokalanga hai inee karao inaomi.

1 Peturu 4:13

Aginari nipokatana, lawi molambimokau kirami i lalu kapari au morumpa Kerisitu. Ido hai halalu, ane hawe tempona Kerisitu mopatongawa peawana tuwoNa i ope-ope tauna, ina matana mpuukau.

Pampetudungia 1:9

Iko, Yohane, halalumi i lalu hangana Yesu. Himbela karapopeahi-ahinta anti peulanta i Yesu, hai himbela kamolambita kira i lalu poparentana Pue Ala, hai himbela wori kamantahata mohalea pepopeahi-ahi iti. Ratendena i lewuto au rahanga Patmos lawi mopahawena Ngkorana Pue Ala hai mosabina kana i Yesu au kupenombai.

Pampetudungia 6:11

Ope-ope raweihe hantau badu ngkalanga au bula. Hai nauliangaahe Pue Ala, “Nipegia hampai, lawi ara manihe rangami au hampopobago hai halalumi hampepepoinalai au ina rapapate nodo ikamu. Ane handami kabosami au rapapate, hangko Kuhurungirihe iwalimi.”

Pampetudungia 7:14

Kuhanai: “Barahe kuisa, ampu. Nuuliangaa wongkoia.” Nauliangaana: “Ihira iti, tauna au mamporaraimohe au rauli Tempo Pepopeahi-ahi au Rumihi Ntepuu. Hampinda rabahoi hai wahena Ana Dimba bona mewali bula.