1 Peturu 2:8 - Sura Malelaha

⁸ Tehubehe Iria, lawi barahe mampoinalai Ngkorana Pue Ala. Iti mewali moula apa au napakanotoamohe Pue Ala.

1 Peturu 2:8 Mawu Ofanana

Lukasi 2:34

Roo indo, Simeo mowatihe hai mouliangaa Maria, “Anti kahawenami Anamu ide, bosa to Isaraeli ina molambi pehuku, agaiana bosa wori tauna ina Nahorema bona molambihe katuwo maroa. Iami au Napilei hai au Natudu mai Pue Ala, agaiana Ia ina rasapuaka tauna bosa,

Roma 9:22

Nodo wori Pue Ala makuasa mobabehi apa peundeaNa irikita tauna. Katouana, ara tauna kadake au hintoto mpuu napokarumpu Pue Ala bona tongawa kuasaNa. Hintoto mpuuhe rahuku hawe i hae-haena, agaiana nauri nodo, sabara mani Pue Ala i tauna iti.

1 Korintu 1:23

Agaiana ikami, mopahawe peangkai kapatena Kerisitu au rapaku i kau mombehape. Bambari iti rapokakoinao to Yahudi, hai i tauna au barahe to Yahudi, bambari iti raimba pea lolita tontuli.

Galatia 5:11

Halalu, arahe tauna au mouli kaikona au mopaguru tauna mampeulai ada mpetile Aturana Musa. Bara tou lolitanda iti! Ane kenodo pepaturongku, kebara ara to Yahudi au moewana. Idemi au kupaturoakau: hangangaa mepoinalaike i Kerisitu, lawi anti kapatena Kerisitu au rapaku i kau mombehape, ido hai peisake mewali manoto i peitana Pue Ala. Anti pepaturongku ide, ido hai to Yahudi iti rumpuhe hai rapopeahi-ahina.

1 Tesalonika 5:9

Napileike Pue Ala bona barake rahuku, agaiana Napileike bona molambike katuwo maroa i lalu kaNahoremanta Amputa Yesu Kerisitu.

1 Peturu 2:6

I lalu Sura Malelaha, Datu Topehompo rapandiri nodo haogu watu pohudaa sou. Nauli Pue Ala: “Peita! Kupileimi haogu watu au mahile holona, Kuwoli i Bulu Sion, Kupopewali watu pohudaa sou. Hema-hema au mepoinalai Iria, peharunganda ina tepabukei.”

1 Peturu 2:7

Irikamu, tauna au mepoinalai, watu iti mobundu ntepuu. Agaiana i tauna au barahe mepoinalai, tepabukeimi au teuki i lalu Sura Malelaha node: “Watu au ratende topoaro sou, watu iti au mewali pohudaa sou.” Hai: “Watu iti au mewali katehubeanda, au moantihe manawo.”

2 Peturu 2:3

Guru au mepakanawo iti mohaoki peahe doi, mewali ina rapahaweakau lolita au rababehi haduduanda bona molambihe rasi hangko irikamu. Agaiana ara pehuku au mahaemi napasilolongaahe Pue Ala, hai karahukunda iti ina holiga mewali.

Yudasi 1:4

Kuuli ope-ope ide lawi arahe guru agama au mesua i olomi au moantihe paturo au sala. Tauna iti mangulihe, kaihiranami halalunta hampepepoinalai, agaiana katouana barahe mengkoru i Pue Ala. Rauli wori, peisatoke mampeulai peundeana lalunta au kadake, lawi Pue Ala maahi laluNa. Paturo iti kadake, lawi mobalikihe paturo au tou kana i kabulana laluna Pue Ala, hai mosapuakahe Datunta hai Amputa, Yesu Kerisitu. Ia pea au hintoto tapengkorui. Guru au mepakanawohe iti, ina rahukuhe, lawi hangkoia ara mpuuhe nabi au mampololita kana i hukuanda au napakanotoahe Pue Ala.