1 Peturu 2:12 - Sura Malelaha

¹² Arahe tauna au bara moisa Pue Ala au mopapakoikau hai mopakadakekau. Ido hai hangangaa nipamaroa-roa babehiami bona kamaroana babehiami ina tongawa irihira. Kahopoana, ina rapangaku kamaroana babehiami, alana motoiahe Pue Ala i alo kahaweNa.

1 Peturu 2:12 Mawu Ofanana

Matiu 10:25

Apa au mewali i hadua guru, iti wori au ina mewali i topeguruna. Apa au mewali i hadua tuana, iti wori au ina mewali i hawina. Maroa-roakau, lawi Iko, Ampumi, hai ikamu, topeguruNgku. Mewali, ane rapana Iko rahanga Beelsebul, datunda ope-ope seta, pelumbunami ikamu au meula Iriko. Ina rakakabosai worikau.”

Matiu 5:11

Morasikau ane rakakabosaikau, rapopeahi-ahikau hai rasalaikau hai mampopengaa lolita au kadake anti peulami Iriko.

Matiu 5:16

Nodo wori pewangka au ara i lalumi, inee niwuni. Nipakaroa babehiami bona ope-ope tauna ina moita babehiami iti, pane motoiahe Umami au ara i suruga.”

Matiu 9:8

Karaitana tauna bosa apa au mewali iti, langamohe, hai motoiahe Pue Ala, rauli, “Mahile mpuu kuasana Pue Ala au Nawei manusia!”

Lukasi 1:68

“Ikita to Yahudi, tatoiami Pue Ala Amputa! Lawi Iami au maike mosondaki, ikita anaNa, hai Iami au mokabahake hangko i iwalinta.

Lukasi 19:44

Ina marugikau, ikamu hai boeami hai ope-ope ihina, duuna barapi ara haogu watu i soumi au mentara i paidaana. Ope-ope iti hangangaa mewali, lawi bara niisa alo kamaina Pue Ala irikamu.”

Lukasi 6:22

Morasikau au rakahihi, au barakau rapohintuwua, rakakabosai hai rasalai tauna anti peulami Iriko Ana Manusia.

Yohane 13:31

Kapaduna Yudasi, mololitami Yesu, nauli, “Ide-ide Ana Manusia ina rapomahile. Hai apa au ina mewali Iriko, ina mopakahile wori Pue Ala.

Suro 15:14

Napahaweamoke Simo Peturu noumba Pue Ala nguru-nguruna motudungiahe ahiNa i tauna au barahe to Yahudi. Napilei worihe bona mewali taunaNa.

Suro 24:13

Bara wori ara hadua tauna au peisa mopatongawa katouna popahawenda inona au rasalaiana.

Suro 25:7

Kahawena Paulu inditi, aramohe to Yahudi au hangko i Yerusale meangka motoleliki Paulu, hai rasalai. Ngkaia pakana pepakanawo au kadake au raraia, agaiana popahawenda iti bara peisa rapakanoto.

Suro 28:22

Kipeinao mohadi kana paturo au nupoinalai iti. Lawi kihadi iumba-umba pea tauna mosapuaka paturo au nupoinalai iti.”

Roma 12:17

Ane arahe au mobabehi dake irikamu, ineehe nihurungi. Nibabehi apa au maroa i lindonda tauna.

Roma 13:13

Nibabehi babehia au hintoto i kabaakana. Ineekau mosusa-susa hai malangu-langu. I babehia tobalilo hai towawine, ineekau mobabehi babehia au sala ba au moula peundeana lalunta au kadake. Ineekau mobungka-bungka ba mahina.

Roma 14:18

Ane nodo peulanta i Kerisitu, ikita ina napokatana Pue Ala hai rabilake ranganta.

Roma 15:9

Kamaina Kerisitu i dunia ide, Ia mobungkahi rara bona tauna au barahe to Yahudi peisahe molambi katuwo maroa, hai motoiahe Pue Ala anti kamaroana laluNa irihira. I lalu Sura Malelaha ara lolita au teuki node: “O Pue Ala, kupomahileKo i olonda tauna au barahe to Yahudi. Monanina motoia hangaMu.”

1 Korintu 14:25

ope-ope au tewuniangi i laluna ina tewungkehi. Kahopoana, ia ina molingkudu menomba i Pue Ala, nauli, “Tou-tou mpuu Pue Ala ara irikamu!”

2 Korintu 1:12

Matana lalungki halalu, lawi kiisa, katuwongki i dunia ide pelumbunami i lalu pohintuwuki hai ikamu, hangko i kabulana mpuu lalungki kipopolumao. Hai apa au kibabehi iti bara hangko i kapande manusia agaiana hangko i kapande au Nakiraiangkai Pue Ala.

2 Korintu 13:7

Mekakaengkai i Pue Ala bona Natulungikau datikau mobabehi sala. Barakau kipekakaea bona mampetudungiangkai kamapandeki mobago agaiana bona mobabehikau apa au hintoto hai peundeana Pue Ala. Nauri ara manihe tauna au mosapuaka kuasangki, bara moapa, asala ikamu mobabehi liliukau apa au maroa.

2 Korintu 8:21

Ido hai kitudo amimi hema au meula i polumaongki ide bona tongawa kamanotona babehiangki, bara pea i peitana Pue, agaiana i peitanda wori tauna.

Epesu 2:3

Hangkoia, ikita ope-ope nodo wori babehianta. Moula peake peundeana lalunta hai pekirinta au kadake. Nodo ihira, i tempo iti ikita hintoto worike nakarumpui Pue Ala anti babehianta au kadake.

Epesu 4:22

hangangaa nitendemi babehiami au hangkoia hangko damanikau mepoinalai i Pue. Ope-ope peundeana lalumi au nipeulai i tempo iti mopakanawokau hai mopakarugi katuwomi.

Pilipi 1:27

Mewali, au paraluu irikamu iami babehiami hangangaa hintoto hai poulami Ngkora Marasa au hangko i Kerisitu. Hangangaa nibabehi nodo bona ane kupohidupaa manikau ba barapi, ina kuisa kamarohona pepoinalaimi hai kamarohona pohintuwumi i lalu pobagomi mobambari Ngkora Marasa.

Pilipi 4:8

Kahopoana halalu, kuperapi bona nipailalu liliu hinangkana au maroa hai au hintoto ratoia. Apa au tou, apa au hintoto rabila, apa au manoto, apa au malelaha, apa au merae, hai apa au teadai, itimi au hangangaa nipailalu.

1 Tesalonika 4:12

Ane nodo nibabehi, barapokau ina merapi-rapi i rangami. Hai ina raadaikau tauna au barahe mepoinalai i Pue Yesu.

1 Timotiu 2:2

ope-ope datu hai ope-ope topoparenta. Hangangaa tapekakaeahe topoparenta bona maroa katuwonta hai bara ara tauna au mampopeahi-ahike bona peisake menomba i Pue Ala hai mobabehi liliuke babehia au hintoto rabila ranganta.

1 Timotiu 4:12

Nauri mangura maniko, hintotoko rabila tauna. Hangangaa mewaliko pandiri i halalunta hampepepoinalai i lalu pololitamu, babehiamu, kamaahimu i hangka rangamu, pepoinalaimu i Pue, hai i lalu katuwomu au malelaha.

1 Timotiu 5:10

Hangangaa au manoto babehianda, pandirina: hangkoia mokadipura maroamohe ananda, matanahe modoko torare i sounda, motulungihe halalunda hampepepoinalai, mokadipurahe tauna au i lalu kapari, hai mobabehihe hinangkana bago au maroa.

Ibarani 13:18

Kiperapi bona nipekakaea liliungkai. Kiisa kabulana lalungki, lawi i paka-pakana kipeinao mobabehi liliu au manoto.

Ibarani 13:5

Inee worikau mohaoki liliu doi. Nipokatana apa au ara irikamu. Lawi ara lolitana Pue Ala au manguli: “Barako Kupalehi, hai barako Kukabaha.”

Yakobu 3:13

Ane ara tauna i olomi au maroa pekirinda hai au manoto lalunda, iti hangangaa rapatongawa i babehianda au maroa au mesuwu hangko i lalunda au mengkaiwoi moula apa au hintoto i tauna au manoto lalunda.

1 Peturu 2:15

Hangangaa nibabehi nodo, lawi itimi peundeana Pue bona hangko i kamaroana babehiami, tauna au bara moisa Pue barapohe bai mosalaikau.

1 Peturu 3:16

Hai hangangaa bula lalumi bona ane arahe tauna au mosasalai babehiami au maroa i peitana Kerisitu, ina maeahe.

1 Peturu 4:11

Hema au motuntu, hangangaa mopahawe apa au nadokomi hangko i Pue Ala. Hema au motulungi rangana, hangangaa metulungi hangko i karoho au nalambi hangko i Pue Ala. Hangangaa nibabehi nodo bona i hinangkana au mewali, Pue Ala rapomahile i lalu hangana Yesu Kerisitu, lawi Pue Ala au makuasa hai hintoto rapomahile hawe i hae-haena! Amin.

2 Peturu 3:11

Mewali, halalu, ane nodo kamagerona hinangkana au ara, noumbamoke ikita ide? Hangangaa tapamalelaha babehianta hai mengkoruke i Pue Ala.