1 Korintu 10:6 - Sura Malelaha

⁶ Ope-ope au mewali i to Yahudi hangkoia mobundu irikita ide-ide, lawi talambi paturo hangko i katuwonda datike mobabehi apa au kadake nodo ihira.

1 Korintu 10:6 Mawu Ofanana

Roma 5:14

Agaiana nauri nodo, mepongka i Adama hawe i nabi Musa, kapate mangulelemi i ope-ope tauna. Kehapiri poliunginda hawana Pue Ala bara nodo au nababehi Adama, batena matehe nodo Adama. Adama iami pandirina Yesu, hadua tauna au ina hawe i boko.

1 Korintu 10:11

Ope-ope au mewali irihira hangkoia hangangaa tapailalu mewali ngkora pandiri irikita ide-ide. Hai ope-ope au mewali iti, teuki bona datike molambi pehukuna Pue Ala nodo irihira. Lawi ikita ide, tuwoke hungkumi i kahopoa dunia.

Ibarani 4:11

Mewali halalu, hangangaa tapari-pari molambi pengkarooangaa hihimbela hai Pue Ala bona datike ara au mousuli hangko i pepoinalainta, nodo to Yahudi hangkoia au bara moula hawaNa.

Ibarani 9:24

Lawi paidaa malelaha au napesuangi Kerisitu, bara paidaa au rababehi tauna. Paidaa malelaha iti iami suruga. Hai Kerisitu mesua mpuu i suruga. Ide-ide, arami i lindona Pue Ala mamperuruike.

1 Peturu 3:21

KaNahoremanda hangko i owai au molaboa dunia peisa rapopandiri ada mperiu to Sarani ide-ide, lawi ada iti moanti katuwo maroa irikamu. Ane tababehi ada mperiu iti, bara peake mobahoi watanta. Agaiana ara tunggaiata au melumbu hangko inditi. Ada mperiu iti taimba hambua pamperapita i Pue Ala bona Nabahoike hangko i dosanta. Hai anti katuwona hule Yesu Kerisitu, Naampungi mpuumoke hangko i dosanta.

2 Peturu 2:6

Nodo wori hangkoia Pue Ala mohuku to Sodomo hai to Gomora hangkoia lawi madosahe. Boeanda Nagero hai api bona kaNahukuna wanua iti mewali pepopainga i tauna au barahe mengkoru Iria.

Yudasi 1:7

Nikatuinao wori wanua Sodomo hai Gomora hangkoia hai boea ntanina au hungku. Ampu boea iti mobabehihe nodo au rababehi malaeka au kupololita inona. Mebualosihe, mobabehihe sala hai ngkaia babehianda au merikai, alana boeanda rahuwe. Pehukuna Pue Ala i to Sodomo hai to Gomora iti mewali pandiri i ope-ope tauna, hai peisa rapandiri nodo api au bara ara kahopoana au mohuku ope-ope tauna au kadake babehianda.