1 Kolintu 8:3 - Kagi nemula (Word of God)

³ Dodoo sa etaw mehidu si Nemula, iya polo sa etaw nelayaman i Nemula.

1 Kolintu 8:3 Mawu Ofanana

Matéyo 7:23

Agulé mikagi a diyà kenagda, guwaen ku, ‘Taa yu, endà nelayaman ku kiyu ya. Pediyù yu diyà kenak, kiyu i tegebael salà.’”

Huwan 10:14

Dodoo aken sa tigtu mepion tegeipat kebilibili. Netiigan ku sa Emà ku owoy netiigan di ma aken. Hediya ma sa medoo etaw ku, enù ka netiigan ku kagda owoy netiigan da ma aken. Huenan di, mepion diyà kenak amuk meimatayan a anì mealukan ku kagda.

Huwan 21:17

Agulé, eg-igsà dema Hésus i sa ketelu di gulê, guwaen di, “O Simon anak i Huwan, eghiduwan ko pa aken temù?” Hê, egkebukul sa pedu i Pidelu enù ka telu gulê dé sa keigsà i Hésus amuk eghiduwan di. Huenan di, guwaen i Pidelu, “O Datù, netiigan ko doo langun. Netiigan ko ma eghiduwan ku kuna.” Agulé guwaen i Hésus diyà kenagdi, “Ipat ko dé sa medoo etaw ku lagà sa kebilibili ku.

Loma 11:2

Endà mebaluy di iniyugan i Nemula sa etaw di hinemilì di egoh anay egoh di endà pa duen sa langun pineduen di. Netiigan ta iya wé, enù ka duen sa kagi i Nemula igpesulat denu si Iliyas sa tegesugkow di egoh anay. Egsimbà Iliyas i diyà si Nemula danà sa medaet egbaelan sa medoo duma di tugod i Islaél,

1 Kolintu 13:12

Ini egoh di sa keketiig ta si Nemula lagà sa alung eghauwen ta diyà sa pegalungan endà metiengaw. Dodoo, meuma kani sa agdaw egoh ta tigtu humaa si Kelistu enù ka mesetaeng ki. Apiya di pa tukééy daa sa keketiig ku ini egoh di, meuma doo kani sa agdaw egoh di megulub sa keketiig ku lagà mendaa sa keketiig i Nemula kenak negulub.

1 Kolintu 2:9

Dodoo duen sa kagi i Nemula igpesulat, guwaen di, “Sa medoo mepion endà pa hinaa di mata etaw owoy sa endà pa dinineg di telinga etaw owoy sa endà pa netiigan di pedu etaw, iya polo sa tinapay i Nemula ibegay di diyà sa medoo etaw mehidu kenagdi.”

Galatiya 4:9

Dodoo ini egoh di, egpigtuu yu dé diyà sa tigtu Nemula diyà langit sa mighemilì keniyu egoh anay. Huenan di amuk etaw i Nemula yu dé, maen di ya egpelikuan yu sa tapay uledin diyà tanà endà mekealuk di keniyu? Endà mepion di amuk meudipen yu dema dahiya

2 Timotiyu 2:19

Dodoo, endà duen pesuwan ta egkebogo enù ka endà mekedan sa tuu tegudon igpetiig i Nemula. Netiigan ta sa kebagel di danà siini duwa kagi igpesulat i Nemula, guwaen di, “Netiigan i Datù sa tuu etaw di,” owoy guwaen di ma, “Mepion amuk sa uman etaw egdatù si Datù, meekedan di sa medoo medaet.”

Santiyago 1:12

Na, iya sa etaw tigtu meanggan sa etaw metigkel sa langun kelikutan di, enù ka amuk meubus sa kelikutan di, mesakem di doo sa untung di sa lalù endà meelut di igpasad i Nemula diyà sa langun etaw eghidu kenagdi.

Santiyago 2:5

O medoo duma ku eghiduwan ku, dineg yu ini i eg-ikagiyen ku. Apiya di pa tukééy daa sa pantiyali sa medoo etaw pubeli diyà tanà, hinemilì i Nemula ma doo kagda anì dakel sa kepigtuu da diyà kenagdi, owoy mekeunut da ma diyà sa kedatù di enù ka iya sa igpasad di diyà sa langun etaw eghidu kenagdi.

1 Pidelu 1:8

Apiya di pa endà eghauwen yu duu Hésus i, eghiduwan yu doo kagdi, owoy apiya di pa endà eghauwen yu duu ini egoh di, egpigtuuwen yu doo. Huenan di, egkeanggan yu temù. Endà metulon yu duu sa kekeanggan yu enù ka dakel temù.

1 Huwan 4:19

Eghidu ki enù ka muna si Nemula eghidu kenita.

1 Huwan 4:7

O medoo duma ku eghiduwan ku, mepion amuk sehiduway ki temù, enù ka kedu diyà si Nemula sa langun kehidu. Sumalà dé sa etaw mehidu, iya sa etaw inanak i Nemula owoy egkelayam ma diyà si Nemula.

Kepehaa I Hésus Kelistu 2:13

Netiigan ku apiya di pa eg-ugpà yu diyà siedò menuwa egsabaan i Satanas, tigtu meeles doo sa kepigtuu yu diyà kenak. Endà ma eg-ekedan yu duu sa ketulù ku egoh da mig-imatay si Antipas egoh anay. Kagdi sa etaw meudes egtulù sa kagi ku, huenan di neimatayan dutu siedò menuwa yu egsabaan i Satanas.

Kepehaa I Hésus Kelistu 2:19

Netiigan ku sa langun egbaelan yu. Dakel sa kehidu yu owoy meeles ma sa kepigtuu yu diyà kenak. Megelol yu ma egtabang diyà sa medoo duma yu, owoy meudes yu ma egtigkel sa kelikutan yu. Netiigan ku ma egkeumanan ma sa mepion egbaelan yu ini egoh di diyà sa egbaelan yu egoh anay.

Kepehaa I Hésus Kelistu 2:9

Netiigan ku netigkelan yu sa lihay nekeuma diyà keniyu. Netiigan ku ma tigtu yu pubeli, dodoo tigtu yu doo kawasà dutu langit dò. Netiigan ku ma endà tuu di sa kesumbung sa etaw Hudiyu keniyu. Guwaen da dò kagda sa tigtu etaw Hudiyu eg-unut diyà si Nemula, dodoo egtampil da polo diyà si Satanas.