Taitusi 2:3 - Molima

³ Ta wese ʼidewani vivine ʼenaʼenaʼidi una vonedi be edi ilivu aqiaqina ʼinega yani qabuna ina viaviaqia, ʼinega tomotau ina ʼitedi ina vonaya, “Vonahaqiaqi, omoʼe vivine diavona Yaubada ena tomotauyavo!” Ta ge ina vevonavona mali tomotau weaqidi. Ta wese goʼila waiwaina ge ina numa ʼodaʼodaqa, ta ʼesi ilivu aqiaqina be toa tunutunuqina ina veʼitayea mali tomotau ʼidia.

Taitusi 2:3 Mawu Ofanana

Loma 1:29

Tuta qabuna ilivu luveluveifadi iviaviaqidi, ʼidewani ilivu kwavakwavana be, vemanuguba be, veʼidiʼidi be, veʼifiʼifi be, luveʼaliga be, vedavi be, suluva be, awagila ta wese vevonavona tomotau weaqidi.

Loma 16:2

Ta nuanuagu ona ʼebeʼewea itaʼa tovetumaqana eda ilivu ʼinega, mana tauna wese eda Kaiwabu ena tomotau taha. Ta ʼeguma taha yani ʼinega nakusa, e ʼinega ona ʼabivitea, mana tauna ʼevisa tomotau niʼa iuledi edi nuanua taha taha ʼidia, ta yaʼa wese iula qiduana niʼa yalobea ʼinega.

Efeso 5:3

ʼInega ilivu luveifana ʼidewani velamoʼeno kavokavovo be, vemanuguba ta wese yubai edi ilivu ʼidewani ge ona viaqidi, mana ilivu diavona ge taha wese Yaubada ena tomotauyavo daluaqiaqiedi.

1 Timoti 3:11

Ta wese ʼidewani dikoni moqanediavo tuta qabuna ilivu aqiaqina ina viaviaqidi, e ʼinega tomotau qabudi adi fata ina ʼamayabedi. Ta ge ina vetoatoa guguna ta ina vevonavona ma ediavo tomotau weaqidi. Luaqiaqiedi be taudiega ina ʼitamakidi ilivu luveifana ʼidiega. Ta wese ma adi vetumaqana edi viaqa qabuna ʼidia.

1 Timoti 3:8

ʼIdewani wese dikoni edi ilivu aqiaqina ina veʼita ʼifoqeyedi tomotau matadia, ʼinega tomotau qabudi ina ʼamayabedi edi ilivu tunutunuqina ʼinega. Ta ge ina vemeahaqila be goʼila waiwaina gebu ina lunuma ʼodaʼodaqa. Ta gebu ina vemanuguba mane weaqina.

1 Timoti 5:23

Ge goʼila namo una numa, ta ʼesi luaqiaqieu ʼeguma ʼoine goyona wese una numa gamou ena visiqa weaqina, mana tuta qabuna uvevevihiqa.

Taitusi 1:7

Vonahaqiaqi, ʼekalesia ana toludebana Yaubada weaqina fewafewa, ʼinega luaqiaqiea be ge taha luveifana ʼinaya naʼenoʼeno. Ta ge navedeba ʼiʼwana be, ge diana navilei be, ge goʼila waiwaina nanuma ʼodaʼodaqa be, ge tomotau navunuqidi ta wese mane ge nuana naʼewei.

Taitusi 2:4

Ta vivine dina luaqiaqiedi be vivine tovaqiwouwou ina veʼita aqiaqiedi maʼoda ʼinega moqanediavo be natudiavo ina veyoluba ʼaiqedi.

Ibeliu 5:12

Vonahaqiaqi, omiʼa lova niʼau Vale Aqiaqina omadunoqolia, ʼinega luaqiaqiemi be mali tomotau oda veʼitedi. Ta ge ami fata, mana Vale nana ana avutugu ge oda alamania, ʼinega ana ʼita be taha toga veʼita nana naveʼita ʼeviviemi. Ta omiʼa kavona gogama dilidilidi susuya isususu, ta ge adi fata ʼabwaga falafaladi ina ʼaini.

Veʼita 2:20

Ta ʼesi ge eda qaiawa taha yani weaqina, mana vavine Iesibeli ena vona oʼawahaqiaqiea vonigo tauna Yaubada ana tosimana taha. Ta tauna gebu, mana vavine nana egu tofewayavo lihidi ilugu ilivu luveifadi ʼinaya ʼidewani velamoʼeno kavokavovo ta wese ʼabwaga vevegubana tokwalui ʼidia ʼinega veveʼainidi.