Yoweli 2:12 - Mandinka Bible

¹² Bari hani saayiŋ, Yaawe ko: “Ali muru n kaŋ ali sondomoo bee la, ali niŋ suŋo, kumboo niŋ woosiyo.”

Yoweli 2:12 Mawu Ofanana

2 Samuweli 24:10

Bari kabiriŋ wo keta, Dawuda sondomoo ye a dati ka a jalayi, bituŋ a ko Yaawe ye ko, “Ŋa junube kuu baa le ke, ka ñiŋ kuu siifaa ke! Yaawe, dukaree sabari, i ye yamfa n ye. Ŋa kuu fuuriŋ baa le ke.”

2 Taarika 30:6

Bituŋ mansa niŋ a la ñaatonkoolu la yaamaroo kaŋ, kiilaalu niŋ leetaroolu janjanta Banisirayila bee kono, aniŋ Yahuuda ko: “Alitolu Banisirayilankoolu mennu kanata Asiriya mansoolu ma, ali muru naŋ Yaawe kaŋ, Iburayima la Alla, Isiyaaka la Alla, aniŋ Yaakuba la Alla, fo a fanaa si muru naŋ ali moo toomaalu kaŋ.

2 Taarika 6:27

i si i lamoyi ka bo Arijana kono. I si yamfa i la moolu Banisirayilankoolu la junuboo la, i la dookuulaalu, ì ye ì karandi ka taama kuu kendoo la. I si sanjoo jindi naŋ bankoo kaŋ, i ye meŋ dii i la moolu la ka ke ì la keetaafeŋo ti.

Esita 4:16

“Taa i ye taa Yahuudoolu bee kafu ñoo ma mennu be Susa saatewo to, ali ye suŋ n ye. Ali kana domori ke, waraŋ ka i miŋ fo tili saba suutoo niŋ tiloo. N niŋ n na dookuulaa sunkutoolu be suŋ na le ko ali fanaa. Niŋ ñiŋ keta m be taa mansa yaa le, hani a ye a tara luwaa maŋ soŋ a la. Niŋ m be kasaara la, n si kasaara.”

2 Musa 33:5

kaatu Yaawe ye Musa yaamari le nuŋ, ka a fo ì ye ko, “Ali mu moo kaŋ jaaroolu le ti. Niŋ a ye a tara, n niŋ ali be taa la ñoo la, a te waati sii la, m be ali tumbuŋ na. Saayiŋ ali si ali la ñaroolu bondi, n si naa a loŋ, m be meŋ ke la ali la.”

Yesaya 22:12

Yaawe Alihawaa Maariyo be lafi la le, ali ye woosii ka kumboo wo luŋo la kuwo la, ali ye ali kuŋo lii ka booto funtoo duŋ, ka ali la niikuyaa yitandi.

Yesaya 58:4

Ali la suŋo ka labaŋ sonkoo niŋ fitinoo le la, aniŋ ñoo kurupeñe jawoo. Niŋ ali sunta wo kaŋ, fo ali ye a miira ali la duwaa be futa la nte la le baŋ?

Yeremiya 3:22

Yaawe ko: “Muna ali muru naŋ, alitolu diŋ muritiriŋolu, m be ali la murutoo jaara la le. “Ali ko, ‘A fele, ǹ naata i kaŋ ne, kaatu ite le mu Yaawe ǹ na Alla ti.

Yeremiya 36:7

A si ke, ì ye woosii Yaawe ye ka a daani, moo-wo-moo ye yelema ka bo a la sila kuruŋo kaŋ, ka daaniri ke Yaawe la balafaa la. Kaatu ko, Yaawe ye jusukandoo niŋ kamfaa meŋ ke ñiŋ moolu kamma, a warabaata le.”

Yeremiya 4:1

Yaawe* ko: “Muna Banisirayila, niŋ i be muru la naŋ, muru naŋ n kaŋ. I la jalaŋ ñewundiŋolu bee bondi n ñaa koto, i kana soŋ filoo ye i taa kotenke.

Yeremiya 4:2

Niŋ i ka kali tooñaa, tiliŋo, aniŋ foroyaa le kaŋ, ì ka kali meŋ na ko, ‘A be koyiriŋ ñaameŋ ko Yaawe be baluuriŋ ne,’ wo to bankoolu be neemoo duwaa la ì faŋolu ye nte too le la, n na kuwo ye ke ì ye ŋaañaaraŋo ti.”

Esekiyeli 33:11

Wo to, ite hadamadiŋo, a fo ì ye ko, a be koyiriŋ ñaameŋ ko nte Yaawe i Maariyo be baluuriŋ ne: Nte buka kontaani moo kuruŋo la saayaa la, bari n ka kontaani ñiŋ ne la, a ye a koo dii a la kuu jawu kewo la, a ye baluu. Banisirayilankoolu, muŋ ne ye a tinna, ali lafita ka faa? Ali ali koo dii ali la kuu jawu kewo la, ali ye baluu.” Maarii Yaawe le ye a fo.

Daniyeli 9:3

Bituŋ ŋa n ñaa tiliŋ duwaa la, aniŋ suŋo, ka Maariyo Alla daani. Ŋa booto funtoolu le duŋ, ŋa seebuutoo maa m faŋ na, ka n na niikuyaa yitandi.

Hoseya 12:6

Saayiŋ alitolu Yaakuba koomalankoolu, ali muru Alla kaŋ, ali kanoo muta, ali ye tiliŋ, ali si i tuuku ali la Alla la waatoo bee la.

Hoseya 12:7

Yaawe ko: “Ite Efurayimu, i be le ko juloo, meŋ na peesarilaŋo maŋ tiliŋ, a be hameriŋ ka moolu nakari.

Hoseya 14:1

Banisirayila, ali muru Yaawe* kaŋ, ali la Alla. Ali faŋolu la kuruŋyaa le ye ali boyindi.

Hoseya 6:1

Moolu ko, “Ali naa, ŋà muru Yaawe* kaŋ, ate le ye ǹ dimindi, a be ǹ jaara la le. Ate le ye m̀ barama, a be ǹ kendeyandi la le.

Yoweli 1:13

Alitolu piriisoolu, ali booto funtoo duŋ, ali ye woosii, ali kumboo, alitolu Alla la sadaabolaalu. Alitolu, n na Alla la dookuulaalu, ali naa, ali ye suutoo bee ke booto funtoo kono. Siimaŋ sadaa niŋ miŋ feŋ sadaa danta ali la Alla Batudulaa Buŋo to.

Jakariya 7:3

Ì ko fanaa, ì si piriisoolu* ñininkaa, mennu be Yaawe Alihawaa Maariyo* Batudulaa Buŋo* to, aniŋ annabiyomoolu ko, “Fo ǹ ñanta suŋ na le baŋ saŋo kari luulunjaŋo ǹ niŋ niikuyaa, ko ǹ ka a ke ñaameŋ sanji jamaa la?”

Jakariya 7:5

“A fo bankoo moolu bee ye, aniŋ piriisoolu ko, ‘Ñiŋ sanji taŋ woorowuloo meŋ tambita, ali ka suŋo meŋ ke saŋo kari luulunjaŋo niŋ woorowulanjaŋo kono, ali niŋ niikuyaa, fo ali ka wo suŋo ke nte le ye baŋ?

Malaki 1:9

Wo to, ali Alla la hiinoo daani, ka balafaa soto ǹ ye. Fo Yaawe Alihawaa Maariyo be ali la kuwo muta la le baŋ, ñiŋ sadaa siifaalu bondoo la?

Kiilaalu 26:20

Folooto, ŋa kawandoo ke wo moolu le ye, mennu be Damasiku jee, bituŋ Yerusalaamu, Yudeya, aniŋ moolu fanaa ye, mennu maŋ ke Yahuudoolu ti. N ko ì ye ko, ì si ì koo dii ì la junuboolu la ka naa Alla kaŋ, aduŋ ì si ì la tuuboo yitandi ì la kebaaroolu kono.

Kiitindirilaalu 2:4

Kabiriŋ Yaawe la malaayikoo ye ñiŋ kumoolu fo Banisirayilankoolu ye, ì naata kumboo baake.

Kiitindirilaalu 20:26

Banisirayila la kelediŋ kafoo bee le muruta ka taa Beteli ka sii Yaawe ñaatiliŋo la jee ka kumboo. Ì sunta wo luŋ fo wulaaroo. Bituŋ ì ye jani sadaalu* bo Yaawe ñaatiliŋo la, aniŋ kayira sabatindiraŋ sadaalu.

1 Samuweli 7:3

Bituŋ Samuweli ko Banisirayilankoolu bee ye ko, “Niŋ ali be muruŋ na Yaawe kaŋ niŋ ali sondomoo bee la, wo to ali ñiŋ alla koteŋolu, aniŋ Asitoreti* jalaŋolu fayi, ali ye ali ñaa tiliŋ Yaawe la ka a dammaa batu, bituŋ i si a je, a si ali bondi noo ñiŋ mantooroo kono, Filisitinkoolu ka meŋ ke ali la.”

1 Samuweli 7:6

Kabiriŋ ì benta Misipa, ì ye jiyo bii, ì ye a boŋ Yaawe ñaatiliŋo la. Wo luŋo ì sunta le, aduŋ ì sonta jee le to ko, ì ye junuboo soto Yaawe la karoo la le. Samuweli ka kiitiyo kuntu Banisirayilankoolu ye Misipa le.