Yeremiya 30:3 - Mandinka Bible

³ Kaatu luŋolu be naa le, m be n na moolu, Banisirayila niŋ Yahuuda murundi la ì la firiŋo kono. M be ì murundi la bankoo kaŋ ne, ŋa meŋ dii ì mumuñolu la, aduŋ ì be a taa la le kotenke, ka ke ì taa ti.” Yaawe le ye a fo.

Yeremiya 30:3 Mawu Ofanana

Esira 3:1

Kabiriŋ kari woorowulanjaŋo siita, Banisirayilankoolu siiriŋo ì la saatewolu to, ì bee naata beŋ dulaa kiliŋ Yerusalaamu saatewo kono.

Esira 3:12

Bari piriisi keebaa jamaa, Lewi lasiloo, aniŋ lasili koteŋolu la alifaalu, mennu ye Yaawe la buŋ foloo je nuŋ, wuurita ka kumboo baake, kabiriŋ ì ye ñiŋ buŋo fondamaŋo je a be laa la. Wo waati kiliŋo la fanaa, moo jamaa ye ì kaŋo bula ka wuuri santo seewoo kamma la.

Esira 3:8

Bituŋ sanji fulanjaŋo kari fulanjaŋo kono, ì seyiriŋ koolaa ka naa Alla Batudulaa Buŋo be looriŋ daameŋ to nuŋ, Yerusalaamu saatewo kono, ì ye dookuwo dati. Seyalitiyeli dinkewo Serubabeli, Yosadaki dinkewo Yesuwa, aniŋ ì baadiŋ toomaa piriisoolu, Lewi lasiloo, ka taa moo koteŋolu bee mennu seyita naŋ, wolu le ye dookuwo dati. Lewi lasiloo meŋ-wo-meŋ siyo ye sanji muwaŋ sii waraŋ ka tambi a la, ì ye wolu le tomboŋ ka mara Yaawe Batudulaa Buŋo seyinkaŋ loo ma.

Jabuuroolu 126:4

Yaawe, ǹ na firiŋo murundi ǹ kaŋ, komeŋ jiiboroo ka naa wulumbaŋ jaaroolu kono ñaameŋ.

Jabuuroolu 53:6

M be ñaaniriŋ ne fo kiisoo si bo Banisirayila ye naŋ Siyoni*. Niŋ Alla ye a la moolu murundi firiŋo kono, Yaakuba koomalankoolu si seewoo, Banisirayilankoolu bee si jusulaa.

Yeremiya 16:15

Bari ì be kali i kali la le ko, ‘A be koyiriŋ ñaameŋ ko Yaawe be baluuriŋ ne, meŋ ye Banisirayilankoolu bondi naŋ bankoo meŋ be maraa kara maafaŋo la, aniŋ banku koteŋolu bee kaŋ, a ye ì janjandi daamennu to.’ Kaatu m be ì murundi la naŋ bankoo kaŋ ne ŋa meŋ dii ì la alifaa foloolu la.”

Yeremiya 23:5

Yaawe le ye ñiŋ fo ko: “A juubee, luŋolu be naa le, m be yiribulu tilindiŋo sorondi la Mansa Dawuda koomalankoolu ye. A be ke la mansakewo le ti meŋ be maraloo ke la niŋ fahaamuroo la, aduŋ a be tooñaa kiitiiteyoo niŋ tiliŋo le taamandi la bankoo kaŋ.

Yeremiya 27:11

Bari niŋ banku-wo-banku ye a toŋo jimi Babiloni mansakewo la yookoo koto ka a batu, nte Yaawe be wo tu la a noo to le, a ye a fansuŋ bankoo sene ka sabati jee.” Yaawe le ye a fo.

Yeremiya 27:22

Ì be ì samba la Babiloni bankoo kaŋ ne, aduŋ ì be tu la jee le fo niŋ nte Yaawe ye ì hati tumoo meŋ na. Wo le to n si naa ì murundi naŋ, ka ì seyindi ì noo to ñiŋ dulaa to.”

Yeremiya 29:10

“Nte Yaawe ye ñiŋ ne fo ko: Niŋ Babiloni la sanji taŋ woorowula maraloo kumfaata, m be ali hati la le, ŋa kuu kendoo timmandi ali ye, ŋa ali laahidi meŋ na, ka ali seyindi naŋ.

Yeremiya 29:14

ali be n je la le. Nte Yaawe le ye a fo, aduŋ m be ali samba la naŋ ne ka bo bankoolu bee kaŋ, ŋa ali janjandi daamennu to. M be ali murundi la ali la firiŋo to le, ka ali murundi dulaa to ŋa ali bondi daameŋ ka ali samba mutoo kono.” Yaawe le ye a fo.

Yeremiya 3:18

Wo waatoo la, alitolu Yahuuda moolu be kafu la Banisirayila moolu ma le. Ali be naa ñoo la le ka bo bankoo to, meŋ be maraa kara maafaŋo la, ka naa bankoo kaŋ ŋa meŋ dii ali mumuñolu la keetaafeŋo ti.

Yeremiya 30:10

“Wo to ali kana sila, alitolu Yaakuba koomalankoolu, n na dookuulaalu, sako ka jikilateyi, alitolu Banisirayilankoolu.” Yaawe le ye a fo. “Kaatu ko, m be ali kiisa la naŋ dulaa jamfariŋo to le, ka ali koomalankoolu bondi naŋ ì mutadulaa bankoo kaŋ. Yaakuba koomoo be muru la naŋ ne ka tenkuŋo niŋ tankoo soto, aduŋ moo te a silandi noo la.

Yeremiya 30:18

Yaawe ye ñiŋ ne fo ko: “A juubee, m be Yaakuba koomalankoolu murundi la le ka tara firiŋo kono, aduŋ m be balafaa soto la ì ye ì sabatidulaalu la kuwo to le. Yerusalaamu saatewo be lookuu la a tumbuŋ noo to konko tintoo kaŋ ne, aduŋ mansasuwo be seyinkaŋ loo la a noo kotoo to le.

Yeremiya 30:4

Yaawe ye ñiŋ kumoolu le fo Banisirayila niŋ Yahuuda la kuwo to:

Yeremiya 31:16

Yaawe ye ñiŋ ne fo ko: “Ali ali kaŋo foñondi kumboo la, ali ye ali ñaajiyo daŋ, kaatu ali ye meŋ dookuu a be joo la le.” Yaawe le ye a fo. “Ì be muru la naŋ ne ka bo ali jawoolu la bankoo kaŋ.

Yeremiya 31:23

Yaawe Alihawaa Maariyo*, Banisirayila la Alla ye ñiŋ ne fo ko: “Niŋ ŋa Yahuuda bankoo niŋ a saatewolu moolu murundi ì la firiŋo kono, ì be kali ñiŋ kumoolu fo la le kotenke ko: ‘Allamaa Yaawe neema la konko senuŋo* ma, tiliŋo ka tara daameŋ.’

Yeremiya 31:27

Yaawe ko: “A juubee, luŋolu be naa le, m be Banisirayila bankoo niŋ Yahuuda bankoo fandi la hadamadiŋo niŋ beeyaŋolu la le.

Yeremiya 31:31

A ko: “Luŋolu be naa le, wo tumoo m be kambeŋ* kutoo le siti la n niŋ Banisirayila niŋ Yahuuda teema.

Yeremiya 31:38

A ko: “A juubee, luŋolu be naa le, ì be Yerusalaamu saatewo seyinkaŋ loo la n tooyaa la, ka bo Hananeli Tata Jaŋo to ka taa fo Tonkoŋ Dundaŋ Daa to.

Yeremiya 32:37

A be koyiriŋ ne ko, m be ì kafu la ñoo ma le ka bo bankoolu bee kaŋ, ŋa ì bayi daamennu to, n na jusukandoo, diminnaa, aniŋ kamfaa baa kono. M be ì murundi la naŋ ñiŋ dulaa to le, ŋa ì sabatindi tankoo kono.

Yeremiya 32:44

Ì be kenoolu saŋ na kodiforoo la le, aduŋ ì be seedeyaa kayitoolu tampu la le, ka ì noto, aniŋ ka seedoolu ke ì la. Wo be ke la Benjamini tundoo kaŋ ne, Yerusalaamu dandanna saateeriŋolu to, Yahuuda saatewolu to, saatewolu mennu be konkotundoo* to, ka taa saatewolu mennu be Sefela* tundoo la, aniŋ Nekefu* tundoo saatewolu bulubaa kara maafaŋo la. M be ì la firiŋo murundi la ì kaŋ ne.” Yaawe le ye a fo.

Yeremiya 33:26

N nene te n koo dii la Yaakuba waraŋ n na dookuulaa Dawuda koomalankoolu la fereŋ, sako n si ñiŋ laahidoo faliŋ ko, Dawuda koomalankoolu le be mara la Iburayima, Isiyaaka, aniŋ Yaakuba koomalankoolu ma. M be meŋ ke la, wo le mu ka ì murundi naŋ ì la firiŋo kono, ŋa balafaa yitandi ì la.”

Yeremiya 51:60

Ŋa maasiiba kuwolu bee safee kitaabu moromororiŋo* le kono, mennu be naa boyi la Babiloni bankoo kaŋ. Wo kumoolu le be safeeriŋ teŋ, Babiloni bankoo la kuwo to.

Esekiyeli 20:42

Aduŋ niŋ ŋa ali samba naŋ Banisirayila bankoo kaŋ, ŋa ali mumuñolu laahidi ka meŋ dii ì koomalankoolu la, niŋ wo keta le, ali be a loŋ na ko, nte le mu Yaawe ti.

Esekiyeli 34:13

M be ì bondi la naŋ wo moo doolu kono le, wo bantala bankoolu* kaŋ, ka ì samba naŋ ì fansuŋ bankoo kaŋ. M be ì daañini la Banisirayila konkoolu le kaŋ, woyoolu be daameŋ to, aniŋ moolu be wo bankoo maafaŋo meŋ bee la.

Esekiyeli 36:24

A ko: “M be ali samba la naŋ ka bo wo bantala bankoolu bee kaŋ ne, ka naa ali fansuŋ bankoo kaŋ.

Esekiyeli 47:14

Wo lasili toomaalu bee ñanta kaañaŋ na talaaroo to le. Baawo ŋa n kali ali mumuñolu ye le ko, m be ñiŋ bankoo dii la ì la le, ì niŋ ì koomalankoolu, wo le ye a tinna a be ke la ali ye keetaafeŋo ti.

Yoweli 3:1

Yaawe* ko: “Wo luŋolu la, m be Yerusalaamu niŋ Yahuuda bee murundi la ì la neemoo kono le.

Sefaniya 2:7

A be ke la Yahuuda moolu le taa ti mennu tuta baluuriŋ. Ì be kali la ì la beeyaŋolu daañini la jee le, ì ye i laa Asikeloni buŋolu kono wulaaroo. Yaawe, ì la Alla le be ì topatoo la, a ye ì la neemoo murundi ì kaŋ.

Sefaniya 3:20

Ñiŋ waatoo la, m be ali kafu la ñoo ma le, ŋa ali samba naŋ suwo kono. M be buuñaa niŋ horomoo dii la ali la le, duniyaa moolu bee kono, ŋa ali la neemoo murundi ali kaŋ ali faŋolu ñaatiliŋo la.” Yaawe le ye a fo.

Luka 17:22

Wo to le Yeesu ko a la saayiboolu ye ko, “Waatoo be naa la le, ali be hame la ka luŋ kiliŋ je Moo Dinkewo* la luŋolu kono, bari ali te a je la.

Luka 19:43

Luŋolu be naa la le, i jawoolu be selenselendaŋolu ke la i la tatoo karoo bee la, ì ye i murubeŋ ka i suki.

Luka 21:6

“Luŋolu be naa la le, ñiŋ feŋolu ali ka mennu je, ì bee be tiñaa la le. Hani bere kiliŋ te tu la laariŋ ñoo kaŋ, meŋ te boyi la duuma.”

5 Musa 30:3

Yaawe be balafaa soto la ali ye le, a ye ali murundi naŋ ka bo bankoolu kaŋ, a ye ali janjandi daamennu to. A be ali firindi la le kotenke.

5 Musa 30:5

Yaawe ali la Alla be ali samba la naŋ bankoo kaŋ ne, meŋ keta ali mumuñolu taa ti, fo a si ke ali taa ti. A be ali yiriwandi la, aniŋ ka ali yaatewo siyandi ka tambi ali mumuñolu la.

Hiburunkoolu 8:8

Bari Alla ye sootaaroo je a la moolu la kuwo to le, wo le ye a tinna a ko: “Luŋolu be naa le, m be kambeŋ kutoo le siti la n niŋ Banisirayila niŋ Yahuuda teema.” Maariyo le ye a fo.