Mika 4:7 - Mandinka Bible

⁷ Ñiŋ lanjuurutoolu le be ke la moo baluuriŋ toomaalu ti. Ì ye mennu bayi ì fansuŋ bankoo kaŋ, ì ye ke banku sembemaa baa ti. Nte Yaawe faŋo le be ke la ì la Mansa ti Siyoni Konkoo kaŋ, ka bo saayiŋ fo abadaa.

Mika 4:7 Mawu Ofanana

Jabuuroolu 2:6

A ko, “Ŋa n na mansa londi Siyoni* le, n na konko senuŋo* kaŋ.”

Yesaya 16:5

Wo to, mansasiiraŋo be loo la kanu bambaloo le kaŋ, moo ye sii a kaŋ ka tooñaa taamandi. A be ke la Dawuda koomalankoo le ti, maralilaa meŋ ka kiitiyo kuntu a ñaama, aniŋ ka tariyaa ka tiliŋo kuwo sabatindi.

Yesaya 24:23

Karoo si dibi, tiloo ye foo a la maloo la, kaatu Yaawe Alihawaa Maariyo* le be maraloo ke la Yerusalaamu Siyoni* Konkoo kaŋ, saatee ñaatonkoolu si a la mansabaayaa je.

Yesaya 6:13

Aduŋ hani a ye a tara, moo taŋ-wo-moo taŋ, moo kiliŋ ne tuta baluuriŋ bankoo kaŋ, wo fanaa be kasaara la le. Bari a be ke la le ko, niŋ ì ye yiri baa kuntu, yirijuu kuntoo ka tu jee ñaameŋ, turu senuŋo be ke la bankoo kaŋ wo le ñaama.”

Yesaya 60:22

Dimbaayaa meŋ maŋ siyaa i kono, be naa ke la kaabiila baa le ti, meŋ dooyaabaata si naa ke banku baa ti. Nte le mu Yaawe ti. Niŋ a waatoo siita, m be a ke la tariyaake le.”

Yesaya 66:8

Jumaa le nene ye ñiŋ siifaa moyi? Jumaa le nene ye ñiŋ kuu siifaa je? Fo bankoo si loo noo tili kiliŋ, a ye timma ñaa kati niŋ ñaa yele teema? Bari Siyoni* be a diŋolu wuluu la le, niŋ a ye tiŋo kalamuta tumoo meŋ na doroŋ.”

Esekiyeli 43:7

A ko n ye le ko: “Hadamadiŋo, ñiŋ dulaa le mu n na mansasiiraŋo aniŋ n siŋ looraŋo ti. M be tara la sabatiriŋ Banisirayila moolu kono jaŋ ne to, ka ì mara fo abadaa. Banisirayilankoolu niŋ ì la mansoolu te n too senuŋo kosondi la kotenke ka bo niŋ ì la jalaŋ batu tuluŋolu la, aniŋ ì ye beroolu mennu loo ì la mansa furewolu ye.

Daniyeli 2:44

Wo mansoolu la waatoo la, Arijana Maarii be mansamarali bankoo le londi la, meŋ nene te baŋ na, aduŋ moo koteŋolu te ì semboo laa noo la a kaŋ. A be wo mansamarali banku koteŋolu bee le teyi la, ka ì janjaŋ, ì ye baŋ, aduŋ a be tu la looriŋ ne fo abadaa.

Daniyeli 4:34

Kabiriŋ sanji woorowuloo tambita, nte Nebukanesa naata n ñaalu wulindi ka santo juubee, bituŋ n sondomoo seyita a ñaama. Ŋa Alla Mansa Tallaa tentu, ŋa horomoo niŋ buuñaa dii a la, ate meŋ na noo te baŋ na. A la noo le be tu la fo abadaa, aduŋ a la mansabaayaa be tu la jamaanoolu bee le la.

Daniyeli 7:14

Wo le to a ye kaŋo dii a la, horomoo, aniŋ mansayaa semboo, ñiŋ kamma la banku-wo-banku, sii-wo-sii, aniŋ moolu bee si a batu. A la mansayaa semboo be tu la keriŋ ne fo abadaa, aduŋ a la mansabaayaa te baŋ na.

Daniyeli 7:27

Bituŋ ì si naa duniyaa mansamarali bankoolu bee la semboo niŋ waroo dii Alla Mansa Tallaa la moolu la. Ì la mansayaa be tu la le fo abadaa. Maralilaalu bee be soŋ na ì ma le, aduŋ ì be dookuwo ke la ì ye le.”

Hoseya 1:10

“Hani wo Banisirayilankoolu yaatewo be ke la le ko bankumunkoo, meŋ te sumaŋ noo la sako a yaatewo si loŋ. Aduŋ a fota a ma daameŋ to ko, ‘Ali maŋ ke n na moolu ti,’ a be fo la a ma jee le to ko, ‘Alla baluuriŋo diŋolu.’

Yoweli 2:32

Bari moo-wo-moo, meŋ ye Yaawe too kumandi, wo be kiisa la le. Siyoni Konkoo niŋ Yerusalaamu, moolu be soto la jee le, mennu be kana la, aniŋ moo toomaalu fanaa, Yaawe ye mennu tomboŋ, ko Yaawe ye a laahidi ñaameŋ.”

Yoweli 3:17

Yaawe ko: “Ali be a loŋ na le ko, nte le mu Yaawe ti, ali la Alla, meŋ be sabatiriŋ Siyoni, n na konko senuŋo*. Yerusalaamu be janku la le, luntaŋolu te a maa la kotenke.

Obadiya 1:21

Tankandirilaalu be sele la Siyoni Konkoo kaŋ ne, aduŋ ì be Edomu konkotundoo mara la le. A mansayaa be tara la nte Yaawe faŋo le bulu.”

Mika 2:12

Yaawe ye ñiŋ ne fo ko, “Alitolu Yaakuba koomalankoolu, a be koyiriŋ ne ko, m be ali bee kafu la ñoo ma le. M be Banisirayila moo toomaalu bee kafu la ñoo ma le. M be ali ñaatonkayaa la, ko niŋ ì be saajiyolu kenkeŋ kaŋ ì la buŋo kono, ko niŋ ì be beeyaŋ koorewo kenkeŋ kaŋ daañini dulaa to. Hadamadiŋolu maakaŋo doroŋ ne be moyi la ñiŋ dulaa to ì la siyaa kamma.”

Mika 2:13

Alla le be siloo yele la, a ye tambi ì ñaato, bituŋ ì ye a nooma. Ì ye tambi niŋ saatee dundaŋ daa la, ì ye finti. Ì la Mansa, Yaawe faŋo le be tambi la ì ñaato.

Mika 5:3

Yaawe be a la moolu fili la ì jawoolu bulu le, fo janniŋ ñiŋ maralilaa be wuluu la. Wo le to a baadiŋ toomaalu be naa bo la mutoo kono, ì ye muru ka kafu Banisirayilanka koteŋolu ma.

Mika 7:18

Alla koteŋ ne be keriŋ baŋ ko ite? Ite le ka junuboolu kafari i la moolu ye, mennu tuta baluuriŋ, ite le ka yamfa ì la sookiri kuwolu la. I la kamfaa buka tu fo abadaa, i ka lafi le ka tara hiinanteeyaariŋ doroŋ.

Sefaniya 3:13

Moolu mennu be tu la Banisirayila kono, wolu te kuu jawu ke la, ì te faniyaa fo la, aduŋ tapaleeyaa neŋ te tara la ì daa. Ì si domoroo ke ì ye i laa, aduŋ moo te ì silandi noo la.”

Sefaniya 3:20

Ñiŋ waatoo la, m be ali kafu la ñoo ma le, ŋa ali samba naŋ suwo kono. M be buuñaa niŋ horomoo dii la ali la le, duniyaa moolu bee kono, ŋa ali la neemoo murundi ali kaŋ ali faŋolu ñaatiliŋo la.” Yaawe le ye a fo.

Luka 1:33

A be Yaakuba la lasiloo mara la le fo abadaa, a la mansayaa te dandulaa soto la.”

Lankenemoo 11:15

Bituŋ malaayika woorowulanjaŋo ye a la footaŋo fee, aduŋ kumakaŋ baalu be Arijana kono, ì be a fo la ko, “Duniyaa mansayaa bee naata ke m̀ Maariyo niŋ a la Alimasiihu* la mansayaa le ti, aduŋ a si maraloo ke fo abadaa!”