Kawandilaa 12:2 - Mandinka Bible

² I hakiloo ye bula a la, janniŋ tiloo maloo, karoo maloo, aniŋ looloo maloo be dibi la, janniŋ tawaloolu ka muru naŋ, sanjiyo koolaa.

Kawandilaa 12:2 Mawu Ofanana

1 Musa 27:1

Kabiriŋ Isiyaaka kotoota, a ñaa mutata le, fo a buka jeroo ke noo. A ye a dinkee keebaa Esawu kumandi, a ko a ye ko, “N diŋo!” Esawu ko a ye ko, “M fele jaŋ!”

1 Musa 48:10

Saayiŋ Isirayila ñaalu ka dibi a ma le keebaayaa kamma la, a buka jeroo ke noo baake. Wo le to Yusufa ye ì samba naŋ a daala, a ye i miniŋ ì la, a ye ì sumbu.

Jabuuroolu 42:7

I ye niikuyaa jiibalimmaalu le samba naŋ n kaŋ. N ka bumbuŋ kaŋo le moyi, meŋ dunta ñoo to. I ye mantooroo waamemaa le naati n kaŋ.

Jabuuroolu 71:20

I ye bataa baa niŋ mantooroo laa n kaŋ ne, bari i be muru la le i ye m bambandi, ka m bondi saayaa daa to, i ye m murundi baluwo to kotenke.

Jabuuroolu 77:16

Kooni Alla, biriŋ baajiyolu ye i je ì silata le, fankaasoo diinoŋñaalu jarajarata le.

Jabuuroolu 90:10

Ǹ siyo daŋo mu sanji taŋ woorowula le ti, waraŋ niŋ m̀ bambanta, sanji taŋ seyi, hani wo, ì bee mu bataa niŋ mantooroo le ti. Kataba kiliŋ ì si baŋ, ŋà yeemaŋ.

Yesaya 13:10

Saŋo looloolu niŋ ì la maloo te je la. Niŋ tiloo be wuli la, a si dibi, aduŋ karoo te mala la.

Yesaya 5:30

Ì be bumbuŋ na le ko fankaasoo. Wo luŋo la, ko niŋ tawali fiŋo ye tiloo muuri, diboo aniŋ niikuyaa le be tara la Banisirayila bankoo kaŋ.

Yoweli 3:15

Tiloo niŋ karoo si dibi, looloolu ye i dahaa maloo la.

Matiyu 24:29

“Wo koleyaa kuu baa koolaa doroŋ, wo luŋolu la, tiloo be dibi la le, aduŋ karoo te a la maloo dii la. Looloolu be boyi la ka bo saŋo santo, aduŋ saŋ fatoolu la semboo be jiijandi la le.

1 Samuweli 3:2

Suuto kiliŋ Eli meŋ ñaalu lafita ka dibi, be laariŋ nuŋ a la dulaa kiliŋo to.

1 Samuweli 4:15

Eli tarata nuŋ sanji taŋ kononto niŋ seyi le, aduŋ a ñaalu finkita le.

1 Samuweli 4:18

Kabiriŋ a ye Alla la Kambeŋ Kunewo la kuwo fo, Eli boyita a la siiraŋo kooma la saatee dundaŋ daa to. A kaŋo katita, aduŋ a faata, kaatu a kotoota le, a baloo kuliyaata. A ye Banisirayila ñaatonkayaa le fo sanji taŋ naani.