Jakariya 12:5 - Mandinka Bible

⁵ Yahuuda maralilaalu si a fo ì faŋ ye ko, ‘Yerusalaamunkoolu la Alla, Yaawe Alihawaa Maariyo* le ye semboo dii ì la.’

Jakariya 12:5 Mawu Ofanana

Jabuuroolu 144:1

Tentoo be Yaawe* ye, n na semberaŋ beroo, ate le ye n nindi keloo la, fo m buloo koyita lewu.

Jabuuroolu 18:32

Alla, ite le ye m fandi semboo la, aduŋ ite le ye n na siloo beteyandi.

Jabuuroolu 18:39

I ye m fandi semboo la ka keloo ke, i ye a ke, n jawoolu ñoyita n siŋolu daala.

Jabuuroolu 46:1

Alla le mu ǹ na tankandirilaa ti, ǹ jikiraŋ semboo. Maakoyirilaa le mu, meŋ ka tu sabatiriŋ m̀ fee koleyaa kono.

Yesaya 1:10

Alitolu Yerusalaamunkoolu, ali niŋ ali la maralilaalu ka munta le ko Sodomu niŋ Komorankoolu! Ali ali tuloo loo Yaawe la kumoo la! Ali ali hakiloo tu ǹ na Alla la luwaa to!

Yesaya 1:23

I la maralilaalu mu balannaalu le ti, aduŋ suŋolu le ka ke ì taañoolu ti. Ì bee lafita duku mutoo la le, aduŋ ì ka tara soorifeŋolu le nooma. Ì buka loo aliyatiimoolu la kuwo la, ì buka hani i lamoyi furuyaamusoolu la kiitiyo la.

Yesaya 1:26

M be kiitindirilaalu dii la i la le ko i la folooto taalu. M be yaamarilaalu dii la i la le, ì ye ke ko mennu be jee nuŋ. Wo koolaa le, ì be i kumandi la saatee tilindiŋo la, aniŋ saatee foroyaariŋo.”

Yesaya 28:5

Wo luŋo la, Yaawe* Alihawaa Maariyo* faŋo be ke la le ko mansanaafa ñiimaa, ko kuŋ ñarandiraŋ firi ñiimaa a la moolu ye, mennu tuta baluuriŋ.

Yesaya 28:6

A be tiliŋo dii la kiitiikuntulaa la le, ka semboo dii moolu la, mennu ka saatee dundaŋ daa tanka keloo ma.

Yesaya 29:10

Kaatu ko, Yaawe ye siinoo baa le kupi ali kaŋ, aduŋ annabiyomoolu mennu keta ali jerilaŋ ñaalu ti, a ye wolu ñaalu tawuŋ ne, jerilaalu mennu keta ali kuŋolu ti, a ye wolu kuŋolu suki.

Yesaya 32:1

A juubee, mansa be soto la le, meŋ be maraloo ke la tiliŋo kono, aduŋ a la maralilaalu be tooñaa le taamandi la.

Yesaya 45:24

Ì be a fo la m ma le ko, ‘Tiliŋo niŋ semboo be Yaawe dammaa le fee.’ Moolu mennu kamfaata n kamma, ì niŋ maloo le be naa n kaŋ.

Yesaya 60:17

“Niŋ n ñanta jaawaloo le naati la, m be a faliŋ na le, ŋa a ke sanoo ti, newo ye faliŋ kodiforoo ti. Niŋ n ñanta babaroo le naati la, n si jaawaloo samba naŋ i ye, newo si beroo la palaasoo taa. M be kayiroo le ke la i la maralilaa ti, ŋa tiliŋo ke i la ñaatonkoo ti.

Yeremiya 30:21

Ì la ñaatonkoo be ke la ì fansuŋ moo le ti, ì la maralilaa be bo la ì faŋolu le kono. M be a katandi la le, ka a sutiyandi n na, kaatu niŋ wo nte, jumaa le si haañi ka sutiyaa n na?” Yaawe le ye a fo.

Yeremiya 33:26

N nene te n koo dii la Yaakuba waraŋ n na dookuulaa Dawuda koomalankoolu la fereŋ, sako n si ñiŋ laahidoo faliŋ ko, Dawuda koomalankoolu le be mara la Iburayima, Isiyaaka, aniŋ Yaakuba koomalankoolu ma. M be meŋ ke la, wo le mu ka ì murundi naŋ ì la firiŋo kono, ŋa balafaa yitandi ì la.”

Yoweli 3:16

Yaawe bumbunta ko jatoo ka bo naŋ Siyoni*, a ye kaŋo dii ka bo Yerusalaamu, saŋo niŋ bankoo jarajarata. Bari Yaawe faŋo le mu a la moolu ye tankadulaa ti, tata bambandiŋo, Banisirayilankoolu ye.

Jakariya 10:12

M be ì bambandi la nte Yaawe la kuwo to le, ì ye taama n too la.” Yaawe le ye a fo.

Jakariya 10:6

“M be Yahuuda moolu bambandi la le, ŋa Yusufa koomalankoolu kiisa. M be ì murundi la naŋ ne, kaatu m baloo faata ì ye le. Ì si ke ko, n nene maŋ m baŋ nuŋ mennu to. Nte le mu Yaawe ti, ì la Alla, m be ì la duwaa jaabi la le.

Jakariya 12:4

Yaawe ko, “Wo luŋo la, m be kijafaroo le duŋ na keleraŋ suwoolu bee la, ŋa ñaamaa duŋ ì borilaalu la. M be bankoolu bee la keleraŋ suwoolu finkindi la le, bari n ñaa be tara la Yahuuda moolu kaŋ ne.

Jakariya 12:6

“Wo luŋo la, m be Yahuuda maralilaalu ke la le ko keraŋ dimbaamaa loo jurumoo teema ko dimbaa pacamoo siimaŋ kunsitoolu teema, ka ì dandanna bankoolu bee kasaara, mennu be ì bulubaa niŋ ì maraa karoo la. Bari Yerusalaamu be tu la a noo to le, moolu ye tara sabatiriŋ jee.

Jakariya 14:14

Hani Yahuuda faŋo be duŋ na keloo to Yerusalaamu le. Ì be ì dandanna bankoolu la fankoo kafu la ñoo ma le, meŋ be ko sanoo, kodiforoo aniŋ sitifeŋolu, ì jamaa baa.

Kiitindirilaalu 5:9

N hakiloo be Banisirayila la kelediŋ kuntiyolu kaŋ ne, aniŋ moolu, mennu wakiilita ka ì faŋolu dii. Ali Yaawe tentu!